MIKHA 3:5 - Alkitab Singog In Mongondow Masa In Tanaa

⁵ Bangusaku inakaḷan in nabi mita inta nonoḻindap kon inta mopia kon intau inta mobogoi in doit, táe mosaturu bo mopoompámai kon intau inta diá mobogoi. Kon i monia nabi mita inta natua, ki Tuhan in noguman,

MIKHA 3:5 Iomraidhean Croise

AMSAL 28:21

Diábí mopia in mopoyoposi in intau; táe oyúonbí doman in hakim inta motombogá tongá popisí in bá mokouḻí kon doit topiḻik.

YESAYA 3:12

Umat-Ku in rorigaanbí in intau mopopoḷuan in doit bo daiton gamáan in mopoporente. Umat-Ku in poḷaḻeon in itoinea mita modapot in diádon kotaauannea in daḷan inta musti bayáannea.”

YEREMIA 23:27

Kai monia kamai dá pinongin togoindop mita inta inouman monia tua, umat-Ku in mokoḻiongbí kon i-Nakó ná mogoguyang monia nokoḻiong kon i-Nakó bo nosumba kon Baal.

YEREMIA 23:32

Akuoi, ki Tuhan, in moḷawangbí kon nabi mita tatua inta nopotaau in togoindopnea mita inta nopuḻing in uboḷ. Mosia in nopoḷangkam in umat-Ku pinodoyon kon uboḷ bo ambungangaḷ monia. Akuoi in diábí nopotabá kon nabi mita tatua. Mosia in beresibí diá baraguna kon umat-Ku. Akuoi, Tuhan, ain nosingog.”

YEREMIA 6:14

Kekeb mita in umat-Ku inanggap monia in kekebbí mointok. ‘Ah, diábí nongonu,’ guman monia, ‘komintanbí mopia bo moodom.’ Bokaka totokbí in diá.

YEREMIA 6:4

Mosia in mogumanbí, “Igai, posadiadon monubu kon Yerusalem! Koḻigai in kita monubu singgai in naa!” Táe onda intua mosia in moguman doman, “Ado, nolatdon! Singgai moungkoḷomdon, oḻinow mita in kobanat-kobanatdon.

OMBAḶ 2:14

Inta pinotaau in nabi mita kon inimu, tongábí tompobaḻik bo uboḷ komintan. Mosia in diábí kon dodai in onda in nobuká kon dosamu, manangka intua iko in diábí notobat. Noyotoḻikud kon tua yo mosia in tongábí mopotaau kon inimu in tosingogon mita uboḷ inta mokosanang.

YEHEZKIEL 13:9

Akuoi in mohukumbí kon i monimu, ei nabi mita inta nopotaau kon toḷanow mita uboḷ bo norai kon oontongon mita! Moiko in diá bidon motaau in dumudui mobogoi in kotantúan kon bonu in ponisigan in umat-Ku. Tangoimu mita in ginaresandon kon bonu in tangoi mita in inanakan Israel, bo moiko in diá bidon mobui mangoi kon butámu. Dá kotaauandon monimu kon Akuoibí in ki Tuhan Inta Totok in moḷantud.

HOSEA 4:5

Singgai doḷom in moiko mogaid kon moitaḷá, natua doman in nabi mita. Tuamai yopúon-Ku in Israel, ki inámu.

YOËL 3:9

Potaaudon in naa kon bangusa mita: Posadiadon sin moparang bo poridomok! Pokisindogaidon in intau mita mongobarani bo moḷoḷaki; sipundon in bayongan in tontara, bo bayádon!

MIKHA 2:11

Koibog monimu in nabi inta moibog monguboḷ bo mongakaḷ poḷat monoḷanow kon moiko in mokouḻíbí kon anggur bo oinumon inta mokoḷoḷangu inta mobayong totok.”

MIKHA 3:11

Mongongawasa mita in kotá momarenta mokiigum in doit pomompon kon bibig, imang mita in motundú kon hukum i Tuhan sin motayak kon tondan pogaidan, bo nabi mita mopoigum in topotundú nongkon i Allah sinbá mokouḻí kon doit – bo kai monia kamai dá ki Allah in dinumotábí kon i monia. Mosia in moguman, “Ki Tuhan in oyúon kon yua-yuak naton; kita in diábí koantugan in anib.”

MALEAKHI 2:8

Táe tanaa, moiko, imang mita, sinumabatdon nongkon daḷan inta moitutui. Totundúmu mita ain nokopopisí kon nobayong in intau in mogaid kon inta moitaḷá. Moiko in nomoguyaatdon kon dodandian inta pinomia-Ku takin i monimu.

MATIUS 15:14

Pomayádon mako intau mita natua. Sin mosia tua in intau bilog inta motundú kon daḷan kon intau doman bilog. Sin aka intau bilog bo mokapit kon intau doman bilog, yo tumpaḷabí in taya dua moḷabú kon bubú.”

MATIUS 7:15

“Mokopoingatdon kon nabi mita inta diá totuu. Nabi inta mamangoi kon inimu naonda bo intau inta mongopia, táe sabanarnea mosia tua intau bí moromú.

SURAT I PAULUS KON JAMAAT RUM 16:18

Sin intau mita inta momia kon natua, deemanbí mogaid sin kopontingan i Kristus inta Tuhan naton, táe tongábí motayak kon kasanangan in gina monia tontaní. Dondouḷug bo singog monia moaḷus inta kodongogan tua in tongábí pakéon monia monguboḷ kon intau mita inta diápa nonotaau in onu bo onu.