MIKHA 5:7 - Alkitab Singog In Mongondow Masa In Tanaa

⁷ Intau in Israel inta nogutunpa kon yua-yuak in bangusa mita in mobaḻídon naonda bo singa kon yua-yuak in mahaḷuk mita kon kayuon andeka kon yuak in paanan in domba kon rawang in bonok. Singa tatua in tumuot kon yua-yuak in paanan in domba tatua bo moritak poḷat momera-merak; diábí in mokopomuḻi kon domba mita tatua.

MIKHA 5:7 Iomraidhean Croise

SAMUEL 2 17:12

Mouḻíbí naton in ki Daud kon ondakabí in pinogadopannea, bo tubuon naton in sia kon dodai in diápa kotaauannea onu in mobaḻí. Diábí in mokoḷagui, pinomayá sia andeka intaunea.

MAZMUR 110:3

Kon singgai iko mamangoi takin kawasa, kon buḷud inta motusi, rayatmu in mayá takin ibog tontaní. Naonda bo oḷú doḷo-doḷom, tayowmobiag mita mamangoi kon inimu.

MAZMUR 133:3

Andeka naonda bo oḷú kon Buḷud in Hermon, inta noiḻig monag kon tombuḷud mita in Sion. Kon tuata in popoangoian i Tuhan in barakat-Nea, kobiagan modapot in mononoi.

MAZMUR 72:6

Igumon mako sia in naonda bo uyan inta noḷabú kon rawang, naonda bo uyan morogot inta nomuntad kon gobá mita.

AMSAL 19:12

Torú in datu naonda bo ganggor in singa; kopopia in datu naonda bo oḷú inta momobat kon mobobiag mita.

YESAYA 32:15

Táe komintanpa doman ki Allah in mamangoibí takin kawasa-Nea. Dá padang gurun in mobaḻídon gobá mita inta moḷumbá, bo gobá mita in mobaḻídon naonda bo kayuon.

YESAYA 44:3

Sin Akuoi in mopobutakbí in tubig kon butá inta noingkag, bo mopoiḻig in ongkag mita kon butá inta nongoguang. Akuoi in mobogoibí in kawasa-Ku kon buímu, bo momarakat kon adí bo ompumu.

YESAYA 55:10

Naonda bo uyan nongkon ḷangit, bo diá mobui monik, táe momuntadbí kon butá, mopoḷumbá bo mopobiag in pinomuḷa mita, mopomungai in inta pomuḷaan bui bo inta kaanon,

YESAYA 66:19

Akuoi in mopoukatdon in tomponuot tobatú kon yua-yuak monia. Tongosilai moyakag kon sigad monia in posaḷamaton-Ku. Mosia in potabá-Ku mayá kon bangusa mita kon butá mita inta moyayú inta diápa kon dodai in onda in nokodongog kon soaḷ Akuoi andeka nokoontong kon kamuliaan bo kawasa-Ku; mayá in Spanyol, Libia, bo Lidia takin momomiot mita inta mongotaná, minayá in Tubal bo Yunani. Mosia in mopohabar in koḷoḷoben in kawasa-Ku kon sigad in bangusa mita tatua.

YEREMIA 14:22

Dewa mita in bangusa mita diá mokopoḷabú in uyan kon butá. Ḷangit in diábí doman mopoḷabú monag in uyan podoyon kon kawasanea tontaní. Tongábí Iko in andoḷan nami. Inaidan-Mu intua komintan nobaḻí.

YEHEZKIEL 14:22

Aka kuma bo oyúon in mokoḷagui bo moposaḷamat kon i adínea mita, taridiaidon in mosia aka mosia mamangoi kon inimu. Indoiai naonda in moraat monia, dá kotaauandon monimu kon noitugatbí in aid-Ku mohukum kon Yerusalem.

YEHEZKIEL 47:1

Ḷoḷaki tatua in nodia kon inakó nobui kon ngara tumuot kon Baḷoi Tuhan. Inontongku in tubig noiḻig nongkon ḻimonag in ngara tatua nopobayá ná pomukaan, ná doman Baḷoi Tuhan inta noitayow kon dotá in pomukaan. Tubig tatua in noiḻig nongkon ḻimonag in ngara in Baḷoi Tuhan kon dotá in toḷatan nongin sí dotá in toḷatan nongkon mezbah.

