MAZMUR 42:10 - Alkitab Singog In Mongondow Masa In Tanaa

¹⁰ Akuoi in noguman kon i Allah, mododuḷuku, “Nongonu sin kinoḻiongan-Mubí in akuoi? Nongonu sin akuoi in mustibí umuran mobaba kon roriga, popisí in doroton in musungku mita?”

MAZMUR 42:10 Iomraidhean Croise

MAZMUR 42:3

Akuoi in mokotanob kon i Allah inta nobiag, toonu in motaau in akuoi mayá moibada kon Baḷoi-Nea?

MAZMUR 43:2

Ikobí in ki Allah moḷoḷukadku; nongonu sin taḷaan-Mubí in akuoi? Nongonu sin akuoi in umuranbí mobaba kon roriga popisí in doroton in musungku mita?

MAZMUR 55:4

Moḻia-ḻiaw in ginaku sin gogondokon in musung bo pinondorotan in intau moraat. Sin mosia in moposusamai kon kobiaganku, bo takin torú mosaturu kon inakó.

AMSAL 12:18

Tongá kino singo-singognea in mokotompaḻí kon gina naonda bo turakon in pitow; tosingogon mita mobijaksana in naonda bo undam inta mokopia.

OMBAḶ 5:20

Umpaka dá taḷaan-Mu in kami modapot in námai tua in koonggotnea? Degá koḻiongan-Mudon in kami modapot in dunia naa modait?

YOËL 2:17

Potabádon in imang mita inta nogundoi kon i Tuhan, mongombaḷ kon sigad in mezbah bo dangkuḷonnea kon muna, sindaḷan moguman, “Kotabipa kaasí in umat-Mu, o Tuhan; dika pomayá mako in kapunyaan-Mu tongososingkuḻe mako,” dá bangusa mita ibanea monigid poḷat moguman, “Kon onda in ki Allah monia?”

MIKHA 7:10

Dungkuḷmai musung in moningkuḻe kon i naton takin mosingog, “Kon onda degá in ki Tuhan, Allahmu tatua?” Táe tanaa mosia in mokoontongbí kon onu in aidan i Tuhan kon i naton, bo mobaḻíbí mooyá in mosia. Kita in moindoibí kon musung mita naton tatua in taḷowon bo rita-ritakan mako naonda bo yoná kon daḷan.

LUKAS 2:35

bo iko Maria in mokorasa naonda bo tura-turakon in pitow, táe Adí tanaa in mobuká kon onu inta noibuni kon gina in intau moantó.”