SURAT I PAULUS KON JAMAAT RUM 2:1 - Alkitab Singog In Mongondow Masa In Tanaa

¹ Manangka intua, utat mita ki inebí in iko nion sin mohakim kon intau ibanea? Iko tontaní in kotaḷábí doman! Aka iko bo mopotaḷá kon intau ibanea, bokaka tumpaḷa nogaid kon ná inta inaidan monia tua, dá in mangaḻenea kon tua, ikodon tontaní in nopoḷabú in hukuman kon inimu tontaní.

SURAT I PAULUS KON JAMAAT RUM 2:1 Iomraidhean Croise

LUKAS 12:14

Táe ki Yesus noguman kon inia, “Utat, ki ine in nopobaḻí kon i-Nakó hakim andeka mononigad kon i monimu mosilai kon kapunyaan inta sinaḷaan in guyanga monimu kon i monimu?”

LUKAS 19:22

Dá datu tatua in noguman kon bobantungnea tatua, ‘Ei bobantung inta moraat! Poduduidon in singogmu mita tatua dá hukumonku in iko. Kinotaa-taaumubí mako kon akuoi naa intaubí inta totok motogat bo inta moibog mogamá kon onu inta deeman kapunyaanku bo inta moibog doman mokoyut kon inta deeman pinomuḷaku.

LUKAS 6:37

“Donaai in moiko mohakim kon intau, sinbá diá doman hakimon i Allah in moiko. Bo donaai doman mohukum kon intau. Sinbá diá doman hukumon i Allah in moiko. Ampungaibí in intau inta kotaḷá kon i monimu, sinbá ampungan doman i Allah in taḷá monimu.

SURAT I PAULUS KON JAMAAT RUM 14:22

Onu inta pinirisaya i utat, yo tongádon tua in aidan kon tayowon i Allah sin kopontinganmu tontaní. Mosanangdon totok in mosia inta diá morai kon noitaḷá kon onu inta inanggapnea noitutui.

SURAT I PAULUS KON JAMAAT RUM 2:2

Kinotaauan bidon naton kon aka ki Allah in mopoḷabú in hukuman kon intau mita inta nogaid kon soaḷ mita ná tatua, yo noitutuibí in kaputusan i Allah tatua.

SURAT I PAULUS KON JAMAAT RUM 2:3

Táe moiko in nomia doman kon soaḷ mita inta pinonapud monimu kon intau ibanea! Degá iraimai monimu, moiko nion in diábí kotugatan in hukuman i Allah?

SURAT I PAULUS KON JAMAAT RUM 3:9

Dá aka natua, yo degá kita naa in noiḻiu kon intau mita inta deeman Yahudi tua? Diábí in kita noiḻiu! Aindon pinogumanku muna, kon intau in Yahudi andeka bangusa ibanea, komintan bidon kinawasa in dosa.

SURAT I PAULUS KON JAMAAT RUM 9:20

Táe, Utat! Iko in tongábí intau ilo-ilow, bo iko in diábí mokobaḻí momayow kon i Allah! Pot in bungang motaau degá in moḻibó kon intau inta nomia kon inia, “Nongonu sin inaidanmubí nanaa in akuoi?”

KORINTUS 1 4:5

Popisí in deemanpabí wakutunea dá dika ḻimika-ḻikat in mohakim kon intau, kotaḷá andeka diá. Oḷatdon dapot moiangoi in ki Tuhan. Bambí Sia in mobuká kon onu inta nongoibuni kon sindip bo mobuká kon onu inta kon bonu in gina mita in intau. Bain kon wakutu in tuata bo duíon i Allah in intau mita podudui in oaid mita monia.

KORINTUS 1 7:16

Sin moiko utat saḷaku buḷoi bobay – inta ain nopirisaya kon i Kristus ki Tuhan naton – naondabí in kototaau monimu, kon diá mokosaḷamat in iko kon i buḷoimu ḷoḷaki? Natua doman in iko buḷoi ḷoḷaki inta nopirisayadon kon i Yesus, naondabí in kototaau monimu kon iko in diá mokosaḷamat kon i buḷoimu bobay?

YAKOBUS 2:20

Mobodok totok in moiko! Degá paraḷupa poontong kon i monimu kon diábí in mangaḻenea aka pirisaya diá poyotakinon in oaid?

YAKOBUS 4:11

Utatku mita, donaai in moiko mosiponapudan ande mosipotaḷáan. Intau inta moponapud ande mopotaḷá kon i utatnea inta tumpaḷa Keresten, yo intau tatua in moningkuḻe bo mopotaḷá in hukum i Allah. Bo aka moiko in mopotaḷá kon hukum i Allah, mangaḻenea kon tua moiko in diá dinumudui kon hukum mita tatua, táe moiko in mobaḻídon hakimnea.