YEHEZKIEL 5:5

Ki Tuhan Inta Totok in moḷantud in noguman, “Indoiai, naa in Yerusalem. Kotá tanaa in inukat-Ku kon putod in dunia, bo iḻibu in negara mita ibanea.

DANIEL 11:32

Dá takin tompobaḻiknea ki datu tatua nodondouḷug kon intau mita inta ain nonaḷámai kon agama monia, sinbá moibog motuḷung kon inia. Táe intau mita inta motoindudui kon i Allah in nobaranibí in noḷawang kon inia.

HOSEA 14:5

Ki Tuhan in noguman, “Umat-Ku inta nonuaḻing, gamáan-Ku bui bo kotabi-Ku takin ḻimbatú in gina; mosia in diá bidon torúan-Ku bui.

HOSEA 6:3

Tuamai in koḻigai in kita moḷongasi totu-totuu monotaau kon i Tuhan. Sia in notantúbí kon mamangoi kon i naton naonda bo koangoi in bayag doḷo-doḷom, bo naonda bo uyan inta nomuntad kon butá kon imbuit in pongonguyan.”

YOËL 2:32

Táe ki ine in mokituḷung kon i Tuhan, in posaḷamatonbí. Ki Tuhan in noguman, “Kon Yerusalem intau mita inta piniḻí-Ku in mosaḷamatbí.”

AMOS 5:15

Kodoídon in inta moraat, kotabidon inta mopia, bo posindogdon in inta moadil. Dika-dika bo ki Tuhan in motabidon kon intau mita inta kiagatneapa nongkon bangusa in Israel.

MIKHA 2:12

Ki Tuhan in noguman bui, “Ei umat in Israel inta ki agatneapa! Moiko in notantúbí kon sipunon-Ku bo tobatúon naonda bo domba inta mobui mangoi kon ḷantungnea. Naonda bo rawang in bonok inta nopuḻing in domba, natua doman in butámu in mopuḻingdon bui in intau mobayong.

MIKHA 4:13

Ki Tuhan in noguman, “Ei intau in Yerusalem, bayádon bo ritakaidon in musungmu mita! Baḻíon-Kubí moropot in moiko naonda bo sapi inta tungoinea uatoi bo konukunea in bitú. Moiko in morimumudbí kon mobayong in bangusa, bo kaoyúonan inta nouḻí monia kon pinogagowan in posumbabí monimu kon i-Nakó, ki Tuhan in dunia naa.”

MIKHA 4:7

Mosia in pinotungkudon bo noyayúdon nongkon ḻipúnea tontaní. Táe, nongkon intau mita inta kiagatnea tatua baḻíon-Kudon in buí inta mobagu. Mosia in mobaḻídon bangusa inta moḷoben bo moropot. Akuoi in momarentabí kon i monia kon Tombuḷud in Sion modapot in mononoi.”

MIKHA 5:3

Aka pongawasa tatua mamangoi, Sia in momarentabí kon umat-Nea podoyon kon ropot bo kawasa nongkon i Tuhan Allahnea tontaní. Umat-Nea in mobiagbí moodom, popisí in bayongan in intau kon dunia naa in mongakubí kon kawasa-Nea,

MIKHA 5:8

Israel in monaḷowbí kon musungnea mita poḷat morimumud kon i monia komintan.

MIKHA 7:18

Diábí in Allah ná Iko, o Tuhan, inta mongampung kon dosa in umat inta piniḻí-Mu inta ki agatneapa. Diábí modapot in mononoi tumorú in Iko; táe, mopiabí in gina-Mu in moponiata in tabi-Mu inta diá in obotnea tatua.

ZEPANYA 3:13

Intau in Israel inta kiagatnea, diá bidon mogaid bui kon inta moraat kon i inekabí; mosia in diá bidon monguboḷ bui bo diá bidon bui mongakaḷ. Mosia in mobiag bidon motomoman bo motompia, bo diá bidon angoian in ondok kon i inekadon.”

