NEHEMIA 8:9 - Alkitab Singog In Mongondow Masa In Tanaa

⁹ Nokodongogmai kon pinobacaan kon Hukum tatua, pinongoibu in rayat bo poḷat nongombaḷ. Dá ki gubernur Nehemia bo ki Imang Ezra inta nonotaau totok in Hukum tatua bo intau mita in Lewi inta noginsilang kon Hukum tatua, noguman kon bayongan in rayat nanaa, “Singgai naa in singgai inta mokudus kon i Tuhan Allahmu, dá dikadon pongoibúon andeka mongombaḷ.

NEHEMIA 8:9 Iomraidhean Croise

DATU MITA 2 22:11

Nokodongogmai kon bonu in buk tatua, ki datu in nomera-merak kon ḷambungnea sin norobonoḷ in ginanea.

DATU MITA 2 22:19

nomanasaḷ in iko bo inumompá kon tayowon-Ku. Ginogondok-Kudon kon mohukum kon Yerusalem bo intaunea mita. Aidan-Ku kon kotá tatua in oontongon inta mokoondok, bo tangoi in Yerusalem in baḻíon-Ku tangoi kutukon. Táe naonda in kinodongoganmu in gogondok-Ku tatua, nongombaḷ in iko bo nomerak kon ḷambungmu nobaḻí tomponuot kon morobonoḷ in ginamu. Dinongog-Kudon in sambayangmu,

TAWARIKH 2 15:3

Noonggot totok in Israel diá nosumba kon i Allah inta mobanar, diá kohukum mita inta musti duduian, bo diá doman ko imang mita inta motundú kon i monia.

TAWARIKH 2 30:22

Intau mita in Lewi tatua mongopandoi modia kon ibada kon i Tuhan, dá pinuji i Hizkia in mosia. Naonda in pitu nosinggai in koonggotnea mosia nongaan kon kaanon kon pinoramean tatua bo poḷat noposumba in kuruban sin mopoyaput in sukur kon i Tuhan, Allah in mogoguyang monia,

TAWARIKH 2 34:19

Nokodongogmai kon tombonu in buk tatua, ki datu in nomera-merak kon ḷambungnea sin norobonoḷ totok in dodobnea.

TAWARIKH 2 34:21

“Bayádon poḻibó kon i Tuhan sin kopontinganku bo kopontingan in intau mita inta kon Israelpa bo kon Yohuda soaḷ tombonu in buk tanaa. Ki Tuhan in sinumorú kon inaton popisí in mogoguyang naton diá nopobayá in parenta mita inta pinais kon bonunea.”

TAWARIKH 2 35:3

Intau mita in Lewi inta ain sinantú mogaid kon oaidan i Tuhan, bo inta nobaḻí guru mita in Israel in nokouḻí kon parenta tanaa nongkon i Yosia, “Ukatdon in Poti Dodandian i Tuhan inta motusi tatua kon bonu in Baḷoi Tuhan inta pinosindog i Datu Salomo ki adí ḷoḷaki i Daud. Dikadon pampi-pampingon monimu bui. Undoidon in ki Tuhan Allahmu bo bangusa in Israel umat-Nea.

EZRA 2:63

Gubernur in butá in Yohuda diá nobogoi kon i monia nokaan kon kaanon inta pinosumba kon i Allah, nodapot in oyúon in imang tobatú inta nopoigum in topotundú nomaké in Urim bo Tumim.

EZRA 7:11

Naa in surat inta inogoi i Datu Artahsasta kon i Ezra, imang tobatú bo intau inta nonotaau totok in Hukum,

NEHEMIA 10:1

Intau inta dungkuḷ totok notekeng in ki Gubernur Nehemia ki adí i Hakhalya. Noiduduimai in ki Zedekia. Nopaḷut mako kon tua intau mita inta noiduduimai naa in notekeng doman:

NEHEMIA 12:26

Mosia tua in nobiag kon tungkuḷ i Yoyakin ki adí i Yesua ki ompu i Yozadak bo kon tungkuḷ i Gubernur Nehemia bo i Imang Ezra intau nonotaau totok in hukum tua.

