MATIUS 3:5 - Alkitab Singog In Mongondow Masa In Tanaa

⁵ Naonda in nokodongog kon onu in pinoyaputnea tatua, noroangoidon in intau mita, inta nongkon Yerusalem, nongkon bayongan butá in Yudea, bo nongkon bayongan ḻipú inta kon diugmai in Ongkag in Yordan.

MATIUS 3:5 Iomraidhean Croise

MATIUS 2:1

Naonda in ki Yesus pinononggadídon kon Betlehem, kon tungkuḷ intua butá in Yudea pinareta i Datu Herodes, bo dodai intua namangoidon kon Yerusalem in intau mita in Mayusi nongkon Pomukaan.

MATIUS 4:25

Dá intau mobarong totok in dinumudui kon i-Nia. Oyúon nongkon Galilea, Dekapolis, Yerusalem, Yudea, bo oyúon doman nongkon ḻipú inta kon ḷoḷan Ongkag in Yordan.

MARKUS 1:5

Dá bayongan intau inta nongkon butá in Yudea bo inta nongkon kotá in Yerusalem namangoi nokidongog kon i Yohanes. Mosia in nongaku kon dosa mita monia, bo binaptis i Yohanes in mosia kon Ongkag in Yordan.

LUKAS 16:16

Hukum i Musa bo buk in nabi mita umuranpabí pinaké nodapot kon masa i Yohanes Mobobaptis. Bo pinangkoidon nongkon wakutu intua Habar Mopia kon naonda in ki Allah mamangoi momarenta saḷaku datu tantúdon pinotaau. Bo intau mita umuran moramuji totok sinbá mobaḻí umat i Allah.

LUKAS 3:3

Ki Yohanes minaya-mayá mako in bayongan ḻipú inta kon diugmai in Ongkag in Yordan bo nopobaḷú, “Pogogaidon in mogaid kon dosa mita bo pokibaptisdon sinbá ampungandon i Allah in bayongan taḷámu.”

LUKAS 3:7

Ki Yohanes in noguman kon bayongan intau inta namangoi nokibaptis kon inia nanaa, “Ei moiko intau moromú! Ki ine in noguman kon moiko in kotaḻiban in hukuman i Allah inta kon singgai moiduduimai naa?

YOHANES 3:23

Dodai intua ki Yohanes in diápa pinobonu monia kon ponjara dá sia in umuranpa doman nobaptis kon Ainon, ḻipu inta diá noyayú nongkon Salim, sin nobayong in tubig kon tua. Intau mita namangoi kon inia, bo binaptisnea i mosia.

YOHANES 5:35

Ki Yohanes tua in naonda bo togá noyongkit inta moponindar in bayag. Bo kon tanaa mako mosanangpabí in gina monimu in motarima kon sindar tatua.