MIKHA 5:6 - Alkitab Singog In Mongondow Masa In Tanaa

⁶ Intau in Israel inta ki agatneapa in mobaḻídon naonda bo oḷú moonow nongkon i Tuhan kon mobayong in bangusa, bo naonda bo uyan nomonag kon pinomuḷa. Mosia in umandoḷbí kon i Allah, bo deeman kon intau.

MIKHA 5:6 Iomraidhean Croise

DATU MITA 2 15:29

Kon tungkuḷ in pinomarentaan i Pekah, ki Tiglat-Pileser Datu in Asyur nogagow kon kotá in Iyon, Abel-Bet-Maakha, Yanoah, Kedes, Hazor, butá in Gilead, Galilea bo Naptali. Intau mita inta nogutun kon tua in dinianea doman nobaḻí intau mita inta dinakop bo dinia kon Asyur.

TAWARIKH 1 1:10

Ki Kus in kogadí kon adí ḷoḷaki tobatú ki Nimrod in tangoinea, sia inta nobaḻí datu motorindog inta totok in muna kon dunia.)

TAWARIKH 2 33:11

Tuamai ki Tuhan in nopoangoi in tongguḷu totokanea in tontara in Asyur sin monubu kon Yohuda. Ki Manasye in dinomok in kokarit, bo inumantungan bo dinia pinobayá in Babel.

AYUB 29:22

Mopaḷut mako mosingog in akuoi, diá bidon in paraḷu dugangan; tosingogon moitonop naonda bo totuyú in tubig in uyan.

MAZMUR 110:3

Kon singgai iko mamangoi takin kawasa, kon buḷud inta motusi, rayatmu in mayá takin ibog tontaní. Naonda bo oḷú doḷo-doḷom, tayowmobiag mita mamangoi kon inimu.

MAZMUR 72:6

Igumon mako sia in naonda bo uyan inta noḷabú kon rawang, naonda bo uyan morogot inta nomuntad kon gobá mita.

YESAYA 14:2

Mobayong in bangusa in motuḷung kon bangusa in Israel sin mobui kon butá inta inogoi i Tuhan kon i monia, bo kon tua bangusa mita tatua in mobantung kon Israel. Israel in modakopbí kon intau mita inta nokoimontandon nodakop kon inia bo momarenta kon intau mita inta nokoimontandon nondorot kon inia.

YESAYA 14:25

Intau in Asyur kon Israel butá-Ku, in yopúon-Kubí, bo inta kon buḷud-Ku mita in tokoritakan-Kubí. Poḷuaton-Kubí in bangusa-Ku nongkon pinororigaan bo nongkon bobabaan inta pinakisa kon i monia in intau in Asyur.

YESAYA 33:1

Moboditodon in musung mita naton! Mosia in mogagow umpaka diá pinogagowan, bo nomaḻidawan umpaka diá Pinomaḻidawan. Táe naonda in mopaḷut mako mogagow bo momaḻidawan, mosia tontaní in mobaḻí bidon kuruban in pogagowan bo Pinomaḻidawan.

YESAYA 37:36

Doḷom doman tua malaekat i Tuhan namangoi kon pinononḷoḷaigan in intau in Asyur bo noḻimod kon 185.000 in tontara. Nobangon monik doḷo-doḷom mayat mita monia noiukat magí mako.

YESAYA 37:37

Dá inumundokdon in ki Sanherib, datu in Asyur, bo nobui kon Niniwe.

YESAYA 6:13

Modapot in aka kon sigad in intau mopuḷú oyúonpa in tobatú inta nogutun kon butá tatua, sia in yopúonbí doman. Táe naonda bo pangkoi in nunuk aka pupuḷon yo oyúonpa in tuodnea, natua doman oyúonpa in ki agat in bangusa tatua inta nobaḻí pomangkoian in umat inta motusi.”

YEREMIA 14:22

Dewa mita in bangusa mita diá mokopoḷabú in uyan kon butá. Ḷangit in diábí doman mopoḷabú monag in uyan podoyon kon kawasanea tontaní. Tongábí Iko in andoḷan nami. Inaidan-Mu intua komintan nobaḻí.

NAHUM 2:11

Kon onda degá in kotá tatua in tanaa? Kotá inta ná angob ponondumunan in singa? Tampat popokaanan in ki adí mita in singa, tampat bobayáan in singa koḷakian bo kobaayan, tampat inta moaman kon i adínea mita?

ZEPANYA 2:13

Nopaḷut mako kon tua ki Tuhan nopomakédon in kawasa-Nea morimumud kon Asyur. Kotá in Niniwe in baḻíonbí moingongow bo butá moḷogat.

ZEPANYA 3:12

Kon tua pomayá-Kudon mako in mogutun in tobatú bangusa inta moompá in dodia, inta mopongata in totuḷung-Ku. Mosia in motaaubí in mogutun kon tua.

LUKAS 1:71

Sin in mopoposaḷamat kon i naton nongkon saturu mita naton bo nongkon kawasa in intau mita inta moyaat in gina kon i naton.

LUKAS 24:27

Onda intua nodait-Nea ininsilangan kon i monia in bayongan onu inta pinais kon Buk Motusi soaḷ Sia. Pinangkoi kon inta pinais i Musa nodapot in buk in nabi mita.

ULANGAN 32:2

Poigumon mako in topotundúku mamonag naonda bo uyan, bo tosingogonku motait naonda bo oḷú, naonda bo rinsi-rinsik in uyan kon tudu in bonok, bo uyan inta morogot kon pinomuḷa mita.