NEHEMIA 7:65

Ki gubernur in Yohuda in diá nobogoi kon i monia mokaan kon kaanon inta pinosumba kon i Allah, noidapot in oyúon in imang tobatú inta motaau mopoigum in topotundú mopomaké in Urim bo Tumim.

NEHEMIA 7:70

Nobayong in kon sigad in rayat in nobogoi in totuḷung sin poduḷu ponompiaan kon Baḷoi Tuhan: nongkon i gubernur: – 8 nokilo in buḷawan 50 in mangko upacara 530 in jubah imang nongkon tongguḷu mita in inanakan: – 168 nokilo in buḷawan 1.250 nokilo in saḷaka nongkon intau mita ibanea: – 168 nokilo in buḷawan 140 nokilo in saḷaka 67 in jubah imang

NEHEMIA 8:2

Bo dinia i Ezra in buk tatua kon tayowon in bayongan intau inta sinimindog, ḷoḷaki, bobay bo adí mita inta momangaḻedon.

MOHOHUTUBA 3:4

Ki Allah in nonantú kon wakutu mongombaḷ bo wakutu kumosing, wakutu mogamui bo wakutu motayok,

YESAYA 61:3

sin mobogoi in pia in gina bo ḷunganga in gina kon intau inta morobonoḷ in gina bo nonogumatoi; sin momaḷui kon inta mokoajar kon gina monia mobaḻí dondong dodayow. Mosia in nádon pangkoi in kayu tobatú inta pinomuḷa tontaní i Tuhan. Mosia in mogaidbí kon onu inta mopia bo mobanar, dá ki Tuhan in poḷantudon.

HOSEA 4:6

Moiko, imang mita, diá mopandungmai kon i-Nakó, dá umat-Ku in diá domandon mopandungmai kon i-Nakó dá nobodito in mosia. Moiko in nondoí kon totundú-Ku mita. Dá, Akuoi in mondoí doman kon i monimu, bo ki adímu mita in diá doman akúon-Ku saḷaku imang-Ku mita.

MALEAKHI 2:13

Bo naa in aidmu inta ibanea. Mezbah i Tuhan in pinuḻingandon monimu in ḷuá; moiko in nongombaḷ bo mogamui sin ki Tuhan in doídon kon kurubanmu mita.

SURAT I PAULUS KON JAMAAT RUM 3:20

Sin diábí in tobatúmai in motaau mopopiaan i Allah sin popisí in mosia ain nogaid kon soaḷ mita inta kon bonu in hukum agama Yahudi. Táe hukum tatua in tongábí moponiata kon intau tua in binaradosabí komintan.

SURAT I PAULUS KON JAMAAT RUM 7:9

Koḻipod akuoi in nobiag diábí nomaké in hukum agama. Táe naonda in hukum agama oyúondon, yo dosa in mulaidon mobiag

ULANGAN 12:12

Kosanangdon in gina kon tayowon i Tuhan Allahmu, takin adímu mita, bobantungmu mita bo intau mita in Lewi inta nogutun kon kotámu mita, sin intau mita in Lewi diá nokouḻí kon tonsilai kon butámu.

ULANGAN 12:7

Kon tua doman, kon tayowon i Tuhan Allahmu, moiko moyotakin in motoḷuadímu musti mongaan takin ḷunganga in gina sin bayongan inta iramujimu oyúon in mangaḻenea sin binarakatan i Tuhan Allahmu.

ULANGAN 16:11

Kon tayowon i Tuhan Allahmu, kon tampat inta piniḻí-Nea, moiko musti moposanang in gina moyotakin i adímu mita, bobantungmu mita bo intau in Lewi, intau ango-angoi, adí uno-unon bo intau mita inta dongkadon boba-bobay inta nogutun kon kotámu mita.

ULANGAN 26:14

Nongkon sosumba tatua diá topiḻikmai in kinaanku kon dodai in akuoi nonogumatoi ande diniaku iḻumuai in baḷoi kon dodai in akuoi nonajispa, ande inogoiku nobaḻí sosumba kon intau minatoi. Akuoi aindon notoindudui, o Tuhan; bayongan inta pinarenta-Mu inaidankudon.

YAKOBUS 4:9

Musti in moiko totu-totuu momanasaḷ bo mongombaḷ poḷat mogamui; kosingmu in baḻídon ombaḷ bo ḷungangamu in baḻídon ajar in gina!