PILIPI 1:7 - Alkitab Singog In Mongondow Masa In Tanaa

⁷ Totuubí kon diábí moitaḷá in raianku tanaa kon i monimu, sin moiko umuran kon gina-ginaku mako, popisí in moiko ain nokouḻí domandon kon totabi bo barakat i Allah inta inogoi kon inakó; kon tungkuḷ in akuoi kon bonupa in ponjara tanaa mako ande kon tungkuḷ in kon ḷuaidon mobela kon kinobobanar in Habar Mopia tatua.

PILIPI 1:7 Iomraidhean Croise

OUMAN IN RASUL MITA 20:23

Tongá Roho i Allah aindon noguman kon inakó kon wakutu in akuoi tumuot magí mako kon kotá-kotáannea, yo ponjara in nobaḻí tampatku bo roriga in umuran mogoḷat mako.

OUMAN IN RASUL MITA 21:33

Itoi in tontara tatua dinimiug kon i Paulus bo nodomok poḷat pinoki tokig in rante. Onda intua itoi in tontara tatua noḻibó kon i monia mongo onu inaidannea.

KORINTUS 1 13:7

Monahangbí in sia in tumayow kon bayongan rupa-rupa bo mopirisaya kon bayongan inta mopia; sia in tantú oyúon in harapan bo monahang doman in mogoḷat bo motanggung kon bayongan rupa-rupa inta mobaḻí.

KORINTUS 1 9:23

Tongábí bá moiyaput in Habar Mopia nongkon i Allah kon bayongan intau, dá inaidanku intua komintan, sinbá moitakin doman mokouḻí kon barakat in akuoi.

KORINTUS 2 3:2

Moikobí nion in nobaḻí surat dodayow nami, inta noipais kon bonu in gina nami bo inta ain kinotaauan bo poḷat kinobacaan in bayongan intau.

KORINTUS 2 7:3

Akuoi in moguman kon natua, deemanbí makusud mopotaḷá kon i monimu, sin nádon kain singogku inta muna, kon moiko in totok bidon kinotabi nami, sahingga in kita tantú notobatú kon dodai in nobiagpa nodapot in matoika bidon.

GALATIA 5:6

Sin aka kita bo ain notobatú takin i Kristus Yesus, yo soaḷ sunaton ande diá sunaton, diábí mobaḻí soaḷ kon i naton. Sin totok moponting in pirisayabí kon i Kristus bo tua in moniata kon tabi naton kon tumpaḷa intau.

EPESUS 3:1

Akuoi ki Paulus, pinonjara popisí in nogaid kon oaidan i Kristus Yesus sin kopontingan monimu intau inta deeman Yahudi.

EPESUS 4:1

Manangka intua akuoi – saḷaku intau inta pinonjara sin nogaid kon oaidan i Tuhan – mopoigum totok kon i monimu: sinbá moiko, intau inta inoinídon in kobiag domandon ná inta kaadaanmu saḷaku intau inta inoiní i Allah.

EPESUS 6:20

Lantaran Habar Mopia tuata, akuoi in nobaḻí totabá bo tanaa in binonu kon ponjara. Sambayangaibí sinbá mobarani in akuoi in mosingog kon soaḷ Habar Mopia tatua, ná inta patus singogonku.

PILIPI 1:12

Ibogonku in kotaauandon monimu komintan, kon soaḷ mita inta ain nobaḻí kon inakó tuabí in nokopopisí dá nobayongdon in nokidongog bo nopirisaya kon Habar Mopia tatua.

PILIPI 1:13

Tuamai in bayongan intau kon komaḻig bo intau mita ibanea inta kon kotá tanaa nonotaaudon kon akuoi in pinobonu kon ponjara popisíbí in dinumudui kon i Kristus.

PILIPI 1:14

Pinomonjaraan kon inakó in nobaḻídon dodoyonan sahingga in nobayong intau in Keresten kon kotá tanaa in nobaḻí nopirisaya totok kon i Tuhan, dá diádon moondo-ondok in mosia mopotaau in koyow i Allah.

PILIPI 1:5

Akuoi in mopoyaput in sukur kon i Allah sin nongkon pinomangkoianmai nodapot in kon tanaa mako, moiko in umuran nobantung kon inakó nopotaa-taau mako in Habar Mopia inta nongkon i Allah.

PILIPI 2:22

Sin inontong bidon monimu tontaní kon ki Timotius tua in nokobaragunabí kon inakó. Sia in totu-totuudon nogaid takinku nopotaau magí-mako in Habar Mopia inta nongkon i Allah. Kaminda naa in nádon onda guyanga bo adí.

