SURAT I PAULUS KON JAMAAT RUM 12:8 - Alkitab Singog In Mongondow Masa In Tanaa

⁸ Intau inta nokouḻí kon totabi mononggina kon intau ibanea, yo musti in sia totu-totuu mononggina kon intau ibanea. Ki ine in mosila-silai mako kon yagi-yagi, yo musti totu-totuu aidannea intua. Intau inta nokouḻí kon totabi mobaḻí itoi, yo musti in sia mobaḻí itoi totu-totuu. Intau inta nokouḻí kon totabi moponiata in tabi kon tumpaḷa intau, yo mustibí aidannea intua takin sanang in gina.

SURAT I PAULUS KON JAMAAT RUM 12:8 Iomraidhean Croise

KINOBAḺIAN 18:19

Sia ain piniḻí-Ku sinbá motundú kon i adínea mita bo kon buínea sinbá motoindudui kon i-Nakó bo mogaid kon onu inta mopia bo moadil. Aka soaḷ tatua aidan monia, yo bayongan in dandi-Ku kon i Abraham in intompodan-Ku.”

MAZMUR 112:9

Sia in mosila-silaibí mako kon kapunyaannea, bo mobogoi in oogoi kon intau nobogá; sia in umuranbí mogaid kon inta mopia, tuamai in sia nongawasa bo ihoromat.

MAZMUR 37:21

Intau moraat in moḷuan bo diá mopobui kon onu inta iḷuanannea, táe intau mopia in mobogoibí takin pia in gina.

AMSAL 22:9

Intau inta mopia in gina barakatan i Tuhan, tuamai mosilai in sia kon rijiki kon intau inta kinodaitan.

MOHOHUTUBA 11:6

Ponabudon in bibitmu kon dodai in doḷo-doḷom bo dika mogogai in doḷom. Sin diábí kotaauan naton mongo bibit táonda in mopia in kobobiagnea. Dika-dika bo tumpaḷabí in sia mobiag motompia.

MOHOHUTUBA 9:10

Aidaibí in bayongan oaidanmu podoyon kon bayongan ropotmu. Sin moiangoibí in kodaitan raian andeka oaidan. Diábí in ilimu andeka pandoi kon dunia in intau minatoi. Bo kon tuata in bayáanmu.

YESAYA 32:5

Intau bodok in diá bidon anggapon intau ihoromat, bo intau mouboḷ in diá bidon tangoion motuḻid.

YESAYA 32:8

Táe intau inta motuḻid in ginanea monomayá kon soaḷ mita inta mopia bo mogaid kon inta mopia doman.

YESAYA 64:5

Iko in motomu kon intau inta motuḻid in gina bo inta nobiag podudui in ibog-Mu iko in sinumorú kon inami, táe kami in tantúbí nogaid kon dosa totuu kon nongkon dungkuḷpabímai kami in kotaḷá.

MATIUS 25:40

Datu tatua in motubag kon i monia, ‘Bá poguman-Kudon kon i monimu: onu inta aindon inaidan monimu kon i utat-Ku mita inta totok in bogá tanaa, yo tua in notongkaibí in pinogaid monimu kon i-Nakó!’

OUMAN IN RASUL MITA 11:23

Naonda in noiyaput kon tua in ki Barnabas, bo nokoontong kon naonda in Allah nomarakat kon i monia, nopia totok in ginanea. Bo sia in nopoigum domandon kon bá mosia in totu-totuudon mopirisaya bo motoindudui kon i Tuhan.

OUMAN IN RASUL MITA 13:12

Naonda in inontongdon i gubernur in onu inta nobaḻí tatua, nopirisayadon totok in sia kon i Yesus; sin nopia totok in ginanea kon totundú mita soaḷ ki Tuhan.

OUMAN IN RASUL MITA 13:15

Naonda in nopaḷutdon binaca in Hukum i Musa bo Buk in Nabi mita, itoi mita in baḷoi pososambayangan tatua nopotabá in intau minayá noḻibó kon i Paulus bo kon yobayatnea mita. Nanaa in ḷoḻibó monia tua, “Utat mita, aka oyúonbí in koyow inta mokorigon kon pirisaya bo mokohibur kon bayongan umat i Allah tanaa mita, yo pogumandon.”

