NEHEMIA 2:18 - Alkitab Singog In Mongondow Masa In Tanaa

¹⁸ Bo inoumanku kon i monia naonda in ki Allah notuḷung kon inakó bo onu inta pinoguman i datu kon inakó. Mosia in notubag, “Koḻigai momangkoidon in kita moposindog!” Bo nosadiadon in mosia momangkoi mogaid.

NEHEMIA 2:18 Iomraidhean Croise

SAMUEL 2 2:7

Pokoroton in ginamu bo umurandon kobaḻí intau mita inta mongobarani umpaka ki datu monimu ain minatoi, táe intau mita in Yohuda ain noduí kon inakó nobaḻí datu monia.”

TAWARIKH 1 11:10

Naa in tangoi in porwira mita i Daud inta ponango-nangoian. Takin bayongan in rayat in Israel, mosia in noḷongasidon totok sinbá ki Daud in mobaḻí datu ná inta ain pinodandi i Tuhan. Bo mosia in umuranbí moibog kon pomarentaannea.

TAWARIKH 1 19:13

Pokorigon in gina! Koḻigai in kita moḷongasi takin mokopobarani sin kasaḷamatan in bangusa naton bo kasaḷamatan in kotá mita i Allah. Igumon mako ki Tuhan in mogaid kon onu inta kinoibog-Nea.”

TAWARIKH 2 32:5

Bo ki datu in noginropot kon poḷoḷukadan in kotá pinongin nonompia kon dindingnea, noposindog in ḷangkeang mita kon tudunea bo noposindog in dinding ibanea kon ḷuai. Koḻikud intua nonompia doman in sia kon dinding inta pinosindognea kon tudu in butá inta pinomumbun kon dotá in pomukaan kon dotá in Yerusalem koyongan. Nopotabá doman in sia nokiaid in nobayong totok in pandong bo kaḻeaw.

EZRA 6:22

Pitu nosinggai in koonggotnea in mosia takin sanang in gina norame kon Singgai moḷoben in Roti diá Iragian. Mosanang totok in gina monia sin ki Tuhan ain nopobaḻí kon i datu in Asyur mopia in gina kon i monia dá notuḷungdon kon i monia kon oaidan noposindog bui in Baḷoi Tuhan, Allah in Israel.

NEHEMIA 2:8

Koḻikud intua, noigum doman in akuoi kon surat ogoi kon i Asap, intau inta moḷoḷukad kon kayuon in dodatuan, sinbá sadiaannea in kayu inta pakéon pogaid kon ḷoḻingkop in bonawang dinding kon diug in Baḷoi Tuhan, bo pakéon kon dinding in kotá bo baḷoi inta pogutunanku. Onu in pinoigumku nodait dinuduian i datu, sin ki Allah in notuḷung kon inakó.

EPESUS 6:10

Naa in singogku pangabisan, paké in ropot inta nouḻí monimu nongkon kawasa i Tuhan, sin moiko in notobatúdon takin-Nea.

PILIPI 2:13

Sin ki Allahbí in mopogonú kon ginamu sinbá moibog bo mokosanggup moposanang in gina i Allah in moiko.

SAMUEL 1 23:16

Ki Yonatan in minayá nokipodungkuḷ kon inia kon tua sin mogin rigon kon pirisayanea kon sia in ḷukadanbí i Allah.