PILIPI 4:14

Táe moiko ain notuḷung kon inakó wakutu in akuoi kinoantugan in roriga; bo oaidmu tatua in mopiabí.

PILIPI 4:15

Utat mita intau in Pilipi! Kinotaauan bidon monimu totok kon wakutu in akuoi nonaḷámai kon Makedonia koḻipod, wakutu in akuoi bagu momangkoi nopoyaput in Habar Mopia, yo tongábí moiko in jamaat inta notuḷung kon inakó; moikodon nion inta nokorasa domandon kon inta mopia bo inta diá mopia wakutu in noyotakinku.

PILIPI 4:3

Bo poigumonku kon i monimu Sunsugos, yobayatku inta totok in mosatia, tuḷungai in mosia, sin mosia noramujidon totok in nogaid takinku nopotaau in Habar Mopia inta nongkon i Allah; mosia tua naonda bo tai Klemen bo bayongan in intau inta nogaid noyotakinku. Tangoi monia tua in pinaisdon kon bonu in Buk Intau Nobiag.

KOLOSE 4:18

Salam nongkon inakó, ki Paulus. Akuoibí tontaní in nomais kon salam tanaa. Dika koḻiongan kon akuoi in kon bonupa in ponjara! Igumon mako umuran barakatan i Tuhan in moiko. Horomat nami, Ki Paulus

KOLOSE 4:3

Sambayangai doman in kami sinbá ogoian i Allah in kasampatan mopia kon mopotaa-taau mako in habar soaḷ inta noibuni kon i Kristus. Inta lantaran soaḷ tatuata dá tanaa mako akuoi binonu kon ponjara.

TESALONIKA 1 5:5

Utatku mita moiko nion in komintanbí intau inta nobiag kon nobayag, moiko in noibonu kon bayag inta motarang. Kita in deemanbí intau inta nobiag kon sindip, ande intau inta noituot kon doḷom inta mosindip.

TIMOTIUS 2 1:8

Manangka intua dikabí moondok in mopotaau bo moguman kon onu inta inaidan i Tuhan naton. Dika doman mooyá, sin akuoi in pinobonu kon ponjara popisíbí in mopirisaya kon i-Nia, táe pakébí in ropot inta inogoi i Allah motanggung moyotakin kon roriga sin mopoyaput in Habar Mopia tatua.

TIMOTIUS 2 2:9

Bo lantaranbí nopotaau in Habar Mopia tanaa dá akuoi in nokouḻí kon roriga, nodapot in sinokig naonda bo intau moraat, táe pirman i Allah in diábí motaau tokigon monia ná akuoi.

PILEMON 1:13

Sabanarnea ibogonku in kon naapabí in sia saḷaku toḻiumu sin mobantung kon inakó kon dodai in akuoi kon bonupa in ponjara sin nopotaau in Habar Mopia nongkon i Allah.

IBRANI 3:1

Utat mita tumpaḷa Keresten inta ain inoiní i Allah! Raika monimu koako-ako in soaḷ ki Yesus naa! Sia ain pinotabá mangoi i Allah sinbá mobaḻí Imang Moḷoben kon agama inta dinuduian naton.

PETRUS 1 4:13

Mokoposanangbí kon gina sin moiko in nokorasadon kon ná inta ain kinorasaan i Kristus. Dá aka kamuliaan i Kristus popoontongdon, yo totokbí in mopia in gina monimu.

PETRUS 1 5:1

Naa in tongginaku mita kon itoi mita in jamaat i Allah inta kon sigad monimu. Akuoi in nomais tanaa saḷakubí yobayat topogaidan in itoi mita in jamaat bo saḷaku intau inta ain nokoontong tontaní kon roriga i Kristus, bo inta moitakin doman kon kamuliaan inta popoontong i Kristus kon intau kon singgai moiduduimai. Poigumonku totok

PETRUS 2 1:13

Kon dodai in akuoi mobiagpa, nobaḻíbí kowajibanku in moponorop intua kon i monimu.

YOHANES 1 3:14

Kinotaauandon naton kon kita iḷumuaidon nongkon kawasa in popatoi, bo nomampingdon kon bonu in kawasa inta mokobiag, sin lantaran kita notabidon kon i utat mita naton. Sin ki ine in diá motabi kon i utatnea, yo sia tua in tantúpa nobiag kon bonu in kawasa in popatoi.