NEHEMIA 12:43 - Alkitab Singog In Mongondow Masa In Tanaa

⁴³ Kon singgai tatua nobayong in kuruban inta pinosumba kon i Tuhan. Rayat noḷunganga in gina sin binaḻídon i Allah in mosia nopia in gina. Bobay mita bo mongo adí mita in sinumakin doman norame, bo singog monia inta moḷunganga tua in kinodongogan noidapot in moyayú.

NEHEMIA 12:43 Iomraidhean Croise

TAWARIKH 2 20:13

Kon dodai intua bayongan in ḷoḷaki in Yohuda takin buḷoi bo adí monia sinimindog kon Baḷoi Tuhan.

TAWARIKH 2 20:27

Bo ki Yosapat nonongganut kon bayongan in tontara nobui kon Yerusalem takin ḷunganga in gina sin ki Tuhan in nonaḷowdon kon bayongan in musung monia.

TAWARIKH 2 7:10

bo nopoikoḷomai kon singgai, kon singgai in doyowa nopuḷú botoḷú buḷan noginpitu, ki Salomo nopotabá in intau mita tatua nobui. Nopia in gina monia kon bayongan inta mopia inta inaidan i Tuhan kon bangusa in Israel umat-Nea, kon i Daud bo kon i Salomo.

EZRA 3:13

dá diádon motaau poyoposion in goḷokap ḷunganga in gina bo ombaḷ. Moḷangon totok in singognea, dá kodongogan modapot in moyayú.

NEHEMIA 12:27

Naonda in dinding Yerusalem sinoguḷapatandon, intau mita in Lewi in inoiní nongkon bayongan in tampat pinogutunan monia, sinbá dumudui moporame kon tua takin dondong sukur monia mopomaké in musik in gambus bo kecapi.

NEHEMIA 12:42

kon tumi monia dumuduianmai in ki Maaseya, ki Semaya, ki Eleazar, ki Uzi, ki Yohanan, ki Malkia, ki Elam bo ki Ezer. Mododondong nodondong kon bonu in tongganut i Yizrahya.

AYUB 34:29

Aka ki Allah in monantúdon kon tongá kibio-biómai, diábí tobatúmai in intau mokobaḻí mosingog kon i-Nia. Aka mogadop in Sia, diábí tobatúmai intau in mokouḻí kon i-Nia.

MAZMUR 27:6

Tanaa akuoi in nountung kon musung inta kon ḻibukumai; dá takin goḷokap takin pia in gina pinosumbaku in kuruban sukur kon Baḷoi-Nea; akuoi in nodondong bo nodayow kon i Tuhan.

MAZMUR 28:7

Ki Tuhan in mogogoḻiung bo mododuḷuku, akuoi in mopirisaya kon i-Nia. Sia in notuḷung bo nopoḷunganga in ginaku, akuoi in nodayow kon i-Nia pinongin dondong sukur.

MAZMUR 9:2

Takin ḻimbatú in gina akuoi moibog mopoyaput in sukur kon ini-Mu o Tuhan, bo mopotaau in oaidan-Mu inta mokoherang.

MAZMUR 92:4

sindaḷan mokuti kon gitar mopuḷú in tali, takinan in gambus bo kecapi.

YESAYA 61:3

sin mobogoi in pia in gina bo ḷunganga in gina kon intau inta morobonoḷ in gina bo nonogumatoi; sin momaḷui kon inta mokoajar kon gina monia mobaḻí dondong dodayow. Mosia in nádon pangkoi in kayu tobatú inta pinomuḷa tontaní i Tuhan. Mosia in mogaidbí kon onu inta mopia bo mobanar, dá ki Tuhan in poḷantudon.

YEREMIA 31:13

Kon dodai intua mongodeaga mita in motayok takin kinoibog in gina. Guyanga bo tayow mobiag tumpaḷa moḷunganga in gina, sin Akuoi in moḻipoibí kon i monia. Kuyang in gina monia baḷuian-Ku in pia in gina, robonoḷ in gina baḷuaian-Ku in ḷunganga in gina.

YEREMIA 33:11

Táe kon tampat mita tatua in kodongoganbí bui in singog ḷunganga bo pia in gina takin dowawá in ponikaan. Kodongoganbí doman in dondong in intau mita inta nodia kon kuruban sukur kon Baḷoi-Ku. Mosia in mogumanbí, ‘Posukurdon kon i Tuhan Inta Totok in mokawasa, sin mopia in Sia bo tabi-Nea in mononoi.’ Butá tanaa in baḻíon-Kubí mobiag motompia ná dungkuḷ. Akuoi, ki Tuhan, ain noguman.”

PINOGIAPAN 10:10

Ná doman tua in kon singgai mita poramean, ramean mita Buḷan Mobagu bo porayaan mita monimu ibanea, torompet tatua musti irupon kon dodai in moiko moposumba in kuruban payongon bo kuruban podamean kon i-Nakó. Dá tuḷungan-Ku in moiko. Akuoi in ki Tuhan Allahmu.”

MATIUS 21:15

Táe naonda imang mita itoi bo mototundú mita kon agama nokoontong kon soaḷ mita mokoherang inta inaidan i Yesus tatua bo mokodongog kon mongoadí mita nomaḷú kon bonu in Baḷoi Tuhan, “Saḷamat kon i Adí i Daud!” Dá mosakí totok in gina monia.

MATIUS 21:9

Bo intau moantó inta minaya-mayá kon muna-Neamai bo inta dumuduianmai kon tumi-Nea sindaḷan nomaḷú, “Saḷamat kon i Adí i Daud! Binarakatandon in Sia inta namangoi kon bonu in tangoi Tuhan! Dayowdon in ki Allah Inta Totok Moḷantud!”

YOHANES 16:22

Natuabí doman in moiko: Tanaa mako mosusapabí in gina monimu, táe buipabí in Akuoi moyodungkuḷ monimu, dá moḷunganga in gina monimu; bo diábí tobatúmai intau in motaau mogamá kon ḷunganga in ginamu tatua.

EPESUS 5:19

Pakédon in singog mita inta nongkon Mazmur, dondong inta pinodayow kon i Allah bo dondong rohani, kon wakutu in moiko moyosingog. Kosanang in gina bo mopodondong in dodayow kon i Tuhan.

YAKOBUS 5:13

Aka kon sigad monimu oyúon in kinoantugan in roriga, yo musti in sia mosambayang. Aka oyúon in moḷunganga, yo musti in sia modondong modayow kon i Allah.

SAMUEL 1 4:5

Naonda in Poti Dodandian tatua nodapot kon pinononḷoḷaigan, norogiowdon noropot in intau in Israel, nodapot in nodandú in butá.