TIMOTIUS 1 2:4 - Alkitab Singog In Mongondow Masa In Tanaa

⁴ Ki Allah inta moibog bá bayongan in intau in posaḷamaton bo monotaau kon onu inta moitutui.

TIMOTIUS 1 2:4 Iomraidhean Croise

YESAYA 45:22

Ei, bayongan intau kon dunia, angoidon kon i-Nakó sinbá moiko in posaḷamaton, sin tongábí Akuoi in Allah, diábí in ibanea!

YESAYA 49:6

Ki Tuhan in noguman kon inakó, “Oaidan inta moḷobe-ḷoben in mogoḷat mako kon inimu, ei mogogundoi-Ku; iko in diábí tongá mopobui in ki agat in buí i Yakub bo mopoguḻit kon koḷoḷoben in suku mita in Israel, táe baḻíon-Ku doman bayag in bangusa mita, sinbá sinangkub in dunia posaḷamaton.”

YESAYA 53:11

Tuamai in ki Tuhan in noguman, “Naonda in nobaba mako kon roriga, sia in mosanangbí bo mopuas. Mogogundoi-Ku tua, inta mokosanang kon gina-Ku, ain nobaba kon hukuman in intau mobayong; pinodoyon kon inia Akuoi in mongampung kon i monia.

YESAYA 55:1

KI Tuhan in noguman, “Igaidon in moiko komintan inta morogang, ponginumdon, tubig in sinadiadon. Angoidon in moiko inta diá kodoit, tarimadon in gandum inta diábí uboḻian, bo kaandon! Anggur bo susu in sinadiadon, tarimadon mako diábí uboḻian.

YEHEZKIEL 18:23

Degá iraimumai kon Akuoi, ki Tuhan Inta Totok in moḷantud in mosanangbí aka intau moraat bo matoi? Totokbí in diá! Ibogon-Ku in bá taḷaanneabímai in bayongan in dosa sinbá tantú mobiag in sia.

YEHEZKIEL 18:32

Diábí mopia in gina-Ku aka intau tobatú matoi. Taḷaaidon in dosamu mita sinbá umuran mobiag in moiko. Akuoi ki Tuhan Inta Totok in moḷantud ain nosingog.”

YEHEZKIEL 33:11

Potaaudon kon i monia, kon podoyon kon i-Nakó, ki Allah inta nobiag, ki Tuhan Inta Totok in moḷantud, diábí mopia in gina-Ku, aka intau moraat matoi; ibogon-Ku in sia in monaḷámai kon dosanea mita sinbá sia in umuran mobiag. Ei bangusa in Israel, pogogaidon in mogaid kon inta moraat! Nongonu sin moibogbí in moiko matoi?

HABAKUK 2:14

Táe naonda bo dagat inta nopuḻing in tubig, yo natua doman in butá in mopuḻingbí in sinotaau soaḷ ki Tuhan bo kawasa-Nea.

MATIUS 28:19

Tuamai, bayádon, bo baḻídon in bayongan intau dumodudui-Ku, bo baptisdon in mosia podoyon kon tangoi i Amá, Adí, bo in Roho i Allah.

MARKUS 16:15

Guman i Yesus kon i monia, “Bayádon in bayongan dunia naa bo potaaudon in Habar Mopia nongkon i Allah kon bayongan intau.

LUKAS 1:77

Bo iko in mopotaau kon umat-Nea, kon mosia in posaḷamaton i Allah aka taḷá mita monia bo ampungan-Neadon.

LUKAS 14:23

Dá kai tuangnea doman, ‘Bayádon in daḷan mita moḷoben bo loro-lorongannea kon ḷuai in kotá bo pakisadon in mosia dia mangoi sinbá mopuḻing in baḷoiku naa.

LUKAS 24:47

Bo podoyon doman kon tangoi i Datu Mopoposaḷamat tatua mustibí popotaau kon bayongan in bangusa, kon intau in mustibí mogogai in mogaid kon inta diá mopia bo potaau doman kon ki Allah in mongampungbí kon bayongan dosa mita monia. Bo habar tatua in musti popotaau pangkoion kon Yerusalem.

