MIKHA 4:7 - Alkitab Singog In Mongondow Masa In Tanaa

⁷ Mosia in pinotungkudon bo noyayúdon nongkon ḻipúnea tontaní. Táe, nongkon intau mita inta kiagatnea tatua baḻíon-Kudon in buí inta mobagu. Mosia in mobaḻídon bangusa inta moḷoben bo moropot. Akuoi in momarentabí kon i monia kon Tombuḷud in Sion modapot in mononoi.”

MIKHA 4:7 Iomraidhean Croise

MAZMUR 2:6

Kai-Nia, “Kon Sion buḷud-Ku inta motusi aindon dinuí-Ku datu inta piniḻí-Ku.”

YESAYA 16:5

Onda intua intau tobatú nongkon buí i Daud in mobaḻí datu, bo sia in momarenta kon bangusanea podoyon kon tabi bo satia. Sia in moposindog in inta moadil bo moḷamemet in mogaid kon inta mobanar.)

YESAYA 24:23

Buḷan in simindip bo mata in singgai in diá bidon monindar, sin ki Tuhan Inta Totok in mokawasa in momarentabí mobaḻí datu. Sia in momarentabí kon Yerusalem, kon tudu in Buḷud in Sion, bo mopoontong in koagung-Nea kon itoi mita in umat-Nea.

YESAYA 6:13

Modapot in aka kon sigad in intau mopuḷú oyúonpa in tobatú inta nogutun kon butá tatua, sia in yopúonbí doman. Táe naonda bo pangkoi in nunuk aka pupuḷon yo oyúonpa in tuodnea, natua doman oyúonpa in ki agat in bangusa tatua inta nobaḻí pomangkoian in umat inta motusi.”

YESAYA 60:22

Nodapot in motoḷuadí inta mointok bo moyangkó in mobaḻíbí bangusa inta moḷoben bo moropot. Akuoi ki Tuhan in ḷagi bidon mopoaid, kon wakutu inta moitongkaná.”

YESAYA 66:8

Ki ine in nokoimontandon in nokodongog kon inta natua? Ki ine in nokoimontandon nokoontong kon natua? Táe bangusa in Israel aindon pinononggadí kon dodai in Sion nomangkoidon pomangiton.

YEHEZKIEL 43:7

“Ei intau ilo-ilow, naa in ḷoḻitúan pomomarentaan-Ku. Kon naa in pogutunan-Ku kon yua-yuak in umat in Israel bo momarenta kon i monia modapot in mononoi. Pinomayá mosia, andeka datu mita monia, diá bidon in mongotor kon tangoi-Ku inta motusi pongin mosumba kon berhala andeka pongin moḷobong kon minatoi datu mita monia kon tampat tanaa.

DANIEL 2:44

Kon sempo in pomarentaan in datu mita tatua, ki Allah kon soroga in moposindog in dodatuan tobatú inta umuran moisindog modapot in mononoi bo inta diábí kotaḷowan in bangusa taondaka. Dodatuan tatua in morimumud bo mopoyobauk in bayongan dodatuan ibanea tatua.

DANIEL 4:34

Naonda in pitu notaong inta sinantú tatua noitaḻibdon, iḷumangag in akuoi kon ḷangit, bo nosadardon bui in ginaku. Dá dinayowku in ki Allah Inta Totok in moḷantud. Inuntu bo pinomuliaku in Sia inta nobiag mononoi tua. “Ki Allah in mobaḻí datu modapot in mononoi. Sia in nongawasa modapot in kopaḷutannea.

DANIEL 7:14

Sia in inogoian in kahoromatan bo kawasa saḷaku datu, dá bayongan in intau nongkon bayongan in bangusa, inanakan bo singog in nogundoi kon i-Nia. Kawasa-Nea in modapot in mononoi, pomarentaan-Nea in diábí poḷabúon.

DANIEL 7:27

Kawasa bo koḷoḷoben in bayongan in dodatuan kon dunia in ogoi kon umat i Allah Inta Totok in moḷantud. Kawasa monia momarenta in diábí in imbuitnea bo bayongan in mongongawasa kon dunia naa in mobantungbí kon i monia takin toindudui.”

