SURAT I PAULUS KON JAMAAT RUM 12:3 - Alkitab Singog In Mongondow Masa In Tanaa

³ Ki Allah in nobogoidon in totabi-Nea kon i-Nakó. Manangka intua utat mita akuoi in mononggina kon i monimu nanaa: Donaaibí in moiko morasa kon lebedon moḷantud nongkon kaadaanmu sabanarnea. Táe naa in aidai: mokopoompá kon raian bo nilaidon in kaadaan monimu tontaní. Nilai in kaadaan monimu tontaní podudui in komampuan inta inogoi i Allah kon inia, sin sia in mopirisaya kon i Yesus.

SURAT I PAULUS KON JAMAAT RUM 12:3 Iomraidhean Croise

AMSAL 25:27

Diábí mopia in mokaan kon biluk moiḻiu, natua doman diábí mopia in moiḻiu in pododayow.

AMSAL 26:12

Intau inta totok in bodok in mopia-piabí kon intau inta tumangoi mopandoi.

MOHOHUTUBA 7:16

Dika moiḻiu in pia bo dika doman moiḻiu in pandoi. Onubí in mangaḻenea in simimpatoi?

MIKHA 6:8

Diá! Ki Tuhan in noponiatadon kon i naton onu inta mopia. Igum-Nea kon i naton in tongábí mopoaid in inta moadil, umuran moponiata in totabian, bo takin ompá in gina mobiag motobatú takin i Allah naton.

LUKAS 18:11

Intau in Parisi tatua in sinimindog sinumontaní bo nosambayang, kon bonu in ginanea nanaa, ‘O, Allah, akuoi in mopoyaput in sukur kon ini-Mu, sin akuoi in diá ná intau ibanea modunia, diá moadil, moibog monuaḻing, bo diá kototabi kon tumpaḷa intau. Bo akuoi in diá doman ná intau mononagi kon pajak tatua.

YOHANES 3:34

Sin ki ine in pinotabá i Allah, dá siabí tua in mopoyaput in pirman i Allah, sin sia in kinawasa bidon in Roho i Allah.

SURAT I PAULUS KON JAMAAT RUM 1:5

Bo pinongin i-Nia doman tua ki Allah in nobogoi in totabi kon i-Nakó nobaḻí rasul, sin mopotutui in daḷan kon bayongan intau sinbá mopirisaya bo motoindudui kon i-Nia.

SURAT I PAULUS KON JAMAAT RUM 11:20

Totuubí intua. Táe mosia in iḷumbú sin diá mopirisaya, bo Moiko in sinarima sin mopirisaya. Dá tuamai in dikabí dumodia in Moiko sin sinarimadon; Moiko in mustibí motoguondok.

SURAT I PAULUS KON JAMAAT RUM 11:25

Utat mita! Haraponku mako moiko in diá monganggap kon ain nonotaau kon bayongan in yagi-yagi. Sin oyúon in soaḷ inta kinoibog i Allah, táe diápa kinotaauan in intau. Bo ibogonku in kotaauan monimu intua; nanaa: tongobotak intau in Yahudi mokopotogat kon gina, táe cara monia tua in tongábí modapot in motompodon in kobayong in intau inta deeman Yahudi in mamangoi kon i Allah.

SURAT I PAULUS KON JAMAAT RUM 12:16

Moiko in musti mobiag mototabian tobatú bo tobatú. Donaai morai kon soaḷ mita inta moḷantud. Táe raibí in soaḷ mita inta komampuan aidan. Dikabí tumekeng mopandoi in iko.

KORINTUS 1 15:10

Tongá sinotabipabí i Allah, dá oyúonpa komangoi in tanaa. Bo totabi i Allah kon inakó in diábí inta diá in mangaḻenea. Sin akuoibí in moraji-morajing kon sigad in rasul mita ibanea. Táe sabanarnea in deemanbí tongá uḷatku tontaní; táe nongkon i Allahbí inta ain nonotabi kon inakó bo siabí doman inta ain nogaid noyotakinku.

