NEHEMIA 3:22 - Alkitab Singog In Mongondow Masa In Tanaa

^22-26 Tongonumai nosilai in dinding noiduduimai in sinompia in imang mita kon bonu in pipidan noiduduimai naa: Imang mita inta nogutun diá noyayú nongkon Yerusalem. Ki Benyamin bo ki Hasub: dinding kon muna in baḷoi monia. Ki Azarya ki adí i Maaseya inta ki adí i Ananya: dinding kon diug in baḷoinea. Ki Binui ki adí i Henadad: dinding nongkon baḷoi i Azarya noidapot kon siku in dinding. Ki Palal ki adí i Uzai: dinding nongkon siku in dinding bo ḷangkeang in komaḻig kon dotá in ḻimonikannea, kon diug in dangkuḷon in poḷoḷukadan. Ki Pedaya ki adí i Paros: dinding noidapot in kon muna in Bonawang Tubig kon dotá in pomukaan bo ḷangkeang poḷoḷukadan kon Baḷoi Tuhan. (Diá noyayú nongkon tua oyúon in butá inta tangoinea in Opel, pogogutunan in intau mita inta mogogundoi kon Baḷoi Tuhan.)

NEHEMIA 3:22 Iomraidhean Croise

NEHEMIA 12:28

Dá noyosipundon in mododondong mita nongkon motoḷuadí mita in Lewi tua, pinomayá nongkon butá tampat pinogutunannea kon diug in Yerusalem, andeka nongkon kotá mita inta kon diug in Netopa,

NEHEMIA 6:2

Dá ki Sanbalat bo ki Gesyem nokidia mangoi in undangan kon inakó sinbá mamangoi moyodungkuḷ monia kon ḻipú tobatú kon Ḷopá in Ono. Táe kinotaauanku kon mosia tua in moniat mopobodito kon inakó.