ZAKHARIA 14:8

Kon singgai tatua, tubig modarit in moiḻig nongkon Yerusalem; tongobotak nongkon tubig tatua in moiḻig ná Laut Mati bo tongobotaknea doman in moiḻig ná Dagat Toyuak. Tubig tatua in moiḻig kinoouput in taong, pinomayá kon sempo in pongonguyan andeka sempo in poninggai.

ZAKHARIA 9:13

Yohuda in baḻíon-Ku piot in pahlawan, bo Israel in mobaḻí piot inta sinadiadon popiot. Intau mita in Sion pakéon-Ku mobaḻí kedang; kedang tatua in pakéon-Ku pondudur kon intau mita in Yunani.”

MATIUS 28:19

Tuamai, bayádon, bo baḻídon in bayongan intau dumodudui-Ku, bo baptisdon in mosia podoyon kon tangoi i Amá, Adí, bo in Roho i Allah.

OUMAN IN RASUL MITA 11:15

Bo naonda in akuoi nomangkoidon nongonguman, Roho i Allah in noponag bo nongawasa kon i monia komintan ná inta nobaḻí kon inaton koḻipod.

OUMAN IN RASUL MITA 13:46

Táe taran-tarangan in taya dua in nosingog nanaa: “Koḻipodpabí singog i Allah naa in pinoyaput kon i monimu. Táe diá sinarima monimu, sin moiko ain noguman tontaní kon moiko in diábí patus motarima kon kobiagan mononoi. Tuamai tanaa mako taḷaan nami in moiko bo mayá kon intau ibanea.

OUMAN IN RASUL MITA 16:9

Nodoḷom monag, kon Troas, ki Paulus in nokoontong kon tobatú oontongon. Kon bonu in oontongon tatua sia in nokoontong kon intau in Makedonia tobatú sinimindog kon tayowonneamai bo totok in nopoigum sinbá mosia in mayápa in Makedonia motuḷung kon i monia.

OUMAN IN RASUL MITA 9:15

Táe ki Tuhan in noguman kon i Ananias, “Bayádon! Sin sia tua ain bidon piniḻí-Ku mobantung kon i-Nakó mopotaa-taau mako in Habar Mopia soaḷ Akuoi kon bangusa mita ibanea inta deeman intau in Yahudi bo kon datu mita bo kon intau mita in Israel.

SURAT I PAULUS KON JAMAAT RUM 10:20

Ki Nabi Yesaya nobarani doman in noguman bui nanaa, “Nanaa in pirman i Allah, ‘Intau inta diá motayak kon i-Nakó, ain nokodungkuḷ kon i-Nakó; bo Akuoi in nokipogontongdon kon i monia inta diá nopoḻibo-ḻibó kon soaḷ Akuoi.’ ”

SURAT I PAULUS KON JAMAAT RUM 11:12

Popisí in intau Yahudi kotaḷá bo doí dumudui kon kinoibog i Allah, dá intau mita ibanea in binarakatan i Allah. Apa doman hubungan in bangusa Yahudi bo i Allah in motompiadon bui; tantú lebebí moḷoben in barakat ogoi i Allah kon i monia!

SURAT I PAULUS KON JAMAAT RUM 9:30

Dá, nanaa in kasimpulannea: Bangusa mita ibanea inta deeman Yahudi in diábí moramuji konbá motompia bui in hubungan monia takin i Allah. Táe popisí in mosia mopirisaya, dá sinompiadon bui i Allah in hubungan monia takin-Nea.

KORINTUS 1 3:6

Aka ibarat pinomuḷa, akuoi in nomuḷa bo ki Apolos in nomuta-mutak, táe ki Allahbí in nobogoi in kobiagan.

ULANGAN 32:2

Poigumon mako in topotundúku mamonag naonda bo uyan, bo tosingogonku motait naonda bo oḷú, naonda bo rinsi-rinsik in uyan kon tudu in bonok, bo uyan inta morogot kon pinomuḷa mita.

HAKIM MITA 6:36

Bo ki Gideon noguman kon i Allah, “Tuhan, Iko ain noguman kon akuoi in pakéon-Mu mopoḷuat kon roriga in umat Israel.