NEHEMIA 9:1 - Alkitab Singog In Mongondow Masa In Tanaa

^1-2 Kon singgai in doyowa nopuḷú bo opat kon buḷan doman tatua, rayat in Israel noyosipun. Mosia in nopuasa sin moponiata kon mosia in nomanasaḷdon in nogaid kon dosa mita. Mosia in sinumondí kon intau mita ango-angoi. Nobaḻí tomponuot kon noajar in gina, nogibintoḷ in mosia bo nopoinggú in ḷobud kon uḷu. Onda intua sinimindog in mosia bo nongaku kon bayongan in dosa monia bo dosa in mogoguyang monia.

NEHEMIA 9:1 Iomraidhean Croise

SAMUEL 2 1:2

Kon singgai nogintoḷu, namangoidon in tayowmobiag tobatú nongkon pinononḷoḷaigan i Saul. Nobaḻí tomponuot kon pinonogumatoian sia in nomerakdon kon pakeangnea bo nopotoguḷudon in butá in sia. Minayá in sia kon i Daud bo sinumungkud kon tayowonnea.

TAWARIKH 2 20:3

Noondok in ki Yosapat bo nosambayang in sia nopoigum in totundú i Tuhan. Onda intua sia in nomarenta sinbá bayongan in rayat mopuasa.

TAWARIKH 2 7:10

bo nopoikoḷomai kon singgai, kon singgai in doyowa nopuḷú botoḷú buḷan noginpitu, ki Salomo nopotabá in intau mita tatua nobui. Nopia in gina monia kon bayongan inta mopia inta inaidan i Tuhan kon bangusa in Israel umat-Nea, kon i Daud bo kon i Salomo.

EZRA 8:21

Bo kon bingkí in Ongkag in Ahawa tatua akuoi nopotaau kon mosia komintan in mustibí mopuasa bo tumonsiup kon tayowon i Allah. Kami in nosambayang sinbá ki Allah in nokapit kon inami kon binayáan tatua, bo mogoḻiung kon inami, kon i adí mita nami bo bayongan in kapunyaan nami.

EZRA 8:23

Dá nopuasadon in kami bo nosambayang kon i Allah nopoigum sinbá ḷukadan bo inindogogan-Nea doman in sambayang nami.

NEHEMIA 8:2

Bo dinia i Ezra in buk tatua kon tayowon in bayongan intau inta sinimindog, ḷoḷaki, bobay bo adí mita inta momangaḻedon.

ESTER 4:16

“Sipundon in bayongan intau in Yahudi inta kon Susan bo sambayangai in akuoi. Dika mongaan bo monginum in toḷu nosinggai bo toḷu nogobii in koonggotnea. Akuoi tontaní bo mongodeaga mita inta nobantung kon inakó in mopuasabí doman. Mopaḷut mako kon tua akuoi in mayá kon tayowon i datu, umpakabí ḻimimpat tua kon undang-undang. Aka akuoi bo musti matoi popisí intua, dá biódon mako in akuoi matoi!”

ESTER 4:3

Bo kon bayongan in propinsi, intau mita in Yahudi nongombaḷ bo nogamui naonda in parenta i datu pinotaau. Nopuasa in mosia, nongombaḷ bo nopongadu, bo nobayong in kon sigad monia in nomaké in sosapi bo inumuḻid kon ḷobud.

AYUB 2:12

Táe naonda in inontong monia nongkon noyayú, gogió bo diádon kinotaauan monia. Mosia in nongombaḷ noropot bo nomerak kon ḷambung monia poḷat noponabud in ḷobud kon toḷungayá bo kon uḷu.

YESAYA 22:12

Kon tungkuḷ intua ki Tuhan Inta Totok in moḷantud bo Inta Totok in mokawasa nopotabá kon i monimu nongombaḷ bo nogamui, nongarug kon buok bo nogibintoḷ.

YOËL 2:12

Ki Tuhan in noguman, “Táe tanaa mako, pobuidon mangoi kon i-Nakó takin ḻimbatú in gina, sindaḷan mopuasa, mogamui bo mongombaḷ.

IMAMAT 23:39

Naonda in mopaḷut mako mobatun kon bungai in boyó, pangkoion kon singgai mopuḷú bo ḻima buḷan noginpitu, moiko in musti momia kon poramean pitu nosinggai in koonggotnea. Singgai dungkuḷ bo singgai noginwaḷu tua in singgai inta ain sinantú kon pogogaian.

YOSUA 7:6

Noajar totok in gina i Yosua bo gina in itoi mita in umat Israel dá mosia nomera-merakdon kon pakeang monia, bo kino ouputdon in singgai dapot in doḷom mosia sinumungkud kon tayowon in Poti Dodandian i Tuhan poḷat nopoinggú in ḷobud kon uḷu monia nobaḻí tompoingat kon noajar totok in gina monia.

WAHYU 11:3

Akuoi in mopotabá in sakusi-Ku doyowa inta mogiḷambung in ḷambung intau kinopatoian, bo mosia mopoumum in habar i Allah solama toribu bodoyowa nogatut bo onom nopuḷú nosinggai in koonggotnea.”

HAKIM MITA 20:26

Dá buidon minayá in umat in Israel kon Betel bo nongombaḷ kon i Tuhan. Kon tua in mosia nopuasa nodapot in doḷom noposumba in kuruban pondamean bo kuruban payongon kon i Tuhan.

SAMUEL 1 4:12

Intau tobatú nongkon suku Benyamin noḷagui nongkon tampat pinoparangan kon Silo, bo noidapot intua kon singgaipa doman tatua. Nobaḻí tomponuot kon nonogumatoi, binerakneadon in pakeangnea bo nopongipúdon in sia in butá kon uḷu.

SAMUEL 1 7:6

Bo noyosipundon in mosia kon Mizpa. Mosia in nonayú kon tubig bo pinopobutak nobaḻí sosumba kon i Tuhan, noiduduimai kon tua mosia in nopuasa in tosinggai tua. Guman monia, “Kami naa in binaradosadon kon i Tuhan.” (Kon Mizpa tua ki Samuel nomangkoidon nomaḷut kon pelekara mita yogenggeng in intau in Israel.)