MAZMUR 146:9 - Alkitab Singog In Mongondow Masa In Tanaa

⁹ Sia in moḷukad kon intau ango-angoi; Sia in motuḷung kon boba-bobay bo uno-unon, táe moḷamboi kon tomayá in intau moraat.

MAZMUR 146:9 Iomraidhean Croise

SAMUEL 2 15:31

Naonda in pinotaaudon kon i Daud kon ki Ahitopel in sinumakin doman kon komplotan i Absalom, nosambayangdon in ki Daud nanaa, “Oo, Tuhan, poigumon mako poyayúon-Mudon in tonggina i Ahitopel!”

SAMUEL 2 17:23

Naonda in kinotaauan i Ahitopel kon tongginanea in diá dinuduian, sia nopopakédon in ḷoḻitúan kon keledainea bo nobui kon kotánea tontaní. Naonda in noginḷapat mako kon bayongan in oaidannea ginumantongdon in sia, bo iḷobong kon bonu in poḷoḷobongan kon inanakannea.

ESTER 5:14

Nokodongogmai kon tua ki buḷoinea bo bayongan in totakinnea noguman, “Pokiaidaidon in oigi pobambéan inta koḷantudnea in doyowa nopuḷú bodoyowá nometer. Bo mopoikoḷomai, doḷo-doḷom poigumdon kon i datu mobambé kon i Mordekhai kon oigi tatua. Dá motaaudon in iko mayá kon bobutungan tatua takin pia in gina.” Aka kon i Haman yo mopiabí totok in tosingogon tatua, tuamai in ḷagidon sia nokiaid in oigi pogantongan tatua.

ESTER 7:10

Natuata in nobaḻí ki Haman pinobambé kon oigi inta ain pinosindognea kon i Mordekhai. Nopaḷut mako kon tua noinggamádon in torú i datu.

ESTER 9:25

Táe ki Ester in minayá kon tayowon i datu, bo ki datu in nobogoi in parenta pinais inta nokopopisí kon tomayá moraat inta inaidan i Haman in bui noiuma kon inia tontaní, dá sia bo ki adínea mita in pinopobambé kon oigi pobobambéan.

MAZMUR 10:14

Táe inontong-Mubí; Sinaridian-Mu in susa bo roriga, bo umuran mosadia motuḷung. Intau inta moyangkó moposarakan in kobiagan kon ini-Mu, Iko in umuranbí motuḷung kon intau nobogá.

MAZMUR 145:20

Sia in moḷukadbí kon batúan in intau inta moibog kon i-Nia, táe intau moraat in putúan-Neabí.

MAZMUR 147:6

Sia in noposindog in intau inta dinorot, táe intau moraat in pogambat-Nea kon butá.

MAZMUR 18:26

Tuhan, Iko in mosatia kon intau inta mosatia bo mopia kon intau inta mopia.

MAZMUR 68:5

Podondongdon kon i Allah, dayowdon in tangoi-Nea, sadiadon in daḷan moḷoben kon i-Nia inta sinumakoi kon goḷom. Tangoi-Nea in ki Tuhan – poḷungangadon in gina kon tayowon-Nea!

AMSAL 15:25

Ki Tuhan in mogumpagbí kon baḷoi in intau inta motosiḷantud, táe butá in intau boba-bobay ḷukadan-Nea.

YEREMIA 49:11

Ei Edom! Taḷaaidon kon i-Nakó in ki adímu mita uno-unon, biagon-Kubí in mosia. Biódon mako bá intau boba-bobaymu mita in umandoḷdon kon i-Nakó.

HOSEA 14:3

Pobuidon kon i Tuhan bo poyaputdon in sambayang tanaa saḷaku sosumbamu kon i-Nia, “Tuhan, ampungaidon in bayongan dosa nami, bo tarimadon kaasí in sambayang nami naa, dá kami in modayowbí kon ini-Mu ná inta ain pinodandi nami.

MALEAKHI 3:5

Guman i Tuhan Inta Totok in mokawasa, “Akuoi in mamangoibí kon inimu sin mohakim. Akuoi in ḷagidon mobaḻí sakusi kon mososihir mita, kon intau mita inta mototuaḻingan, inta noguman kon uboḷ, inta notombogá kon dodai in nobogoi in gaji kon intau inta sinondanan, inta nondorot kon intau boba-bobay, uno-unon, bo intau ango-angoi, bo kon intau mita inta diá mohoromat kon i-Nakó.”

KORINTUS 1 3:19

Sin kabijaksanaan in intau kon dunia naa diábí in baraguna kon i Allah. Kon bonu in Buk Motusi in pinais nanaa, “Ki Allah in mojebak kon intau mita inta mongobijaksana podudui in pandoinea tontaní.”

ULANGAN 16:11

Kon tayowon i Tuhan Allahmu, kon tampat inta piniḻí-Nea, moiko musti moposanang in gina moyotakin i adímu mita, bobantungmu mita bo intau in Lewi, intau ango-angoi, adí uno-unon bo intau mita inta dongkadon boba-bobay inta nogutun kon kotámu mita.

YAKOBUS 1:27

Podudui ibog i Allah, ibada inta moitutui in motuḷungbí kon adí mita inta uno-unondon bo kon i monia inta dongkadon boba-bobay inta nobiag moyoyiga, poḷat doman moḷukad kon awak tontaní sinbá diá poguyaaton in dunia naa.