NEHEMIA 9:25 - Alkitab Singog In Mongondow Masa In Tanaa

²⁵ Umat-Mu nogagow kon benteng mita poḷoḷukadan, butá inta mopia bo baḷoi inta nopuḻing in kaoyúonan. Parigí mita bo bokaká mita in tubig ginamá monia, gobá in anggur, pangkoi in zaitun bo ayop mita ibanea. Iḷumongow in mosia sin mongaan kinooibogbí in gina. Bayongan in mopia inta inogoi-Mu pinaké monia.

NEHEMIA 9:25 Iomraidhean Croise

DATU MITA IMITÁNEA 14:9

Táe iko in nogaidon kon inta moraat noiḻiu kon inta inaidan monia inta nomarenta noiuna kon inimu. Iko in nonaḷámai kon i-Nakó bo nopomuká in torú-Ku sin nomia kon berhala bo patong mita nongkon logam sin sumbáan.

DATU MITA IMITÁNEA 8:66

Kon singgai noginwaḷu pinotabádon i Salomo nobui in intau mita tatua. Mosia komintan in nodayow kon inia bodongka nobui kon baḷoi monia takin pia in gina, sin bayongan in barakat inta ain inogoi i Tuhan kon mogogundoi-Nea ki Daud bo kon bangusa Israel umat-Nea.

NEHEMIA 9:35

Inogoi-Mu in datu mita inta momarenta kon umat-Mu, naonda in mosia nogutun kon butá inta mobanat bo mopia inta inogoi-Mu. Tongá diábí in mosia nonaḷámai kon kobobiag inta moraat, doí mogundoi kon ini-Mu poḷat moibada.

MAZMUR 105:44

Butá in bangusa mita inogoi-Nea kon i monia, gobá mita monia binaḻí-Nea kapunyaan in umat-Nea,

MAZMUR 65:11

Iko in momonu in tubig kon bayáan in pajeko bo binuntadan-Mu in ḻitodan mita in butánea. Sinobai-Mu in uyan in butánea, bo binarakatan-Mu in kobiagan in pinomuḷanea mita.

AMSAL 30:9

Sin, aka akuoi in mooyúon, yo dika-dika bo akuoi in moguman kon akuoi in diábí moparaḷu kon ini-Mu. Bo aka akuoi mobiag bogá, yo dika-dika bo monakow in akuoi dá mokopooyámai kon tangoi-Mu.”

YESAYA 6:10

Bo nogumandon in Sia kon inakó, “Bangkungaidon in raian in intau mita tatua, bongoḷai in bongoḷannea bo bilogai in matanea, sinbá mosia in diá mokoontong, mokodongog andeka momangaḻe, bo momurow mamangoi kon i-Nakó bo mopiadon.”

YESAYA 63:7

Akuoi in mopohabar in tabi i Tuhan bo modayow kon i-Nia sin bayongan in aid-Nea. Binarakatan-Nea totok in umat-Nea, sin Sia in nonotabi bo tabi-Nea in diábí moobo-obot.

YEREMIA 2:7

Mayá in butá inta mopia inatod-Ku in mosia sin mokaan kon bungai mita in pinomuḷa bo bayongan in inta mopia kon tua. Táe kon tua butá-Ku in pinonajisdon monia bo kapunyaan-Ku in binaḻí monia mokorongó.

YEREMIA 31:14

Imang mita in poguḻíon-Kubí in kaanon inta mobayong totok; bo bayongan inta paraḷuon in umat-Ku ogoi-Kubí. Akuoi, ki Tuhan, inta noguman.”

YEREMIA 32:23

Táe naonda in mosia namangoi in butá tanaa bo nogagow, mosia in diábí notoḷutui kon parenta-Mu mita, bo diá nobiag podudui in totundú-Mu mita. Bayongan inta pinarenta-Mu kon i monia diá tobatúmai in inaidan monia. Tuamai in pinopoangoi-Mu in bayongan bodito tanaa kon i monia.

YEHEZKIEL 20:6

Kon dodai intua Akuoi in mongibot kon modia kon i monia ḷumuai nongkon Mesir bo mayá in butá inta piniḻí-Ku ogoi kon i monia. Butá tatua in nooyúon bo noḷumbá, butá inta totok in mopia kon sinangkub in dunia.

DANIEL 11:24

Pinongin tompobaḻik tubuonnea in butá mita inta mopia kon dodai in intaunea mita nobiag noodom kon tua. Sia in mogaidbí kon onu inta diápa kon dodai in onda in inaidan in mogoguyangnea. Bo sia in mosilaibí magí-mako kon intaunea mita bayongan in pakakat inta inagow bo kaoyúonan inta nouḻínea kon parang. Motayak in sia kon daya in monubu kon tampat mita inta oyúon in sinondok in dinding, táe wakutunea in ḷagidon modait.

HOSEA 13:6

Táe naonda in moiko kon bonudon in butá mopia, poḷat nobotug nodapotdon in moiko noorop, nobaḻídon in moiko moḷoḷatú bo iḻiongdon monimu in Akuoi.

HOSEA 3:5

Táe moiangoibí in wakutunea bangusa in Israel mobui kon i Tuhan Allah monia, bo kon i datu monia nongkon buí i Daud. Bo moondok in mosia poḷat mohoromat kon i Tuhan, poḷat motarima kon barakat-Nea mita.

SURAT I PAULUS KON JAMAAT RUM 2:4

Andeka diá pandungonmai monimu in totabi, kososabar-Nea bo kopopia in gina-Nea in notarima kon i monimu? Tantú kinotaauan bidon monimu kon ki Allah in nopoontong in kopopia in gina-Nea, sin ibogon-Nea moiko in mogogaidon mogaid kon dosa mita.

ULANGAN 3:5

Bayongan kotá tatua inirigonan in dinding mita inta moḷantud, ngara mita moḷoben bo bandai mita in ḷoḻingkop sin poḻingkop kon ngara mita tatua. Koḻikud intua nobayongpa doman in kotá ibanea inta diá dininding.

ULANGAN 32:13

Binaḻí-Nea in mosia nongawasa kon buḷud mita; mosia in nokaan kon bungai in boyó kon gobá mita monia bo nonginum kon biluk in kayuon kon buḷud batu. Mosia nokouḻí kon ḷana nongkon pangkoi in zaitun inta nobiag kon butá inta nopuḻing in batu.

ULANGAN 32:14

Sapi bo bembé domba monia mobogoi in susu inta mobarong; bobiagon monia totok in mongopia, gandum bo tubig in anggur monia in totok mopia.

ULANGAN 32:15

Umat i Tuhan nobaḻí nobiag nooyúon, táe moibog momarontak, mosia in nongoḷongó, nobotug in kaanon. Bo mosia in nonaḷámai kon i Allah, inta nomaḻí kon i monia bo nondoí kon Mopoposaḷamatnea inta moroton.