HOSEA 1:10

Bangusa in Israel in mobaḻíbí ná kobayong in bungaion kon dagat, nodapot in diá koukuran andeka diá koiyapan. Tanaa in ki Allah in noguman kon i monia, “Moiko in deemanbí Umat-Ku,” táe moiangoibí in wakutunea Sia in moguman kon i monia, “Akuoibí in ki Allah inta nobiag bo moiko in ki adí-Ku mita!”

YOËL 2:32

Táe ki ine in mokituḷung kon i Tuhan, in posaḷamatonbí. Ki Tuhan in noguman, “Kon Yerusalem intau mita inta piniḻí-Ku in mosaḷamatbí.”

YOËL 3:17

“Ei Israel, tanaa in kotaauandon monimu, kon Akuoibí in ki Tuhan Allahmu. Akuoi in nogutun kon Sion, buḷud-Ku inta motusi, Dá Yerusalem in mobaḻí doman kotá inta motusi, intau ango-angoi in diá bidon mokopotuot bui.

OBAJA 1:21

Intau in Yerusalem inta nountung in monubu kon Edom poḷat mopotungkud. Dá Akuoi ki Tuhan in momarenta mobaḻí datu.”

MIKHA 2:12

Ki Tuhan in noguman bui, “Ei umat in Israel inta ki agatneapa! Moiko in notantúbí kon sipunon-Ku bo tobatúon naonda bo domba inta mobui mangoi kon ḷantungnea. Naonda bo rawang in bonok inta nopuḻing in domba, natua doman in butámu in mopuḻingdon bui in intau mobayong.

MIKHA 2:13

Bukáan-Kubí in daḷan bo modia kon i monimu ḷumuai nongkon pinoḷumbúan. Moiko in mondangatbí kon bonawang mita bo mayá takin diá in ḷambo-ḷamboinea. Akuoi, ki Tuhan tontaní, in Datumu, bo Akuoi in modia kon i monimu ḷumuai.”

MIKHA 5:3

Aka pongawasa tatua mamangoi, Sia in momarentabí kon umat-Nea podoyon kon ropot bo kawasa nongkon i Tuhan Allahnea tontaní. Umat-Nea in mobiagbí moodom, popisí in bayongan in intau kon dunia naa in mongakubí kon kawasa-Nea,

MIKHA 7:18

Diábí in Allah ná Iko, o Tuhan, inta mongampung kon dosa in umat inta piniḻí-Mu inta ki agatneapa. Diábí modapot in mononoi tumorú in Iko; táe, mopiabí in gina-Mu in moponiata in tabi-Mu inta diá in obotnea tatua.

ZEPANYA 3:13

Intau in Israel inta kiagatnea, diá bidon mogaid bui kon inta moraat kon i inekabí; mosia in diá bidon monguboḷ bui bo diá bidon bui mongakaḷ. Mosia in mobiag bidon motomoman bo motompia, bo diá bidon angoian in ondok kon i inekadon.”

ZEPANYA 3:20

Moiangoibí in orasnea, intaumu inta noirarit in kapiton-Ku mobui. Moiko in baḻíon-Kudon ponango-nangoian kon sinangkub in butá, bo kototomomanmu in poguḻiton-Kudon bui.” Ki Tuhan in nosingogdon.

LUKAS 1:33

Bo sia in mobaḻí doman Datu kon yua-yuak in intau mita inta buí i Yakub modapot in kopaḷutan in dunia. Dodatuan-Nea in mononoi.”

WAHYU 11:15

Bo malaekat impitunea in nogirup kon torompetnea, dá kinodongogandon in singog mita inta mongoḷangon totok nongkon soroga noguman, “Kawasa momarenta kon dunia naa, masai naa kinadaiandon i Tuhan naton, bo i Datu mopoposaḷamat inta pinodandi-Nea. Sia bidon in momarenta modapot in mononoi!”