NEHEMIA 12:36 - Alkitab Singog In Mongondow Masa In Tanaa

³⁶ Kon tuminea dumuduianmai in agat mita nongkon inanakannea, ki Semaya, ki Azareel, ki Milalai, ki Gilalai, ki Maai, ki Netaneel, ki Yohuda bo ki Hanani. Mosia komintan in nodia kon pakakat mita in musik notongkai ná inta pinogogitog i Datu Daud, mogogundoi i Allah tua. Ki Imang Ezra inta nonotaau totok in Hukum i Allah tua, in minayá kon muna in pipidan tatua.

NEHEMIA 12:36 Iomraidhean Croise

TAWARIKH 1 23:5

4.000 in moḷoḷukad, bo 4.000 doman in modayow kon i Tuhan mopomaké in pakakat mita in musik inta ain sinadia.

TAWARIKH 2 8:14

Podudui kon atorang mita i Daud ki amánea, ki Salomo in nonantú kon oaidan pomuḷoi in singgai in imang mita bo intau mita in Lewi inta musti mopodondong in dondong dodayow kon i Tuhan bo mobantung kon imang mita mopobayá in upacara mita ibada. Bo moḷoḷukad mita doman in Baḷoi Tuhan in sinilainea kinolompok sin moḷukad kon batúan in bonawang, pinodudui in topotundú i Daud mogogundoi i Allah.

EZRA 7:1

Tongonumai notaong noiduduimai kon tua, kon dodai in ki Artahsasta nomarenta nobaḻí datu in Persia, oyúon in ḷoḷaki tobatú tangoinea in ki Ezra, nongkon buí i Imang Moḷoben ki Harun. Pipidan in pinomuíannea nongkon ḻimonag bo pinoonik in noiduduimai naa: Ki Ezra Ki Seraya Ki Azarya Ki Hilkia

EZRA 8:1

Naa in tangoi in tongguḷu mita in inanakan inta iḷumbú kon Babel bo nobui noyotakinku, ki Ezra, minayá in Yerusalem kon dodai in ki Artahsasta nomarenta nobaḻí datu:

NEHEMIA 12:24

Kon bonu in tongganut i Hasabya, i Serebya, i Yesua, i Binui bo ki Kadmiel, intau mita in Lewi sinilai kon bonu in paanan mita. Pomuḷoi mako doyowa nopaanan in modayow kon i Tuhan bo mopoyaput in sukur kon i-Nia mositubagan, podudui in atorang i Datu Daud, mogogundoi i Allah tua.

AMOS 6:5

Mopia in gina monimu in momia kon dondong, ná inta inaidan i Daud, bo moiko in mopodondong in dondong tatua takinan in kecapi.