KORINTUS 1 3:10

Lantaran kapandoian inta inogoi i Allah, dá akuoi naonda bo intau inta nonotaaudon totok kon pogogaid kon bangunan tatua. Munadon nogaid kon pondasi sin popoḻitúan in bangunan tatua, bo intau ibanea in mamangoi moposindog in bangunan kon pondasi tatua. Pomuḷoi intau in mustibí monarukira muna mongo naonda in mopoḻitú in bangunan kon pondasi tatua.

KORINTUS 1 7:17

Naa in atorang inta pinobayáku kon bayongan jamaat: Pomuḷoi in intau musti mobiag tumompia podudui kon inta kinoibog i Allah, ná inta ain sinantú-Nea wakutu in nogoiní kon i monimu kon bá mopirisayadon kon i-Nia.

KORINTUS 2 10:13

Kami in doíbí natua. Aka kami bo dumui-duí, yo doíbí moiḻiu kon onu inta ain sinantú i Allah kon i nami. Kami in mogaid tongábí komangoi in batas inta ain sinantú i Allah. Bo moiko in noibonubí kon batas tatua.

KORINTUS 2 12:13

Sin kon soaḷbí degá taonda moiko nion in pinotontumi, aka poyobandingonmai in jamaat mita ibanea? Tongábí koḻikud in soaḷ mita tanaa: akuoi in doí nokiposusamai nokiongkos kon i monimu. Akuoi in mopoigum maap aka tuabí in noitaḷá kon inakó!

KORINTUS 2 12:7

Táe sinbá diá dumodia in akuoi kon soaḷ mita inta ain pinoontong i Allah tatua, dá akuoi in inogoian in naonda bo tobatú panyaki kon bonu in awakku inta nobaḻí alat in Ibilis. Panyaki tatua inogoi pinohukum kon inakó sinbá diá dumodia in akuoi.

GALATIA 6:3

Aka tobatú intau bo nosangka kon sia tua intau moponting, bokaka diábí, yo sia in nonguboḷdon kon inia tontaní.

EPESUS 3:2

Ain bidon dinongog monimu, kon ki Allah in lantaran kopopia in gina-Nea, dá inogoian-Neadon in oaidan tanaa in akuoi sin kopontingan monimu.

EPESUS 3:4

bo aka kobacaandon monimu intua, yo komangaḻeandon monimu onu inta noibunipa soaḷ ki Kristus, ná kinomomangaḻeku kon tua.)

EPESUS 4:16

Kon bonu in pimpinan-Nea bayongan in anggota in awak tatua nopipid notompia noyotondoḷ in ugat bo buk mita in tuḷan. Bo aka kon batúan in anggota mita tatua in mogaid podudui in oaidannea dá bayongan awak in mobiagbí moguyang bo moropot bo kototabi.

PILIPI 2:13

Sin ki Allahbí in mopogonú kon ginamu sinbá moibog bo mokosanggup moposanang in gina i Allah in moiko.

KOLOSE 1:29

Sinbá koyaputanku intua, dá tuamai akuoi in moramuji totok in mogaid. Akuoi in moramuji takin bayongan ropot inta inogoi i Kristus kon inakó bo inta nongawasa doman kon inakó.

KOLOSE 2:13

Koḻipod, moiko ain minatoi secara rohani popisí in moiko binaradosa, bo popisí in moiko diá sinunat inta inaidan in intau. Táe tanaa ki Allah ain nomiag kon i monimu noyotakin i Kristus. Ki Allah ain nongampung kon bayongan dosa naton,

TIMOTIUS 1 1:14

Bo moḷobenbí totok in totabi i Tuhan naton kon i nakó. Inogoian-Nea in akuoi in pirisaya moḷoben bo tabi kon tumpaḷa intau inta ain notobatú i Kristus Yesus.

