NEHEMIA 8:8 - Alkitab Singog In Mongondow Masa In Tanaa

⁸ Mosia in nonerjemah kon Hukum i Allah tua kon batúan in tonsilainea bo insilangan dá komangaḻeandon in rayat.

NEHEMIA 8:8 Iomraidhean Croise

DATU MITA 2 23:2

Bo minayá in sia takin i monia kon Baḷoi Tuhan, dinuduian in imang mita, nabi mita bo bayongan in rayat, pinomayá inta nobiag bogá andeka inta nobiag nooyúon. Kon tayowon monia komintan, kon diug in pal inta sinantú kon i datu, sinimindog in ki datu bo nobaca kinoropot in bayongan tombonu in buk dodandian inta ain nouḻí kon bonu in Baḷoi Tuhan. Onda intua ki datu nomia kon dodandian takin i Tuhan kon motoindudui kon i-Nia, bo mopobayá intua takin ḻimbatú in gina bo dimukud in bayongan parenta bo hukum-Nea mita. Ki datu in nodandi doman kon dumudui kon sarat dodandian i Tuhan takin umat-Nea mita inta ain pinais kon bonu in buk tatua. Bayongan in rayat sinumakin nodandi kon motoinduduibí kon dodandian tatua.

EZRA 4:18

Surat inta pinoki dia i utat mita in binacadon kon tayowonku pinongin singog nami.

NEHEMIA 8:12

Dá nobuidon in rayat sin mongaan bo monginum poḷat mosila-silai mako kon kaanon kon intau mita ibanea. Noḷungangadon in gina monia sin kinomangaḻeandon monia in onu inta ain binaca bo dinongog monia tatua.

NEHEMIA 8:7

Nopaḷut mako kon tua nobuat in mosia bo sinimindog kon tampat monia tontaní, bo tongonumai in intau mita in Lewi noginsilang kon Hukum tatua kon i monia. Naa in intau mita in Lewi tatua: ki Yesua, ki Bani, ki Serebya, ki Yamin, ki Akub, ki Sabetai, ki Hodia, ki Maaseya, ki Kelita, ki Azarya, ki Yozabad, ki Hanan bo ki Pelaya.

NEHEMIA 8:9

Nokodongogmai kon pinobacaan kon Hukum tatua, pinongoibu in rayat bo poḷat nongombaḷ. Dá ki gubernur Nehemia bo ki Imang Ezra inta nonotaau totok in Hukum tatua bo intau mita in Lewi inta noginsilang kon Hukum tatua, noguman kon bayongan in rayat nanaa, “Singgai naa in singgai inta mokudus kon i Tuhan Allahmu, dá dikadon pongoibúon andeka mongombaḷ.

NEHEMIA 9:3

Degá toḷu nojam in koonggotnea, buk i Tuhan, Allah monia, binaca kon i monia bo toḷu doman nojam noiduduimai mosia in nongaku kon dosa mita monia. Nopaḷut mako kon tua sinumungkud in mosia bo nosumba kon i Tuhan, Allah monia.

YEHEZKIEL 46:10

Mongongawasa in mustibí tumuot kon Baḷoi Tuhan moyotakin in rayat bo naonda in mobui mustibí doman moyotakin.

HABAKUK 2:2

Ki Tuhan in notubag kon inakó nanaa, “Kurigdon kosimantag kon butá ḷamentong tobonsig, onu inta poponiata-Ku kon inimu, sinbá mopia bacaan.

LUKAS 24:27

Onda intua nodait-Nea ininsilangan kon i monia in bayongan onu inta pinais kon Buk Motusi soaḷ Sia. Pinangkoi kon inta pinais i Musa nodapot in buk in nabi mita.

LUKAS 24:32

Bo mulaidon mosigumanan in mosia, kai monia, “Tuamai porasaan naton ná bí tumagab wakutu in Sia nongonguman naton kon daḷanpa, bo noginsilang kon bonu in Buk Motusi kon i naton?”

LUKAS 24:45

Onda intua ki Yesus nomukat kon raian monia sinbá komangaḻean monia in bayongan inta ain pinais kon Buk Motusi.

OUMAN IN RASUL MITA 28:23

Dá mosia bo ki Paulus in nonantú kon tobatú singgai poyodungkuḷan monia. Bo kon singgai inta ain sinantú tatua nobayongdon intau in namangoi kon baḷoi inta pinogutunan i Paulus. Bo nongkon doḷo-doḷompa dapot in ḷoḷabungnea ki Paulus noginsilang bo nopotaau kon i monia soaḷ naonda in ki Allah momarenta saḷaku Datu. Sia in nobaca kon tontagá inta pinais kon buk i Musa, bo buk i nabi mita sinbá mosia in mopirisayadon kon i Yesus inta ain pinotaa-taaunea mako tua.