SURAT I PAULUS KON JAMAAT RUM 7:6 - Alkitab Singog In Mongondow Masa In Tanaa

⁶ Táe tanaa in kita in diádon noitogot kon hukum in agama Yahudi. Kita ain bidon minatoi kon hukum inta koḻipod nongawasa kon i naton. Kita in diá bidon mobantung ná aid tungkuḷ intua, inta pinodudui kon hukum inta pinais. Táe tanaa kita in mobantungbí podudui in aid mobagu inta sinundú in Roho i Allah kon i naton.

SURAT I PAULUS KON JAMAAT RUM 7:6 Iomraidhean Croise

YEHEZKIEL 11:19

Mosia in ogoian-Kudon in gina mobagu bo dimukud mobagu. Gina monia inta ná kotogat in batu in gamáan-Ku bo toḻiuan-Ku in gina inta motoindudui kon i-Nakó.

YEHEZKIEL 36:26

Dá moiko in ogoian-Kudon in gina bo raian inta mobagu. Ginamu inta ná kotogat in batu tua in baḷuian-Ku in gina inta motoindudui.

SURAT I PAULUS KON JAMAAT RUM 1:9

Umuranku kotoropan in moiko aka mosambayang in akuoi. Kinotaauanbí i Allah kon onu in siningogku tua in totuubí. Sia tua in ki Allah inta oaidan-Nea in inaidanku takin gina motuḻid, oaidan tatua in mopoyaput in Habar Mopia soaḷ ki Adí-Nea.

SURAT I PAULUS KON JAMAAT RUM 12:2

Donaai in moiko dumudui kon ibog in dunia naa. Pomayádon mako in ki Allah in monoimbagu kon i monimu, sinbá mobaḷui in moiko. Sahingga in kotaauandon monimu onu kinoibog i Allah, tuata inta mopia bo inta mokosanang kon gina-Nea bo inta mosompurna.

SURAT I PAULUS KON JAMAAT RUM 6:11

Natua doman in moiko, musti monganggap minatoidon kon bonu in dosa bo mobiagdon motompia takin i Allah inta pinongin i Kristus Yesus.

SURAT I PAULUS KON JAMAAT RUM 6:19

Popisí in moiko nobodokpa, dá akuoi in moguman kon contoh tanaa sinbá mogampang komangaḻean monimu. Tungkuḷ intua moiko noposarakan in bayongan awak monimu saḷaku ata in mogaid kon soaḷ mita inta mongoromú bo moraat sin makusud doman moraat. Tuamai in natua doman in masai naa, posarakaidon in bayongan awakmu saḷaku ata mogaid kon inta kinoibog i Allah sin makusud mopia i Allah.

SURAT I PAULUS KON JAMAAT RUM 6:2

Tantú diábí natua! Dosa in diá bidon nongawasa kon i naton, manangka intua kita diá bidon in motaau aka dongka umuran mogaid kon dosa?

SURAT I PAULUS KON JAMAAT RUM 6:22

Táe tanaa in moiko ain pinilatan nongkon kawasa in dosa bo nobaḻídon mogogaid mita kon oaidan i Allah. Kauntungannea kon tua moiko in nobiagdon umuran kon i Allah, bo bungainea kon tua in mokouḻí in moiko kon kobiagan inta mopia bo mononoi.

SURAT I PAULUS KON JAMAAT RUM 6:4

Wakutu in kita binaptis, kita in iḷobongdon takin i Kristus bo minatoidon noyotakin-Nea, sinbá ná doman ki Kristus inta ain biniag nongkon kinopatoian-Nea takin kamuliaan i Amá, yo natua doman in kita mokoalami doman kon kobiagan mobagu.

SURAT I PAULUS KON JAMAAT RUM 7:1

Utat mita! Moiko komintandon nonotaau kon hukum. Dá kinotaauan bidon monimu kon intau in kotugatanbí in hukum kon dodai in mobiagpa in sia.

SURAT I PAULUS KON JAMAAT RUM 7:2

Umpamanea, bobay inta kobuḷoi noyotogotpabí in hukum takin i buḷoinea kon wakutu in ki buḷoinea nobiagpa. Táe aka ki buḷoinea bo matoidon, dá noipilat bidon in sia nongkon hukum inta nopoyotogot kon i nayadua motonibuḷoi tua.

SURAT I PAULUS KON JAMAAT RUM 7:4

Natua domandon in moiko utatku mita. Kon hukum agama in Yahudi, moiko ain minatoi, sin moiko ain sinobatú takin awak i Kristus bo nobaḻídon kapunyaan-Nea inta ain biniag bui nongkon kinopatoian. Sia biniag nongkon popatoi sinbá kita in mobaragunadon kon i Allah kon dodai in mobiagpa.

KORINTUS 2 3:6

Bo Siabí doman tua in nobogoi in komampuan kon inami nobaḻí mogogaid mita kon oaidan i Allah kon tobatú dodandian nobagu; dodandian inta noyotogot in Roho i Allah, táe deemanbí kon hukum inta pinais. Sin hukum inta pinais tua in modiabí kon popatoi, táe aka Roho i Allah yo mobogoibí in kobiagan.

KORINTUS 2 5:17

Intau inta notobatúdon i Kristus in totu-totuu bidon sinoimbagu. Inta ain nokoyongan in diá bidon, komintan bidon sinoimbagu.

GALATIA 3:13

Táe ki Kristus ain nomilat kon i naton nongkon kutukan in hukum i Musa tatua. Sia nopomayádon mako in awak-Nea tontaní kinutuk sinbá kita in mopilat kon kutukan. Sin kon Buk Motusi ain pinais, “Kinutukdon in intau inta minatoi binambé kon kayu pinoyotaḻempang.”

GALATIA 6:15

Sinunat ande diá sinunat, tua in diábí moponting, sin mobaḻíbí intau inta mobiag mobagu takin i Allah in moponti-ponting.

EPESUS 4:24

Bo kobiagdon in moiko saḷaku intau mobagu inta pinomia podudui in ibog i Allah, inta moibog dinumudui kon tabiat moitutui, motuḻid bo motusi.

PILIPI 3:3

Bokaka kitabí naa in intau mita inta notarima kon sunat nongkon i Allah. Kitabí naa in intau inta ain dinia i Allah sin mosumba kon i-Nia, bo umuran mosukur mako in kita sin notobatúdon i Kristus Yesus. Diá bidon in kita moitogot mako kon upacara inta sipatnea in tongábí samantara.

KOLOSE 3:10

Bo tanaa moiko inogoiandon in kobiagan inta mobagu. Moiko nion in nobaḻí bidon intau nobagu, inta koyogot toimbaguon i Allah inta nopomia kon i monimu podudui in batangan-Nea tontaní. Makusudnea bá totu-totuudon kotaauan monimu in ki Allah.