TIMOTIUS 1 2:15

Táe umpaka natua, bobay in posaḷamatonbí doman, sin mosia in mobogoi in buí. Asaḷ sia mokopoompá kon dodia bo mokopotantú doman kon pirisaya kon i Kristus bo umuran kototabian kon tumpaḷa intau, bo moposarakan doman in kobiagannea kon i Allah.

TIMOTIUS 1 2:9

Ná doman tua in bobay donaai poiḻiuon in pomomakeang, paké in ḷambung inta motoinut in ontongon intau, bo inta diá mokooyá. Buok in donaai tuḷa-tuḷapidonmai, donaai mopomaké in buḷawan, mutiara andeka ḷambung inta mongomahaḷ.

TITUS 2:12

Totabi i Allah tatua in motundú kon i naton bá diádon tongá umuran dumudui kon ibog in dunia naa, táe tantúdon dumudui kon ibog i Allah. Kita in pinoangoi in dunia naa, dinidikbí sinbá motaau monahang kon ibog in awak, umuran motuḻid in gina bo umuran doman dumudui kon inta pinarenta i Allah.

TITUS 2:2

Tongginaai in guyanga mita ḷoḷaki, sinbá mokotahang kon gina in mosia, mobijaksana bo mobiag saḷaku guyanga inta patus horomaton. Umuran doman kumadai kon totundú inta noitutui nongkon i Allah bo totu-totuu doman motabi bo mosabar aka koantugan in roriga.

TITUS 2:4

sinbá motaaudon mosia modidik kon bobay mita inta bagu pinobuḷoi bá motabi kon i buḷoi bo kon i adí monia,

TITUS 2:6

Ná doman tua, tongginaai in intau mita inta nongoguodpa sinbá mobalajar in mosia monahang kon gina kon bayongan in yagi-yagi.

YAKOBUS 4:6

Umpaka natua, totabi Allah inta inogoi kon i naton moropo-ropot nongkon ibog in roho naton tatua. Tuamai kon bonu in Buk motusi in pinais doman, “Ḷawangonbí i Allah in intau inta mokaḷakuang, táe Sia in motabibí kon intau inta moompá in dodia.”

PETRUS 1 1:13

Tuamai moiko in musti umuran mobasadia. Pokoingat bo totu-totuu poharap kon barakat inta bain ogoi kon i monimu kon wakutu in ki Yesus Kristus mamangoi bui.

PETRUS 1 4:11

Intau inta mopoyaput in habar, sia mustibí mopoyaput in habar nongkon i Allah, intau inta mobantung kon intau ibanea, mustibí pakéonnea in ropot inta nongkon i Allah, sinbá kon bayongan in yagi-yagi ki Allah in dayowon pongin i Yesus Kristus. Sia tua in kitogi kamuliaan bo kawasa inta mononoi. Amin.

PETRUS 1 4:7

Kopaḷutan in yagi-yagi motoyongdon. Tuamai ḷukadaidon kopira in awak monimu bo umuran mokopoonow kon raian sinbá moiko in motaau mosambayang.

PETRUS 1 5:5

Ná doman tua, utatku mita inta nongomudapa, mokopotoindudui kon guyanga mita. Moiko in musti mokopoompá kon dodia bo moibog doman mosibantungan sin kon Buk Motusi ain pinais nanaa: “Ki Allah in mohukum kon intau inta mokaḷakuang, táe motabibí kon intau inta moompá in dodia.”

PETRUS 1 5:8

Mokopoingatdon bo umuran pobasadia in moiko! Sin Ibilis inta saturumu in maya-mayá mako naonda bo singa inta sindaḷan moganggor motayak kon onu inta motaaunea kaanon.

YOHANES 3 1:9

Akuoi ain nokidia in surat kon jamaat umpaka tongá nopoḷok, táe ki Diotrepes inta moibog mobaḻí itoi kon bonu in jamaat, doí dumudui kon onu inta pinogumanku.