TIMOTIUS 1 3:1 - Alkitab Singog In Mongondow Masa In Tanaa

¹ Totuubí in singog tanaa: “Intau inta moibog mobaḻí itoi kon jamaat, yo sia tua in moibog in oaidan inta totok in mopia.”

TIMOTIUS 1 3:1 Iomraidhean Croise

AMSAL 11:30

Intau inta mobiag motoindudui in kinoḷukadan bidon in kobiagannea; intau inta mobijaksana modugang in dumoduduinea.

LUKAS 15:10

Natua doman in malaekat mita i Allah, mopia in gina monia aka oyúon tobatú intau inta moraat in mogogaidon in mogaid kon dosa. Tuamai, popirisayabí!”

OUMAN IN RASUL MITA 1:20

“Sin kon buk in Mazmur oyúon pinais nanaa, ‘Pomayádon mako sin ḻipú monia tua in moingongowbí; dikadon in tobatúmai in mogutun kon bonunea’ Oyúon doman in pinais nanaa, ‘Pomayádon mako in ḷoḻitúannea in gamáan in intau.’

OUMAN IN RASUL MITA 20:28

Manangka intua yo mokopopiadon in moiko bo umuran moḷukad kon awak monimu bo poḷat doman ḷukadai in bayongan umat i Allah inta ain pinosarakan i Allah kon i monimu sinbá ḷukadan. Sin moiko nion ain sinantú in Roho i Allah mobaḻí moḷoḷukad bo mononompia kon umat i Allah inta ain sinobut-Nea in dugú i Adí-Nea tontaní.

SURAT I PAULUS KON JAMAAT RUM 11:13

Tanaa akuoi in mogumandon kon i utat mita inta deeman intau in Yahudi! Saḷaku rasul kon intau mita deeman Yahudi, totokbí in untuonku in oaidanku tanaa.

EPESUS 4:12

Mosia naa in inogoi i Allah sinbá umat i Allah tokotompiaan sinbá mosia in motaau mogaid kon oaidan i Tuhan bo moduḷu moposindog in awak i Kristus.

PILIPI 1:1

Utatku mita umat i Allah inta nogutun kon Pilipi, inta notobatúdon i Kristus Yesus bo inta ain nobaḻí itoi bo diaken kon jamaat! Akuoi, ki Paulus bo ki Timotius inta mogogaid kon oaidan i Kristus Yesus,

TESALONIKA 1 5:14

Utatku mita naa doman dugang in tonggina nami kon i monimu; toboḷow pia-pia mako in mosia inta doí mogaid bo tantú irigonai in gina in intau mita inta mongoondok, bo dika koḻiongan in motuḷung kon intau mita bogá bo mokoposabar in tumayow kon intau inta noyagi-yagimai in oaid.

TIMOTIUS 1 1:15

Totuubí in singog tanaa, tuamai in patusbí tarimaan bo pirisayaan komintan: “Kon ki Kristus ain namangoi in dunia naa sin moposaḷamat kon intau baradosa.” Bo akuoibí naa in intau inta totok in binaradosa bo inta totok doman in moraat.

TIMOTIUS 1 4:9

Totuubí in singog tanaa bo patusbí tarimaan poḷat pirisayaan.

TIMOTIUS 2 2:11

Totuubí in singog tanaa, “Aka kita bo matoi takin-Nea, yo kita in mobiagbí doman takin-Nea.

TITUS 1:7

Sin itoi kon jamaat tua in mogaidbí kon oaidan i Allah, manangka intua mustibí intau inta mopia, diá mododia bo diá morogi, deemanbí intau inta umuran moḷoḷangu, deeman doman intau inta moibog-ibog motayak kon mokorogenggeng bo diá doman dinoit.

TITUS 3:8

Totuubí in singog tanaa. Ibogonku in naa komintan potaaumu kon i monia, sinbá mosia inta ain nopirisaya kon i Allah totu-totuudon moramuji mogaid kon inta mopia, sin natuabí in mopia bo inta baraguna kon bayongan intau.

IBRANI 12:15

Ḷukadaibí sinbá diá tobatúmai in intau ḷumuai nongkon kobiagan inta pinodoyon kon totabi i Allah, sinbá diá in mobaḻí rasum inta mokopomuká kon ropatoi bo inta mokogoguyaat kon kobiagan intau mobayong.

PETRUS 1 2:25

Koḻipod moiko in naonda bo domba inta noiḷaḻe, táe tanaa moiko in diniadon bui sinbá dumuduidon kon Gombala bo kon i Inta Moḷoḷukad kon jiwamu.

PETRUS 1 4:15

Dikabí tobatúmai kon sigad monimu, rorigaan sin popisí in moḷoḻimod in sia, andeka mononakow, andeka nogaid kon inta moraat, andeka intau inta moibog kumapog kon urusan in intau ibanea.

PETRUS 1 5:2

ḷukadaibí monimu kopiaraan in domba i Allah inta ain pinosarakan kon i monimu. Ḷukadai takin sanang in gina ná inta kinoibog i Allah, dikabí tongá pakisa in gina. Bo dika doman mogaid kon oaidan tatua tongá sakadar motayak kon kauntungan tontaní, táe aidaibí intua sin lantaranbí moiko totu-totuubí moibog mopobayá in oaidan i Allah.