YOHANES 14:6

Ki Yesus in notubag, “Akuoibí naa in daḷan kon monotaau kon i Allah bo mokouḻí kon kobiagan. Diábí in tobatúmai intau in mokoyaput kon i Amá, aka diá mongin i-Nakó.

YOHANES 17:17

Baḻí in mosia tongá kapunyaan i Amá pongin inta mobanar. Pirman i Allah tuata in mobanar.

YOHANES 6:37

Bayongan in intau inta inogoi i Amá-Ku kon i-Nakó in mamangoibí kon i-Nakó. Ki inekabí in mamangoi kon i-Nakó diábí in diá tarimaan-Ku.

SURAT I PAULUS KON JAMAAT RUM 11:14

Haraponku mako akuoi in mokopomuká kon intoi kon intau mita tobangusaku, sin aka natua yo motaau posaḷamatonku in tongonumai intau nongkon i monia tua.

TIMOTIUS 1 4:10

Manangka intua kita in musti moramuji mogaid, sin kita in tongábí moharap mako kon i Allah inta nobiag; Sia tuata inta mopoposaḷamat kon bayongan in intau, muna-munamai mosia inta mopirisaya.

TIMOTIUS 2 2:25

Sia in musti mokopoḷukó kon bahasa aka motundú kon intau mita inta moibog momaḷawang; bo tantú mopoigum mako bá ogoian i Allah in kasampatan in intau mita tatua sinbá mogogaidon in mogaid kon dosa bo monotaaudon kon totundú inta noitutui.

TIMOTIUS 2 3:7

Bobay mita tatua in umuran mopoigum sinbá tundúon in soaḷ mita inta mopia, táe diá dodai onda momangaḻe kon onu inta mopira nongkon i Allah.

TITUS 1:1

Titus adíku! Akuoi, ki Paulus in nomais kon surat tanaa saḷaku mogogaid kon oaidan i Allah bo rasul i Yesus Kristus. Akuoi in piniḻí bo pinotabá sinbá motuḷung kon intau mita inta ain piniḻí i Allah sinbá umuran morigon in pirisaya monia kon i Tuhan Yesus. Bo mustibí umuranku tundúon in mosia sinbá totokdon in monotaau kon onu inta moitutui podudui in agama naton.

TITUS 2:11

Sin ki Allah ain nopoontong in totabi-Nea sin moposaḷamat kon bayongan in umat kon dunia naa.

IBRANI 10:26

Sin aka habar inta mobanar nongkon i Allah ain pinotaau kon i naton, táe umuranpa doman tumuod in kita in mogaid kon dosa, dá diá bidon in kuruban inta pomopat kon dosa naton.

YAKOBUS 3:14

Táe aka moiko in mointoi bo tongá morai kon kopontingan tontaní, donaaibí pongaḷakuang monimu in kabijaksanaan tatua, sin dodia monimu natua in mopoyotuuybí in habar inta nobanar nongkon i Allah.

PETRUS 2 3:9

Diábí moḷaḷoi in ki Tuhan mogintompod kon onu inta ain pinodandi-Nea, umpakabí oyúon intau in mosingog kon moḷaḷoi in Sia. Táe ki Tuhan in umuranbí mosabar in moindoi mako kon oaid monimu, sin doíbí in Sia aka tobatúpamai intau kon sigad monimu in moputú. Ibogon-Nea, bayongan intau in mogogaidon in mogaid kon dosa.

YOHANES 2 1:1

Kon i Iná inta ain piniḻí i Allah bo kon i adínea mita inta kinotabiku. Surat tanaa in nongkon inakó, tobatú itoi in jamaat inta totu-totuu motabi kon i monimu. Deemanbí tongá akuoi in motabi kon i monimu, táe bayonganbí doman intau inta totu-totuudon nonotaau kon i Allah.

WAHYU 14:6

Noiduduimai kon tua akuoi in nokoontong kon tobatú malaekat ibanea inta iḷumayug noḷantud kon ḷangit. Malaekat tatua in nodia kon Habar Mopia inta mononoi sin poyaputon kon intau kon dunia naa bo kon bayongan bangusa, suku bahasa bo negara.