SURAT I PAULUS KON JAMAAT RUM 2:25 - Alkitab Singog In Mongondow Masa In Tanaa

²⁵ Aka iko bo motoindudui kon hukum in agama Yahudi, dá oyúonbí in mangaḻe in sunat tatua kon i monimu. Táe aka iko bo doí dumudui kon soaḷ mita inta pinarenta kon bonu in hukum tatua, yo totokbí in diá in mangaḻe in sunat tatua kon inimu.

SURAT I PAULUS KON JAMAAT RUM 2:25 Iomraidhean Croise

YEREMIA 4:4

Kadaiai in dandimu kon i-Nakó, Tuhanmu, bo awakmu in tongádon ogoi kon i-Nakó, ei intau mita in Yohuda bo Yerusalem. Aka diá, yo torú-Ku in tumagabdon bo momokak naonda bo tuḷú inta diábí kopiongan i inekabí. Tua komintan in moiumabí kon inimu popisí in aidmu mita inta moraat.”

OUMAN IN RASUL MITA 7:51

Nádomai tua in kinototogat in gina monimu nion. Totokbí in mororiga didikon kon bá motoindudui kon i Allah! Diábí indongogan monimu in singog i Allah! Moiko nion in naonda bo mogoguyang mita monimu; umuran diá mokidongog kon Roho i Allah.

SURAT I PAULUS KON JAMAAT RUM 2:13

Sin hubungan in intau takin i Allah in moyoguḻit bui, deemanbí popisí in intau tatua nonotaaudon kon hukum agama in Yahudi, táe popisíbí in sia nogaidon kon onu inta pinais kon bonu in hukum tatua.

SURAT I PAULUS KON JAMAAT RUM 2:23

Moiko in dumodia sin oyúon in hukum i Musa kon i monimu, táe nongonu sin moiko in moningkuḻebí kon i Allah takin oaid doí dumudui kon hukum-Nea mita.

SURAT I PAULUS KON JAMAAT RUM 2:26

Aka intau deeman Yahudi inta diá sinunat dinumudui kon hukum agama in Yahudi, yo sia in inanggap bidon i Allah naonda bo intau inta ain sinunat?

SURAT I PAULUS KON JAMAAT RUM 2:27

Bo intau inta diá sinunat tua in mopotaḷá kon i monimu intau in Yahudi, sin oyúondon in hukum agama monimu bo sinunat domandon in moiko, táe moiko tontaní in doíbí dumudui kon hukum tatua. Mosia tua in diábí sinunat táe totu-totuubí dinumudui kon hukum in agama Yahudi.

SURAT I PAULUS KON JAMAAT RUM 2:28

Sin aka totu-totuu intau in Yahudi; yo deemanbí tongá tangoinea intau in Yahudi, ná doman tua intau inta ain totu-totuu sinunat deemanbí tongá kai intau sinunatdon in sia.

KORINTUS 1 7:19

Sin sinunat andeka diá, diábí moponting intua. Dumuduibí kon atorang mita i Allah in moponting.

GALATIA 6:13

Sin mociapa inta nokisunat diábí doman dinumudui kon hukum i Musa. Táe ibogon monia in moiko musti mokisunat, sinbá mosia in motaau dumodia, sin moiko in noibog dinumudui kon atorang tatua.

GALATIA 6:15

Sinunat ande diá sinunat, tua in diábí moponting, sin mobaḻíbí intau inta mobiag mobagu takin i Allah in moponti-ponting.

ULANGAN 30:6

Moiko bo buímu in ogoiandon in gina inta motoindudui, dá moiko in motabidon kon i Tuhan Allahmu takin ḻimbatú in ginamu sinbá umurandon mogutun kon butá tatua.