MOHOHUTUBA 4:1 - Alkitab Singog In Mongondow Masa In Tanaa

¹ Onda intua sinaridianku bui in bayongan aid diá moadil inta nobaḻí kon dunia naa. Intau mita inta iroriga nongombaḷ bo diá in moibog motuḷung, popisí in intau mita inta mopororiga tua in kokawasa moḷoben.

MOHOHUTUBA 4:1 Iomraidhean Croise

AYUB 16:4

Aka kuma bo moiko nion in akuoi, bo akuoi in moiko, dá motaaubí doman in akuoi mosingog ná tatua. Yagi-yagidon in singogonku; totokbí in momombiḻing akuoi.

AYUB 35:9

Intau mita inta dinorot, in kumarakbí; mosia in momaḷú mokituḷung.

AYUB 6:29

Dika mopoaid kon inta diá motuḻid, kosadardon! Dika mopotaḷá kon inakó, akuoi in totuubí kon diá kotaḷá.

AYUB 9:24

Dunia in inogoi i Allah kon inta mongoraat, bo hakim mita binilogan-Neadon komintan. Ki Allah in nogaid kon bayongan tanaa, aka deeman Sia, yo ki inepa?

MAZMUR 12:5

inta moguman, “Kami in mongawasa takin dilá nami! Onukabí motaaubí singogon nami, bo diábí in mokoḷamboi!”

MAZMUR 142:4

Kon dodai in akuoi gogió bo kobuḻian in kamang, kinotaauan-Mu mongo onu in musti aidanku. Kon daḷan inta musti bayáanku, musung inumado-adop notaan kon potait kon inakó.

MAZMUR 142:5

Kon dodai in akuoi nobobui kon sikumai, diábí in inontongku in motuḷung kon inakó. Diábí in nogoḻingoi kon inakó, andeka inta nopandungmai kon inakó.

MAZMUR 42:3

Akuoi in mokotanob kon i Allah inta nobiag, toonu in motaau in akuoi mayá moibada kon Baḷoi-Nea?

MAZMUR 42:9

Igumon mako ki Tuhan mopoontong in tabi-Nea kon tungkuḷ in singgai, sinbá kon tungkuḷ in doḷom mokopodondongdon in akuoi, bo mosambayang kon i Allah pangkoi in kobiaganku.

MAZMUR 69:20

Kinotaauan-Mu kon akuoi in totokbí in irebeg, siningkuḻe bo iraa-raatmai, inontong-Mubí in bayongan in musungku.

MAZMUR 69:21

Singkuḻe mita ain nokoinggamá kon ibog in ginaku, bo diádon in kamangku. Sinayakku in totabian, táe diá in mangaḻenea, notayak in akuoi kon poḻipoi, táe diá nokouḻí.

MAZMUR 80:5

O Tuhan Allah Inta Totok in mokawasa, dapot in toonu Iko in tumorú, umpaka umat-Mu mosambayang?

IḶUAIAN 1:16

Guman i datu in Mesir, “Kon tungkuḷ in moiko motuḷung kon bobay mita in Ibrani mononggadí, yo toropdon in naa: Aka adí inta pinononggadí tatua bo ḷoḷaki, yo ḻimod in adí tatua! Táe aka bobay yo pomayádon mako mobiag.”

IḶUAIAN 1:22

Dá ki datu in nomarenta nanaa kon bayongan in rayatnea, “Bayongan adí ḷoḷaki intau Ibrani inta bagu pinononggadí musti pogonag kon Ongkag in Nil, táe bayongan adí monia bobay pomayádon mako in mobiag.”

AMSAL 19:7

Intau bogá poompáanbímai i utatnea, apadoman yobayatnea. Naondaka in pororamujinea, sia in diábí mokogamá kon gina monia.

AMSAL 28:3

Intau inta nongawasa inta mondorot kon intau bogá, naonda bo uyan morogot inta momoguyaat kon bungai in boyó.

AMSAL 29:2

Aka intau moadil in momarenta, mopia in gina in rayat. Táe aka intau moraat in mongawasa, yo mororiga in rayat.

MOHOHUTUBA 3:16

Oyúonpa doman in inontongku kon dunia naa: kon onda in musti oyúon in koadilan bo kopiaan, yo kon tua doman oyúon in aid moraat.

MOHOHUTUBA 5:8

Modapot in kobiagan i datu noitogotbí kon bungai in boyó.

MOHOHUTUBA 7:7

Aka intau mopandoi bo monguboḷ, yo nobodokdon in aidnea; aka intau bo motarima kon sogó in pelekara, yo nogoguyaatdon in raiannea.

MOHOHUTUBA 8:9

Bayongan naa in inontongku kon tungkuḷ in sinaridiku in bayongan inta nobaḻí kon dunia naa. Oyúon intau mopomaké in kawasa nea sin mopobodito kon tumpaḷa intau.

YESAYA 5:7

Sin gobá in anggur i Tuhan Inta Totok in Mokawasa in umat in Israel, bo intau mita in Yohuda in pangkoi in anggur inta pinomuḷa-Nea. Kon i monia iharap-Nea mako in aid inta moadil, táe tongábí aid moraat. Kon bonu in kamang-Nea mosia in moposindogbí in inta mobanar, táe tongábí oyúon in karak moigum kon koadilan.