OUMAN IN RASUL MITA 15:32

Ki Yudas bo ki Silas inta tumpaḷa nabi tua, noonggot in nongongumanmai takin utat mita inta mopirisaya kon Antiokhia tatua sin nononggina bá diá moondok in mosia.

OUMAN IN RASUL MITA 20:2

Kon Makedonia, sia in minaya-mayá mako in ḻipu-ḻipúannea bo nokipodungkuḷ kon intau mita inta nopirisaya kon i Yesus bo poḷat nononggina kon i monia sinbá umuran mopirisaya. Onda intua minayá in Yunani.

OUMAN IN RASUL MITA 20:28

Manangka intua yo mokopopiadon in moiko bo umuran moḷukad kon awak monimu bo poḷat doman ḷukadai in bayongan umat i Allah inta ain pinosarakan i Allah kon i monimu sinbá ḷukadan. Sin moiko nion ain sinantú in Roho i Allah mobaḻí moḷoḷukad bo mononompia kon umat i Allah inta ain sinobut-Nea in dugú i Adí-Nea tontaní.

OUMAN IN RASUL MITA 4:36

Natua doman in ki Yusup. Sia in nopotaḷui doman in butánea, bo doit boḻinea tatua dinianea inogoinea kon rasuḷ mita. Ki Yusup naa in intau tobatú inta buí in Lewi nongkon Siprus; rasuḷ mita modonoimai kon inia ki Barnabas (inta mangaḻenea, Mohohibur).

SURAT I PAULUS KON JAMAAT RUM 12:13

Tuḷungai bo ogoiai onu in paraḷu in intau mita Keresten ibanea, bo tomubí takin pia in gina in utat mita Keresten umpakabí diá nogogintaauan monimu in mosia. Tarima doman takin sanang in gina in mosia kon baḷoimu.

SURAT I PAULUS KON JAMAAT RUM 13:6

Tuabí doman in nobaḻí dodoyonan kon nongonu sin moiko in moguboḻibí kon pajak, lantaranbí pomarenta tua in pogawai i Allah inta nopobayá in oaidan nongkon i Allah.

KORINTUS 1 12:28

Natua doman in kon jamaat. Tampat in bayongan intau ain bidon sinantú i Allah. Muna in rasul mita; nogindua in nabi mita, nogintoḷu in guru mita bo intau mita inta nogaid kon mokoherang, onda intua intau mita inta inogoian in totabi mongundam bo motuḷung kon intau ande inta mobaḻí duduianmai, ande mosia inta inogoian totabi mosingog kon mokoherang.

KORINTUS 1 14:3

Táe aka intau inta mopoyaput in habar nongkon i Allah, yo tua in mopoyaputbí in habar kon intau; sin moginrigon kon pirisaya monia, mobogoi in ropot bo mohibur kon i monia.

KORINTUS 2 1:12

Noḷunganga totok in gina nami, sin noyakin bidon in kami kon kobobiag nami kon dunia naa – apapa doman hubungan nami bo i monimu – tantúbí nami sinompia takin gina motuḻid bo nobayag. Tua komintan in inaidan nami, deemanbí pinodoyon kon kapandoian raian in intau, táe pinodoyonbí kon ropot inta pinonotabi i Allah.

KORINTUS 2 11:3

Táe moḻia-ḻiawpa in ginaku sin dika-dika bo moitabat in raian monimu bo diádon motoindudui kon i Kristus, naonda bo ki Hawa koḻipod inta kinoakaḷan in uḷag.

KORINTUS 2 8:12

Aka gina monimu bo motuḻidbí in mobogoi, dá tarimaanbí i Allah onu inta inogoi monimu tua, asaḷ bo onu inta inogoi monimu tua, pinodoyon kon onu inta oyúon kon i monimu, deemanbí pinodoyon kon onu inta diá in kon i monimu.

KORINTUS 2 9:11

Aka natua yo moiko in mobaḻí bidon mooyúon kon bayongan in yagi-yagi, sahingga moiko tantú mobogoi takin pia in gina. Bo onu inta inogoi monimu inta sinila-silaidon mako nami tua, nobaḻí dodoyonan kon mobayong totok intau in mopoyaput in sukur moantó kon i Allah.

KORINTUS 2 9:13

Bo nongkon oaid mopia inta ain pinoontong monimu tua, mobayong intau in Keresten kon Yudea modayow kon i Allah popisí ontongon monia in kototoindudui monimu kon Habar Mopia soaḷ ki Kristus inta duduiandonmai monimu tua. Bo modayow doman in mosia kon i Allah, sin popisí in kopopia in gina monimu moibog mosila-silai mako kon i monia bo kon intau mita ibanea, onu in oyúon kon inimu.

