NEHEMIA 10:36 - Alkitab Singog In Mongondow Masa In Tanaa

³⁶ Kami in modiabí kon adí nami ḷoḷaki inta guya-guyang kon imang mita inta kon Baḷoi Tuhan sin posarakan kon i Allah, podudui in atorang in hukum. Kami in mobogoi doman in ki adí in sapi, ki adí in domba andeka ki adí in bembé nami inta dungkuḷ totok pinononggadí.

NEHEMIA 10:36 Iomraidhean Croise

TAWARIKH 2 31:5

Naonda in parenta tatua pinotaau, intau in Israel nodia mangoi kon Baḷoi Tuhan in oogoi mita nongkon bungai in boyó monia inta dungkuḷ, tuata in topong torigu, anggur, ḷana in zaitun, biluk, bo bungai in boyó ibanea. Mosia in nodia doman kon mopuḷú noporosen nongkon kapunyaan monia.

NEHEMIA 12:44

Kon dodai intua tongonumai intau in pinoki ḷukadan in gopot mita inta pinotagúan kon tongkaaḷ tampat pototagúan kon sumbangan mita ogoi kon Baḷoi Tuhan, noitakin doman in sosumba mopuḷú noporosen bo bungai in boyó inta dungkuḷ kon pomuḷoi in taong. Moḷoḷukad mita tatua in kitogi totaau mosipun kon sumbangan mita tatua nongkon gobá mita kon diugmai in kotá mita. Sumbangan mita tatua in ogoi monia kon imang mita bo intau mita i Lewi, podudui in atorang in Hukum. Intau mita in Yohuda mohoromatbí kon imang mita bo intau mita in Lewi tatua,

NEHEMIA 13:5

Ki Elyasib in nobogoi in gopot moḷoben tobatú kon i Tobia inta sabanarnea in sinondíbí sin potagúan kon sosumba gandum, kamania, pakakat mita inta pakéon kon Baḷoi Tuhan, sosumba inta ogoi kon imang mita, persepuluhan gandum, anggur bo ḷana zaitun, inta silaion kon intau mita in Lewi, kon mogogogitog in musik bo moḷoḷukad kon ngara in Baḷoi Tuhan.

IḶUAIAN 13:2

“Posumbadon in bayongan adí ḷoḷaki inta guya-guyang kon i-Nakó. Bayongan in adí ḷoḷaki guya-guyang Israel, bo bayongan in bobiagon koḷakian inta muna pinogadí, tua in Akuoi in kitogi.”

IḶUAIAN 23:19

Pomuḷoi in taong moiko in musti modia mangoi kon baḷoi i Tuhan Allahmu in gandum inta muna-munamai iratab monimu. Tapú in adí in domba ande tapú in adí in bembé diábí motaau poyodungúon takin tubig in teté i inánea.”

IḶUAIAN 34:19

Bayongan adí ḷoḷaki inta guya-guyang bo bobiagon koḷakian inta muna pinogadí tua in Akuoibí in kitogi,

MALEAKHI 3:10

Diadon in mopuḷú noporosenmu komintan kon Baḷoi-Ku sinbá oyúon in kaanon mobayong totok kon tua. Tungkuḷaidon in Akuoi, dá ontongbí monimu kon Akuoi in momukat kon ḷoḻingkop mita in soroga bo mobogoi kon i monimu in bayongan inta mopia.

GALATIA 6:6

Intau inta notarima kon totundú i Kristus, musti mosilai doman kon i gurunea kon bayongan inta mopia, inta oyúon kon inia.

ULANGAN 12:6

Kon tampat tatuata in podiaan monimu kon kuruban payongon takin kuruban mita ibanea, sosumba mopuḷú noporosenmu takin sosumba mita ibanea, kuruban poguboḻi kon dandimu, kuruban ibogmu tontaní bo adí in sapi bo bembé dombamu inta muna pinogadí.