MOHOHUTUBA 11:1 - Alkitab Singog In Mongondow Masa In Tanaa

¹ Paké in doitmu kon totayakmu kon ḷuai in ḻipú. Notantúbí kon mokouḻí in iko kon untung kon singgai moiduduimai.

MOHOHUTUBA 11:1 Iomraidhean Croise

AMSAL 11:18

Kauntungan in intau moraat in kauntunganbí inta diá in mangaḻenea, kauntungan in intau inta nogaid kon inta mopia in kauntungan inta moḷoben in mangaḻenea.

AMSAL 19:17

Motuḷung kon intau bogá notongkaibí in nopoḷuan kon i Tuhan; bain ki Tuhan doman in motuḻí kon tua.

AMSAL 22:9

Intau inta mopia in gina barakatan i Tuhan, tuamai mosilai in sia kon rijiki kon intau inta kinodaitan.

MOHOHUTUBA 11:6

Ponabudon in bibitmu kon dodai in doḷo-doḷom bo dika mogogai in doḷom. Sin diábí kotaauan naton mongo bibit táonda in mopia in kobobiagnea. Dika-dika bo tumpaḷabí in sia mobiag motompia.

MOHOHUTUBA 3:6

Ki Allah in nonantú kon wakutu mokodungkuḷ bo wakutu kobuḻian, wakutu motagú bo wakutu kinotaḷu-taḷuinea,

YESAYA 32:8

Táe intau inta motuḻid in ginanea monomayá kon soaḷ mita inta mopia bo mogaid kon inta mopia doman.

IMAMAT 19:25

Bain kon taong noginḻima bo motaaudon moiko mokaan kon bungainea. Aka duduian monimu in bayongan atorang tatua, yo bayongan pangkoi in ayopmu modugangdon modatog in bungainea. Akuoi in ki Tuhan Allahmu.

MATIUS 10:13

Aka tarimaan monia, yo salammu tatua mobaḻí barakat kon i monia. Táe aka diá tarimaan monia, yo barakatnea in mobui kon inimu.

MATIUS 10:42

Bo ki ine in mobogoi in tubig noanai inumon, umpakabí tongá topalo kon intau inta bogá naa, sin sia in dumodudui-Ku, poguman-Ku kon i monimu, popirisayabí kon sia tua in mokouḻíbí kon boḻi in pinogaidannea!”

MATIUS 25:17

Ná doman tua in simpaḷ inta nokouḻí kon doyowa noribu, pinobaragunanea doman intua, sahingga in nokouḻí doman kon kauntungan doyowa noribu.

MATIUS 25:40

Datu tatua in motubag kon i monia, ‘Bá poguman-Kudon kon i monimu: onu inta aindon inaidan monimu kon i utat-Ku mita inta totok in bogá tanaa, yo tua in notongkaibí in pinogaid monimu kon i-Nakó!’

LUKAS 14:14

Aka natua yo iko in barakatan sin intau mita tatua in diá mokotuḻí kon oaidmu inta mopia. Oaidmu inta mopia tua in ki Allahbí in motuḻí kon wakutu in intau mita mopia tatua biagon bui nongkon kinopatoiannea.”

KORINTUS 2 9:6

Torop kopira in singogku naa! Intau inta nomuḷa kon topiḻik, topiḻik doman in mouḻínea, táe intau inta nomuḷa kon nobayong, yo mobayong doman in mouḻínea.

IBRANI 6:10

Sin ki Allah in moadilbí. Diábí koḻiongan-Nea in onu inta ain inaidan monimu kon i-Nia, bo tabi inta pinoontong monimu kon i-Nia wakutu in notuḷung kon utat mita inta tumpaḷa mopirisaya kon i Kristus tungkuḷ intua bo masa in tanaa.