PILIPI 4:3 - Alkitab Singog In Mongondow Masa In Tanaa

³ Bo poigumonku kon i monimu Sunsugos, yobayatku inta totok in mosatia, tuḷungai in mosia, sin mosia noramujidon totok in nogaid takinku nopotaau in Habar Mopia inta nongkon i Allah; mosia tua naonda bo tai Klemen bo bayongan in intau inta nogaid noyotakinku. Tangoi monia tua in pinaisdon kon bonu in Buk Intau Nobiag.

PILIPI 4:3 Iomraidhean Croise

MAZMUR 69:28

Biódon mako in taḷá monia modugangdon mobayong; dikabí pobanaron in mosia.

IḶUAIAN 32:32

Akuoi mopoigum totok sinbá ki Tuhan moibogpa mongampung kon dosa monia; aka diá dá popataidon in tangoiku kon bonu in buk intau mita nobiag.”

YESAYA 4:3

Bayongan in intau inta kinotaḷáan kon Yerusalem, intau mita inta piniḻí i Allah sin posaḷamaton, tangoidon motusi.

YEHEZKIEL 13:9

Akuoi in mohukumbí kon i monimu, ei nabi mita inta nopotaau kon toḷanow mita uboḷ bo norai kon oontongon mita! Moiko in diá bidon motaau in dumudui mobogoi in kotantúan kon bonu in ponisigan in umat-Ku. Tangoimu mita in ginaresandon kon bonu in tangoi mita in inanakan Israel, bo moiko in diá bidon mobui mangoi kon butámu. Dá kotaauandon monimu kon Akuoibí in ki Tuhan Inta Totok in moḷantud.

DANIEL 12:1

Malaekat inta nogiḷambung in pakeang linen tatua in noguman bui, “Kon dodai intua moitukatbí in malaekat moḷoben ki Mikhael moḷoḷukad kon bangusamu. Onda intua moiangoi in sempo in roriga inta diá in poḻiuan pinangkoi kon oyúondon in bangusa mita. Táe bayongan in intau nongkon bangusamu inta tangoinea pinais kon buk i Allah, in posaḷamatonbí.

LUKAS 10:20

Tongá umpakabí natua, yo dikabí mopia-pia in gina monimu sin moondok in dimukud moraat kon i monimu. Naabí in patus mokopia kon gina monimu, tangoimu aindon pinais kon soroga.”

SURAT I PAULUS KON JAMAAT RUM 12:1

Utat mita! Ki Allah totok in mopia kon i naton. Manangka intua akuoi in mopoigum totok sinbá moiko moposumba in awakmu saḷaku sosumba inta nobiag sin kopontingan i Allah. Sosumba tatua in tongábí ogoi kon i Allah bo inta mokosanang kon gina-Nea. Tuabí in ibadamu inta sabanarnea.

SURAT I PAULUS KON JAMAAT RUM 16:12

Salam doman kon i Tripena bo kon i Triposa inta ain noramuji totok in nogaid sin kopontingan i Tuhan, bo salam doman kon i Persis inta kinotabiku. Sia doman tua inta ain noramuji totok in nogaid sin kopontingan i Tuhan.

SURAT I PAULUS KON JAMAAT RUM 16:9

Poyaputpa in horomatku kon i Urbanus, yobayat topogaidan naton sin kopontingan i Kristus. Bo horomatku doman kon i Stakhis inta kinotabiku.

PILIPI 1:12

Ibogonku in kotaauandon monimu komintan, kon soaḷ mita inta ain nobaḻí kon inakó tuabí in nokopopisí dá nobayongdon in nokidongog bo nopirisaya kon Habar Mopia tatua.

PILIPI 1:16

Intau mita tatua in nogaid kon tua sin mosia in motabi kon i Allah bo kon inakó, sin kinotaauandon monia kon ki Allahbí in nokiaid intua kon inakó sin moponiata kon totuubí in Habar Mopia tatua.

