NAHUM 1:4 - Alkitab Singog In Mongondow Masa In Tanaa

⁴ Sia in nongguak kon dagat bo nobaḻí nogiot, bayongan in ongkag iningkagan-Nea komintan. Buḷud in Karmel bo rawang mita kon Basan nobaḻídon noḷogat bo kon Libanon noḷaḷowdon in bayongan bungang.

NAHUM 1:4 Iomraidhean Croise

KINOBAḺIAN 8:1

Ki Allah in diábí nokoḻiong kon i Nuh bo bayongan in mahaḷuk inta noyotakinnea kon bonu in uangga moḷoben tatua. Binaḻí i Allah in tompot nogirup, dá tubig tatua in momangkoidon momiot.

SAMUEL 2 22:16

Omonaganmai totok in dagat inontong bo aip in butá nobukat kon tungkuḷ in ki Tuhan nongguak kon musung-Nea takin torú.

AYUB 38:11

Guman-Ku kon inia, ‘Naa in sigadnea. Dika taḻibanmu! Kon naa in pogogaian in bokoḷmu mita inta moḷoben.’

MAZMUR 104:7

Kon dodai in ginuakan-Mu, tubig tatua noiḻig, noiḻig notorú popisí in doḷodok in singog-Mu.

MAZMUR 106:9

Podudui kon parenta-Nea Dagat in Gelagah noingkag, Sia in nodia kon umat-Nea minayá nongin dagat, naonda bo minaya-mayá nongin padang gurun.

MAZMUR 114:3

Dagat in Gelagah nokoontong kon i-Nia bo noḷagui, Ongkag in Yordan nogogai in noiḻig.

MAZMUR 114:5

Nongonu degá, ei dagat, nodapot in iko in noḷaguibí, bo Ongkag in Yordan nogogai noiḻig?

MAZMUR 18:16

Apad in dagat inontongdon bo aip in butá nobukat kon dodai in ki Tuhan nongguak kon musung-Nea pinongin torú.

MAZMUR 74:15

Iko in nopoiḻig in bokaká bo ongkag; ongkag inta moḷoben iningkagan-Mu.

YESAYA 33:9

Ḻipú sinaḷáan nobaḻídon noingongow. Kayuon mita in Libanon kinoantugan in takit, bo Ḷopá in Saron inta moḷumbá mobaḻí naonda bo padang gurun. Kon Basan bo kon Buḷud in Karmel daun mita mongototak.

YESAYA 42:15

Buḷud bo tombuḷudnea in baḻíon-Ku moḷogat, bayongan in pinomuḷanea iḷaḷowan-Ku. Ḷopá mita in ongkag binaḷuian-Ku nobaḻí padang gurun, Bayongan in danow iningkagan-Ku.

YESAYA 44:27

Akuoibí inta noguman kon apad in dagat: Kogiotdon! Moibog in Akuoi monggiot kon ongkagmu mita.

YESAYA 51:10

Iko doman inta nogingkag kon dagat, tubig in baḷangon inta modaḷom. Iko in nomia kon daḷan nongin tubig tatua, sinbá intau mita inta posaḷamaton motaau ḷumoḷan.

YEHEZKIEL 30:12

Ingkagan-Kubí in Ongkag in Nil bo mobogoi kon sinangkub in Mesir kon intau mita moraat. Intau mita ango-angoi potabá-Kubí moyompat kon sinangkub in butá tatua. Akuoi ki Tuhan, ain nosingog.”

YEHEZKIEL 38:20

Bayongan in toyá bo ḷagapan, bayongan in mahaḷuk moḷoben bo mointok, bo bayongan in intau kon dunia naa in mourotbí mako in ondok in tumayow kon i-Nakó. Buḷud mita in motabibí, irib mita in mongoḻitubí bo bayongan in dinding in moobatbí.

AMOS 1:2

Naa in inta pinoguman i Amos, “Ki Tuhan in noganggor nongkon Tombuḷud in Sion, singog-Nea in modorasing nongkon Yerusalem. Rawang mita in bonok iḷumogat, bonok kon Buḷud in Karmel inimingkagdon komintan.”

AMOS 5:8

Ki Tuhanbí inta nomia kon tundi mita kon toḷungayá – tundi Belantik bo tundi Kartika. Sia in nomaḷui kon sindip nobaḻí bayag bo singgai nobaḻí doḷom; tubig nongkon dagat pinobutak-Nea kon toba. Inta nogaid kon tua mita tangoi-Nea in ki Tuhan.

MATIUS 8:26

Sia in noguman kon i monia, “Nongonu sin moondokbí in moiko intau inta diá totok mopirisaya?” Onda intua nobangon in ki Yesus bo sinumorú kon tompot bo danow tatua, indoianmai yo diádon nogirup in tompot tatua bo danow in noḷonong totok.

YOSUA 3:16

dá kon dodaipa doman tuata torú in tubig tatua nobontow. Nongkon uḷuan in tubig noyayú in kinosipunan tubig, tubig nosipun kon Adam, kon kotá tobatú inta kon ḻimako in kotá in Sartan. Tubig inta kon sioḷan inta noiḻig ná Laut Mati nobontowdon, dá umat in Israel iḷumoḷandon kon butá noingkag noyogintayowan in kotá in Yerikho. Imang mita inta nomotaan kon Poti Dodandian tatua umuranpabí sinimindog mako kon yua-yuak in ongkag tatua nodapot in bayongan umat in Israel noiḷoḷandon komintan.