SAMUEL 1 4:5 - Alkitab Singog In Mongondow Masa In Tanaa

⁵ Naonda in Poti Dodandian tatua nodapot kon pinononḷoḷaigan, norogiowdon noropot in intau in Israel, nodapot in nodandú in butá.

SAMUEL 1 4:5 Iomraidhean Croise

SAMUEL 2 15:24

Ki Imang Zadok bo ki Imang Abyatar in kon tua takin bayongan intau in Lewi inta nodia kon Poti Dodandian i Tuhan. Poti Dodandian tatua in inukat, bo diábí binuat kon dodai in bayongan in rayat diápa nodait nonaḷámai kon kotá tatua.

DATU MITA IMITÁNEA 1:40

Noiduduimai kon tua mosia komintan nonakin kon inia nobui sindaḷan norogiow bo nogirup kon bansí, nodapot in butá naonda bo mobotak sin rame tatua.

AYUB 20:5

ḷunganga in intau moraat tongábí motoyong, bo kasanangan in intau moraat tongá tokokiap?

YEREMIA 7:4

Dikabí mopirisaya kon intau mouboḷ inta moguman, ‘Kita in noaman, sin naa in Baḷoi Tuhan. Totuu kon naa in Baḷoi Tuhan!’

AMOS 6:3

Moiko in moguman kon singgai koboditoan in moonggotpa, táe oaidmu mita in tongábí mogintoyong kon koangoian in singgai koḻingáan tatua.

MIKHA 2:11

Koibog monimu in nabi inta moibog monguboḷ bo mongakaḷ poḷat monoḷanow kon moiko in mokouḻíbí kon anggur bo oinumon inta mokoḷoḷangu inta mobayong totok.”

YOSUA 6:20

Bo imang mita nogirupdon kon torompetnea. Bo naonda in kinodongogan in intau mita in Israel in torompet tatua, mosia norogiow noropot totok, bo dinding in kotá in Yerikho norumbun. Bayongan in tontara in Israel baḷúdon noponik, bo sinumuot in kotá tatua bo nogagow.

YOSUA 6:5

Onda intua imang mita tatua musti mogirup kon torompetnea koonggoton. Naonda in kodongogan monimu in singognea inta moonggot tua, bayongan in tontara musti morogiow koropoton totok, dá dinding in kotá tatua in moumpagdon. Bo moiko komintan in baḷúdon tumuot kon kotá tatua.”

HAKIM MITA 15:14

Naonda in ki Simson dinia nodapot kon Lehi, intau mita in Pilistin noribatuk in nonontomu kon inia sindaḷan nonggiow kon inia. Bo indoianmai daḻídon in sia noropot sin kawasa i Tuhan. Tontogot mita inta pinotogot kon ḻimanea tatua binontowneadon mako natua naonda bo nomontow kon tontogot inta ain nopokak.

SAMUEL 1 4:6

Intau in Pilistin nokodongog doman kon giow tatua bo mosia in noguman, “Nongonu sin intau mita in Ibrani tatua in norogiowbí?” Táe naonda in kinotaauan monia kon Poti Dodandian i Tuhan aindon dinia kon pinononḷoḷaigan in intau in Ibrani,