KORINTUS 2 9:7

Táe poigumonku mako moiko mobogoibí takin pia in gina, diá tongá pakisa, sin intaubí inta mobogoi takin pia in gina in kotabi i Allah.

EPESUS 6:5

Utatku mita inta nobaḻí ata! Duduiaibí in onu inta pinoki aid i tuangmu inta kon dunia naa. Aidai intua takin porasaan horomat, motoindudui, bo gina inta totu-totuu, naonda bo pogogaid monimu kon onu inta pinoki aid i Kristus tontaní.

ULANGAN 15:14

Takin sanang in gina ogoiaidon in sia nongkon onu inta inogoi i Tuhan Allahmu kon inimu, tuata in bembé domba, gandum bo anggur.

ULANGAN 16:11

Kon tayowon i Tuhan Allahmu, kon tampat inta piniḻí-Nea, moiko musti moposanang in gina moyotakin i adímu mita, bobantungmu mita bo intau in Lewi, intau ango-angoi, adí uno-unon bo intau mita inta dongkadon boba-bobay inta nogutun kon kotámu mita.

KOLOSE 3:22

Utat mita inta nobaḻí ata! Kon bayongan in rupa-rupa duduiaibí onu in pokiaid i tuangmu kon dunia naa. Deemanbí dumudui aka koontonganpa mako monia sinbá dayowon in moiko. Táe duduiaibí in mosia takin gina motuḻid lantaran horomatmu kon i Tuhan.

TESALONIKA 1 2:3

Totundú nami in noitutuibí. Deemanbí makusud inta diá mopia andeka monombodok.

TESALONIKA 1 2:8

Natua in kaadaan nami. Popisí in tabi nami totok in moḷoben kon i monimu, dá nobayagbí in gina nami in mobogoi kon i monimu. Naaibí in tongá Habar Mopia nongkon i Allah, nodapotbí in kobiagan nami yo ogoi nami potaru

TIMOTIUS 1 4:13

Samantara in akuoi diápa moiangoi, dá mokoporajingdon in mobaca kon buk mita motusi sinbá motaau in iko mononggina bo motundú kon bayongan intau inta mopirisaya.

TIMOTIUS 1 5:17

Itoi mita in jamaat inta nopobayá in oaidannea notompia, patusbí in sia ogoian in ponghargaan kodua noguntuḷ in kopianea. Torutama mosia inta morajing totok in motundú bo mopoyaput in Habar Mopia.

TIMOTIUS 1 6:18

Ponorop domandon kon i monia sinbá mosia in mopoontong in aid inta mopia. Kobayongdon in mogaid kon inta mopia, mokopopia kon gina bo moibog mobogoi.

IBRANI 10:25

Kita in musti umuran moyosipun moyotakin bo umuran mosambayang. Donaai mokopomaḷat ná intau ibanea. Mustibí doman umuran in kita mositongginaan, sin kinotaauan bidon naton kon diá bidon moonggot bo mamangoi bui in ki Tuhan.

IBRANI 13:17

Duduiaibí onu in pinarenta in itoi mita monimu bo kodu-kodudui doman kon i monia. Sin mosia in umuran monarukira mako kon kobiaganmu bo mustibí in mosia motanggung jawab kon i Allah. Aka moiko bo motoindudui kon i monia, dá mosanangbí in gina monia in mogaid, táe aka diá yo monakit in gina monia in mogaid, bo tua in diábí mobogoi in kauntungan kon i monimu.

IBRANI 13:22

Poigumonku kon i monimu utat mita, sinbá indongoganpa monimu in tongginaku mita naa takin gina mosanang, sin nopoḷokbí in suratku tanaa.

IBRANI 13:24

Poyaputpa in salamku kon bayongan in itoi monimu bo bayongan in intau inta mopirisaya kon i Allah. Bo tarima domandon in salam nongkon i utat mita naton kon butá in Italia.

IBRANI 13:7

Dikabí koḻiongan monimu in itoi mita monimu inta mopoyaput in koyow i Allah kon i monimu. Tarukirabí naonda in kobobiag monia bo naonda in kopopatoi monia, bo duduiai in kopopirisaya monia.