PILIPI 1:27

Dá tuamai naa in poigumonku, kobiagbí in moiko podudui in onu inta pinoigum kon bonu in Habar Mopia i Kristus, sinbá aka moiangoi in akuoi yo diá bo diá kodongogankudon, kon moiko in umuranbí notobatú kon gina bo raian in moramuji mogaid kon onu inta pinirisaya podudui in Habar Mopia nongkon i Allah.

PILIPI 1:5

Akuoi in mopoyaput in sukur kon i Allah sin nongkon pinomangkoianmai nodapot in kon tanaa mako, moiko in umuran nobantung kon inakó nopotaa-taau mako in Habar Mopia inta nongkon i Allah.

PILIPI 1:7

Totuubí kon diábí moitaḷá in raianku tanaa kon i monimu, sin moiko umuran kon gina-ginaku mako, popisí in moiko ain nokouḻí domandon kon totabi bo barakat i Allah inta inogoi kon inakó; kon tungkuḷ in akuoi kon bonupa in ponjara tanaa mako ande kon tungkuḷ in kon ḷuaidon mobela kon kinobobanar in Habar Mopia tatua.

PILIPI 4:2

Ki utat naton bobay ki Euodia bo ki Sintike! Naa in tongginaku kon i monimu, kotobatúdon kon gina saḷaku intau inta mopirisaya kon i Tuhan.

KOLOSE 1:7

Habar tatua in dinongogdon monimu nongkon i Epapras, yobayat topogaidan inta kinotabi nami. Sia tua in mogogaid kon oaidan i Kristus inta mosatia in mogaid kon kopontingan naton.

WAHYU 13:8

Mahaḷuk tatua sumbáanbí in bayongan intau inta nobiag kon dunia naa. Intau mita inta diápa kinopaisan in tangoi monia kon bonu in buk kobiagan inta kapunyaan i Adí in Domba inta ain iratá, pinangkoipamai kon dunia naa diápa pinomia.

WAHYU 17:8

Mahaḷuk tatua nokoimontan bidon in nobiag in koḻipod, táe masai naa in diádon, tongá topípabí bo ḷumuai in sia nongkon tampat pohohukuman kon irang bo sia in mopobayádon in tampat koyoyangan. Intau mita kon dunia naa inta diá pinais in tangoi monia kon bonu in buk intau nobiag mulaipa kon dunia naa diápa pinomia, yo moherangbí aka mokoontong kon mahaḷuk tatua. Sin mahaḷuk tatua koḻipod in pernabí nobiag, táe tanaa in diá bidon, tongá buidon moitukat.

WAHYU 20:12

Bo akuoi in nokoontong kon intau mita minatoi, guyanga-mongoadí sinimindog kon tayowon tampat pomomarentaan tatua. Bo tobatú buk ibanea in binukádon, tuata in Buk Intau Nobiag. Onda intua hukuman pinoḷabúdon kon intau mita minatoi, podudui in oaid monia podudui kon inta ain pinais kon bonu in buk mita tatua.

WAHYU 20:15

Intau mita inta tangoi monia diá pinais kon bonu in Buk Intau Nobiag, pogambat kon bonu in dagat tuḷu.

WAHYU 21:27

Táe intau mita inta nogaid kon soaḷ mita inta mokorongó, ande intau mita inta mongouboḷ, yo singogon mako mopoḷok, mosia inta nogaid kon mokotor, diábí moituot kon tua. Inta motaau tumuot in tongábí intau inta tangoinea in pinais kon bonu in Buk Intau Nobiag, buk i Adí in Domba tatua.

WAHYU 3:5

Mosia inta mountung ḷambungan in ḷambung mobudó natua. Tangoi monia in diábí popaton nongkon Buk Intau Nobiag. Bo akúon-Kubí in mosia kon tayowon i Amá-Ku bo malaekat-Nea mita kon Akuoibí in kitogi kon i monia tua.