SURAT I PAULUS KON JAMAAT RUM 6:12 - Alkitab Singog In Mongondow Masa In Tanaa

¹² Dika pomayá mako in kobiaganmu inta diá mononoi kon dunia naa in kawasaan dosa, sinbá diádon iko dumudui kon ibognea inta moraat.

SURAT I PAULUS KON JAMAAT RUM 6:12 Iomraidhean Croise

KINOBAḺIAN 4:7

Aka iko mogaid kon inta mopia, yo pasti pogotmu in diábí morongut mako; táe aka iko mogaid kon inta moraat, dá dosa in dongka mogoḷat mako sin tumuot kon ginamu. Dosa in moibog mongawasa kon inimu, táe musti ḷawangonmu in sia.”

MAZMUR 119:133

Irigonaidon in ḷampangku podudui in dandi-Mu, dikabí pomayá mako kaasí in akuoi in kawasaan in moraat.

MAZMUR 19:13

Diábí in mokomangaḻe kon kinoḷaḻeannea; Tuhan, poḷuatdon in akuoi nongkon taḷá inta noibuni.

IMAMAT 13:40

Aka tobatú ḷoḷaki nobaḻídon noḷogat kon dotá in tuminea ande kon dotá in munanea, dá ḷogatnea tatua in diábí mokopopisí kon inia nonajis.

PINOGIAPAN 33:55

Táe aka intau kon ḻipú tatua bo diá poguntunon monimu, yo intau mita inta umuran nogutun kon tua in mopororigamaidon kon i monimu naonda bo bungaion kon mata monimu andeka naonda bo dugi kon sioḷmu. Bo kon singgai moiduduimai mosiadon tua in monubu kon i monimu.

SURAT I PAULUS KON JAMAAT RUM 13:14

Pomayádon mako bá ki Tuhan Yesus Kristus in monantú kon onu in musti aidan monimu. Bo dika dumudui kon ibog in awak inta baradosa naa sin mopoorop in onu inta koibognea.

SURAT I PAULUS KON JAMAAT RUM 2:8

Táe intau inta tongá morai kon kopontingannea tontaní bo diá doman motoindudui kon i Allah, bo tongá doman umuran dumudui kon inta moraat, intau mita natua in kosakibí totok in gina i Allah.

SURAT I PAULUS KON JAMAAT RUM 5:21

Kita naa in mustibí matoi popisí in nogaid domandon kon dosa. Táe ki Allah in notabibí kon i naton bo nobogoi in daḷan kon i naton kon moyodame bui takin-Nea. Bo popisí in hubungan naton takin i Allah notompiadon bui, dá Sia in nobogoi domandon in kobiagan moitutui bo inta mononoi kon i naton inta pinongin i Yesus Kristus, ki Tuhan naton.

SURAT I PAULUS KON JAMAAT RUM 6:14

Dosa in diá bidon mongawasa kon i monimu, sin moiko in diádon nobiag kon bonu in kawasa in hukum agama in Yahudi, táe kon bonu bidon kawasa in totabi Allah.

SURAT I PAULUS KON JAMAAT RUM 6:16

Bá kotaauan monimu, kon aka moiko bo moposarakan in awakmu kon tobatú intau sin mogaid kon onu inta kinoibognea, yo moiko in mobaḻí bidon ata in intau inta dinuduian monimu tatua. Ata in dosa in modia kon i monimu mayá in popatoi, táe aka ata inta motoindudui kon i Allah yo tua in modiabí kon i monimu mayá in kobiagan.

SURAT I PAULUS KON JAMAAT RUM 8:11

Bo aka Roho i Allah inta ain nomiag bui kon i Kristus nongkon kinopatoian, bo nobiagdon kon ginamu, dá Sia inta ain nomiag bui kon i Kristus tua nongkon kinopatoian tatua, in momiagbí doman kon awakmu inta diá mononoi nion. Sia in mogaid kon tua takin Roho-Nea inta nobiag kon bonu in gina monimu.

SURAT I PAULUS KON JAMAAT RUM 8:13

Sin aka moiko bo mobiag dumudui kon ibog in awak naa, dá matoibí; táe aka moiko bo momaké in kawasa in Roho i Allah bo umuran monginggamá kon aid mita inta mokobaradosa, yo mobiagbí in moiko.

KORINTUS 2 4:11

Kon wakutu in mobiagpa, kami in umuran noyogintayow in popatoi sin nopotaau in habar soaḷ ki Yesus Kristus, sinbá kobobiag i Yesus moniata doman kon awak inta diá mononoi naa.

