TAWARIKH 1 9:1 - Alkitab Singog In Mongondow Masa In Tanaa

¹ Bayongan intau in Israel in pinais pinodudui kon batúan in motoḷuadínea. Daptar tatua in pinais kon bonu in buk Datu mita in Israel. Nobaḻí hukuman popisí in mosia nomia kon dosa, dá rayat in Yohuda in dinia kon pinoḷumbúan.

TAWARIKH 1 9:1 Iomraidhean Croise

DATU MITA IMITÁNEA 14:19

Ouman ibanea soaḷ ki Datu Yerobeam, pinomarentaannea bo tongganutnea noparang, ain pinais kon bonu in buk Ouman kon onu inta nobaḻí kon Datu mita in Israel.

DATU MITA 2 24:14

Ki Datu Yoyakhin, ki inánea, ki buḷoinea mita, pogawainea mita, bo itoi mita in Yohuda – kobayong monia komintan in 7.000 in intau inta ihoromat – dinomok bo dinia pinobayá in Babel. Noitakin doman in intau mita inta mopandoi mogaid bo mononontaḷ kobayongnea in 1.000 in intau, komintanbí intau mita inta moropot bo inta mongobarani moparang. Intau mita buí in datu, bo intau mita inta ihoromat in dinia doman minayá in pinoḷumbúan – kobayong monia tua in 10.000 in intau. Gogió bo bayongan in intau inta nogutun kon Yerusalem in dinia; inta kinotaḷáan in dongkadon rayat inta nobiag nobogá totok.

TAWARIKH 1 8:40

Ki adí mita i Ulam in komintan tontara inta mongotorindog bo mongopandoi momiot. Adí bo ompunea inta ḷoḷaki kobayongnea in 150. Mosia komintan in noituot kon bonu in suku i Benyamin.

TAWARIKH 2 33:11

Tuamai ki Tuhan in nopoangoi in tongguḷu totokanea in tontara in Asyur sin monubu kon Yohuda. Ki Manasye in dinomok in kokarit, bo inumantungan bo dinia pinobayá in Babel.

EZRA 2:1

Nobayong in kon sigad in intau mita inta kon pinoḷumbúan in nonaḷámai kon butá in Babel bo nobui minayá in Yerusalem bo Yohuda, kon batúannea nobui kon kotánea-kotánea. Mosia in nobiagdon kon pinoḷumbúan kon Babel pinangkoipamai mosia inakut kon tua i Datu Nebukadnezar.

EZRA 2:59

Intau mita inta nobuat nongkon kotá mita in Tel-Melah, Tel-Harsa, Kerub, Adan bo Imer, kobayongnea in 652 in intau. Mosia in noituot kon inanakan motoḷuadí i Delaya, i Tobia bo i Nekoda, táe mosia in diá nokopooyúon in bukti kon mosia tua buí in bangusa in Israel.

NEHEMIA 11:1

Itoi mita in nogutun notantú kon Yerusalem bo rayat in nopogonik in undi sin momiḻí kon motoḷuadí nongkon batúan in motoḷuadí mopuḷú inta musti mogutun kon kotá motusi, Yerusalem. Inta diá kinopiḻían in motaaubí mogutun kon kotá mita ibanea.

NEHEMIA 7:5

Tuamai in pinopogonú i Allah kon inakó sinbá mosipun kon rayat bo itoi mita takin guhanga mita in ḻipú, sinbá motaau iyaponku in mosia podudui in tangoi kon inanakan monia. Kon kasampatan tatua aindon nouḻíku in pinomaisan kon tangoi mita in intau inta muna-munamai nobui nongkon pinoḷumbúan. Noiduduimai naa in katarangan inta nouḻíku nongkon pinomaisan tatua:

YESAYA 3:2

pahlawan mita bo tontara, hakim, nabi, mononoḷanow bo monononggina,

YEREMIA 13:19

Kotá mita in Yohuda kon dotá in toḷatan koyogotdon in kinopung, bo diádon in mokoḷuai kon pinongopungan tatua. Bayongan intau in Yohuda in diniadon kon pinoḷumbúan.”

YEREMIA 39:9

Imbuitnea rayat inta kon kotápa, takin intau mita inta ain noḷagui bo dinumotá kon intau mita in Babel, inakut pinobayá in Babel i Nebuzaradan itoi in tontara in Babel.

DANIEL 1:2

Inogoi i Tuhan in sia in nonaḷow kon i Datu Yoyakin bo poḷat nogagow kon tongosilai in pakakat mita inta koboḻi kon Baḷoi Tuhan. Intau mita inta sinokodakopnea, dinianea kon kuil in dewanea kon Babel, bo pakakat mita inta koboḻi inta inagownea, sinagúnea kon bonu in gudang mita in kuil tatua.