YESAYA 51:23

Roriga tatua in ogoi-Ku kon inta nondorot kon inimu, inta nokoimontandon in nokiposiug kon i monimu kon butá, bo inta noritak kon i monimu, ná momia bo moiko nion in daḷan inta bayáan in intau.”

YESAYA 59:7

Moiko in umuranbí monomayá kon inta moraat, bo moibogdon ḷagi mogaid kon tua. Diábí in ondok moiko in moḻimod kon intau inta diá kotaḷá. Kon ondakabí in bayáanmu, moiko in monaḷámaidon kon inta morumbun bo inta mokoyopú.

YEREMIA 16:7

Diábí doman in moibog mogaid kon ponusaan sin moḻipoi kon intau inta nonogumatoi. Diábí in dinumudui nonogumatoi nodapotbí kon intau inta kinopatoian i amá andeka i inánea.

OMBAḶ 1:16

Tuamai in noḷabú in ḷuáku, diá in moginrigon kon gina bo moḻipoi. Bangusaku in kinobuḻiandon in bayongan in yagi-yagi, popisí in kawasa in musung in moḷobe-ḷoben.

OMBAḶ 1:17

Akuoi in notonggó kon ḻima sin mokituḷung, táe diábí in noḻipoi. Nongkon bayongan in tampat, ki Tuhan nopotabá mangoi in musung; mosia in namangoi sin momarang kon inakó. Akuoi in pinomia naonda bo yoyatan, pakakat inta mokorongó kon yua-yuak monia.

OMBAḶ 1:2

Kinoouput in doḷom sia in mongombaḷ moajar in gina, ḷuánea in motutug kon putongi. Diá tobatúmai in kon sigad in yobayatnea mita in moibog moḻipoi kon inia. Sia in Pinomaḻidawan in yobayatnea mita inta ain nonoḻikud bo nobaḻídon musung.

OMBAḶ 1:9

Kinononajisnea in noniatadon táe diábí pinandungneamai in onu inta ain nobaḻí kon inia. Motoyang totok in kinoumpagannea, táe diábí tobatúmai in nopoḻipoi kon inia. Dá nopoigum in sia kon totabi i Tuhan, popisí in musungnea mita in nountungdon.

AMOS 3:10

Ki Tuhan in noguman, “Intau mita tatua nomonu kon komaḻig monia in pakakat mita inta inagow takin aid moḻingá. Nodapot in mosia totokbí in diá mojujur.

AMOS 3:9

Potaaudon in naa kon intau mita inta nogutun kon komaḻig in Mesir bo Asdod, “Poyosipundon kon buḷud mita kon diugmai in Samaria, bo indoiaidon in kotombaukan moḷoben bo pogagowan inta nobaḻí kon tua.”

MALEAKHI 2:13

Bo naa in aidmu inta ibanea. Mezbah i Tuhan in pinuḻingandon monimu in ḷuá; moiko in nongombaḷ bo mogamui sin ki Tuhan in doídon kon kurubanmu mita.

MALEAKHI 3:18

Umat-Ku in mokoontongbí doman kon yoposi in ukur in intau mopia bo intau moraat, kon sigad in intau inta mogundoi kon i-Nakó bo inta diá.”

MALEAKHI 3:5

Guman i Tuhan Inta Totok in mokawasa, “Akuoi in mamangoibí kon inimu sin mohakim. Akuoi in ḷagidon mobaḻí sakusi kon mososihir mita, kon intau mita inta mototuaḻingan, inta noguman kon uboḷ, inta notombogá kon dodai in nobogoi in gaji kon intau inta sinondanan, inta nondorot kon intau boba-bobay, uno-unon, bo intau ango-angoi, bo kon intau mita inta diá mohoromat kon i-Nakó.”

MATIUS 26:56

Táe totuu kon tua in mustibí mobaḻí sinbá motompodon onu inta aindon pinais kon bonu in buk nabi mita.” Kon tua dumodudui-Nea noḷagui komintan nonaḷámai kon i-Nia.

ULANGAN 28:33

Bangusa ango-angoi in mogamádon kon bayongan bungai in boyómu inta nouḻí monimu takin iyumoyiga in nogaid, táe moiko tontaní in diábí mokouḻí kon onu bo onu koḻikudbí in umuran tonggataan bo popoaidan monia in aid moraat.

ULANGAN 28:48

Tuamai moiko musti mogundoi kon musung mita inta pinoangoi i Tuhan sin moḷawang kon i monimu. Moiko in aputondon in gogoy, yogang bo mopilang bo diá koonu bo onu. Ki Tuhan in mondorot totok kon i monimu modapot in moiko moyopú.

YAKOBUS 5:4

Diá inuboḻian monimu in gaji in intau mita inta nogaid kon gobámu. Tanaa indongogaidon in amui monia! Intau mita inta nosipun kon hasil in gobámu, kinumarak nokituḷung bo karak monia tua ain kinodongogan i Allah, Tuhan inta Totok in Mokawasa.

HAKIM MITA 4:3

Ki Yabin kokereta in parang inta pinomia nongkon uatoi, 900 in kobayongnea. Doyowa nopuḷú notaong in koonggotnea sia in nononggata kon intau in Israel takin dodia moraat. Bo mosia in nokuani nokituḷung kon i Tuhan.