MATIUS 27:3 - Alkitab Singog In Mongondow Masa In Tanaa

³ Kon wakutu in ki Yudas inta noposarakan kon i Yesus nokoontong kon ki Yesus in sinantúdon hukumon dapot matoi, nomanasaḷ in sia. Bo binayánea pinobui in doit saḷaka toḷu nopuḷú tatua kon i imang mita itoi bo guhanga mita in ḻipú.

MATIUS 27:3 Iomraidhean Croise

AYUB 20:5

ḷunganga in intau moraat tongábí motoyong, bo kasanangan in intau moraat tongá tokokiap?

IḶUAIAN 21:32

Táe aka inta sinungoinea dapot in minatoi tatua bo ata ḷoḷaki tobatú ande bobay, yo kitogi sapi tatua musti mobogoi in doit tontobut toḷu nopuḷú in doit saḷaka kon i togi ata tatua, bo sapi koḷakian tatua musti ara bo in batu dapot in matoi.

YOHANES 13:2

Kon wakutu in ki Yesus bo murí-Nea mita yogot mongaan, Ibilis nopogonúdon in niat moraat kon bonu in gina i Yudas Iskariot ki adí i Simon sinbá sia in momaḻidawan kon i Yesus.

YOHANES 13:27

Naonda in ki Yudas notarima kon roti tatua, ginanea in kinogonúandon in Ibilis. Bo ki Yesus in noguman kon inia, “Aidaidon koḻikat onu in kino ibogmu pomiaan.”

YOHANES 18:3

Dá ki Yudas in namangoidon in tampat tatua takin kodia-dia in tokolompok in tontara in Rum bo tongonu domanmai in moḷoḷukad kon Baḷoi Tuhan inta pinotabá in imang mita itoi bo in intau mita in Parisi. Mosia in nodia kon ḷoḷutam, lantera bo poḷombow.

OUMAN IN RASUL MITA 1:18

Ki Yudas naa in aindon nokouḻí kon butá pinoḷobongan kon inia, butá boḻi in oaidnea inta moraat. Sia in noḷabú noitongkob bo siannea in nobotak, dá bayongan bonu in siannea noiḷuai komintan.

KORINTUS 2 7:10

Sin ajar in gina natua mopomungaibí in mopia bo mokosaḷamat. Bo tua in diábí mokomanasaḷ kon intau. Táe aka ajar in gina inta pinodudui in ibog in intau, yo tua in mokopatoibí.