KORINTUS 2 5:4

Sin wakutu in kon baḷoipa ilo-ilow naa, kita tantú mogamui sin mobogat totok in roriga inta moiantug. Deemanbí igu-igumon mako kon bá matoidon in awak naton ilo-ilow naa, táe lantaranbí moibogdon mokorasa kon kobiagan inta kon soroga tua, sinbá kobiagandon in mongawasa kon awak naton inta ilo-ilow naa.

GALATIA 5:16

Nanaabí in makusudku: Kobiagdon in moiko podudui kon ibog in Roho i Allah, donaaibí moibog mobiag podudui ibog in intau.

GALATIA 5:24

Ki ine inta ain nobaḻí kapunyaan i Kristus Yesus, yo mosia tua ain doman noḷumbú kon tabiat in intau bo bayongan ibog in dunia naa.

EPESUS 2:3

Koḻipod, kita komintan in ná doman mosia tua; kita nobiag dinumudui doman kon tabiat in awak naton bo nogaid kon onu inta mokosanang kon awak bo raian naton. Wakutu intua kita naa in intaubí doman inta kinotugatan in torú i Allah, ná doman mosia tua.

EPESUS 4:22

Manangka intua taḷaaidon in aid monimu koḻipod inta dinumudui kon kobobiag koyongan inta ain pinoguyaat in bayongan ibog mokobaradosa.

ULANGAN 7:2

Aka ki Tuhan Allahmu moposarakan in bangusa mita tatua kon bonu in kawasamu bo moiko monaḷowdon kon i monia, ḻimodon in mosia komintan. Dika motabi kon i monia ande momia kon dodandian takin i monia.

TESALONIKA 1 4:5

Donaaibí dumudui kon ibog awak in batangan ná oaid in intau mita inta diá nonotaau kon i Allah.

TIMOTIUS 2 2:22

Tuamai in dika ná ibogpa in tayowmobiag mita, inta moibo-ibog in diá mopia, táe poramuji mobiag podudui kon inta kinoibog i Allah. Mokopotoindudui kon onu in sinundú i Tuhan, bo motabi kon tumpaḷa intau bo gina in umuran mosanang. Kobiagbí natua takin mosia inta umuran mokuani mokituḷung kon i Tuhan takin gina motuḻid.

TITUS 2:12

Totabi i Allah tatua in motundú kon i naton bá diádon tongá umuran dumudui kon ibog in dunia naa, táe tantúdon dumudui kon ibog i Allah. Kita in pinoangoi in dunia naa, dinidikbí sinbá motaau monahang kon ibog in awak, umuran motuḻid in gina bo umuran doman dumudui kon inta pinarenta i Allah.

TITUS 3:3

Sin koḻipod in kita tontaní in nobodokbí doman, diá noitutui bo diá motoindudui. Kita sinonggata in norupa-rupamai in ibog in awak naa ande in dunia naa; kita in noyobiag takin niat mita inta moraat, tantú mointoi bo mososaturuan.

PETRUS 1 1:14

Kotoinduduidon kon i Allah, bo donaaidon mobiag podudui in ibogmu koḻipod, wakutu i moiko diápa nonotaau kon i Allah.

PETRUS 1 2:11

Utat mita inta kinotabiku! Moiko nion in intaubí mokokiangoi bo momomaḷancong kon dunia naa. Akuoi in mononggina kon inimu, donaai tongá umuran dumudui kon ibog in awak naa inta umuran mobobayowan moḷawang kon jiwa.

YUDAS 1:16

Intau mita tatua in umuran mongunsingog bo mopotaḷá kon intau mita ibanea. Mosia in mobiag podudui in ibog monia inta baradosa naa. Mosia in mongonguman kon moḷantud soaḷ kaadaan monia tontaní, bo umuran umapid mako kon intau sinbá mokouḻí kon kauntungan.

YUDAS 1:18

Munadon pinotaau monia kon inimu, kon aka kodiug-kodiugdon in singgai pangabisan yo moiangoibí in intau mita inta moningkuḻe kon i monimu, mosia tuata in intau mita inta nobiag podudui in ibog monia inta baradosa naa.

HAKIM MITA 2:3

Dá, indongogai in tanaa! Diábí poguntunon-Ku in intau mita tanaa aka moiko moparang takin i monia. Mosia in mobaḻíbí musungmu mita, bo moiko in moibaaḷbí, modapot in moiko moiduduidon mosumba kon dewa mita monia.”