LUKAS 9:26 - Alkitab Singog In Mongondow Masa In Tanaa

²⁶ Sin intau inta mooyá in mongaku kon sia tua in dumodudui-Ku bo mooyá in mogaid kon onu inta ain sinundú-Ku, yo ki Adí Intau mooyá doman in mongaku kon sia in dumodudui-Ku kon wakutu in moiangoi in Sia takin kawasa-Nea bo kawasa i Amá bo in malaekat mita inta motusi!

LUKAS 9:26 Iomraidhean Croise

YESAYA 53:3

Kita in moningkuḻe bo yumayú kon inia, intau inta nopuḻing in roriga bo nobiasa mobaba kon takit. Diá tobatúmai in intau in moibog imindoi kon inia, bo kita in diá doman moindoimai kon inia.

DANIEL 7:10

bo tuḷú ḷumekep nongkon pomomarentaan tatua. Ribuan in intau nogundoi kon i-Nia bo jutaan in intau sinimindog kon tayowon-nea. Onda intua pinangkoidon in sidang pongadilan, bo buk mita in binukádon.

MATIUS 16:27

Diádon moonggot bo ki Adí Intau takin malaekat-Nea mita in mamangoi takin kawasa i Amá-Nea. Kon dodai intuata Sia motuḻidon kon pomuḷoi in intau podudui in oaidnea.

MATIUS 25:31

“Aka ki Adí Intau mamangoi saḷaku Datu bo sinakinan in malaekat mita, yo Sia in ḻimitú kon tampat pomarentaan-Nea.

MATIUS 26:64

Ki Yesus nogabat, “Natuata in gumanmu. Táe pirisayadon: pinangkoidon kon tanaa mako, moiko in mokoontong kon i Adí Intau in ḻimitú kon dotá in koḷanan i Inta Totok in Mokawasa bo mamangoi mongin ḻimonik in goḷom mita kon ḷangit!”

MARKUS 8:38

Sin ki inekabí in mooyá popisí Akuoi bo popisí in singog-Ku kon yua-yuak in intau mita inta diá mosatia bo binaradosa naa, yo ki Adí intau mooyá doman popisí in intau tatua aka Sia mamangoidon bui kon bonu in kamuliaan i Amá-Nea takin malaekat mita mokudus.”

YOHANES 12:43

Sin mosia in moibo-ibogbí in kahoromatan intau dika in kahoromatan i Allah.

YOHANES 5:44

Naondabí in kopopirisaya monimu aka moiko tongábí motayak kompé dayowon in intau ibanea, diábí moramuji sinbá dayowon i Allah inta totobatú tua?

OUMAN IN RASUL MITA 10:22

Dá mosia in notubag, “Kami naa in namangoi sin pinotabá i Kornelius, tobatú itoi in tontara Rum, inta totok mopia bo motoindudui kon i Allah bo ihoromat in bayongan intau in Yahudi. Tobatú malaekat i Allah in namangoi kon inia bo nopotabá mogoiní kon i Tuang sinbá ki Tuang in mamangoi in baḷoinea, saḷaku tubag i Tuhan kon bayongan inta pinoigumnea kon doa. Sia in pinoki indongogan kon onu in poguman i Tuang kon inia.”

SURAT I PAULUS KON JAMAAT RUM 1:16

Mopirisayabí totok in akuoi kon Habar Mopia tatua, sin Habar Mopia tatua in ropotbí i Allah moposaḷamat kon bayongan in intau inta mopirisaya; muna-munamai intau in Yahudi, bo bangusa doman ibanea.

KORINTUS 2 12:10

Tuamai mopiabí in ginaku aka umuran moḻemé nanaa in kaadaan in awakku. Bo mopiabí doman in ginaku aka lantaran ki Kristus, akuoi in poponapudan in uboḷ, mokorasa kon rupa-rupa yoyiga, aḷo-aḷowan mako pogutúon. Sin aka korasaanku bo diádon mokopongonu in akuoi, yo kon wakutupa doman tuata bo oyúon ropot in korasaanku.

GALATIA 6:14

Táe akuoi in totuu kon doíbí dumodia kon onu inta ain inaidanku, koḻikudbí in modayow kon i Tuhan naton ki Yesus Kristus inta ain minatoi pinopopakú kon kayu pinoyotaḻempang. Lantaran Sia bo ain minatoi pinopopakú kon kayu pinoyotaḻempang, dá dunia naa in diá bidon in mangaḻenea kon inakó. Ná doman tua in akuoi kon tayowon in dunia naa, inanggap monia in akuoi naa naonda bo minatoidon.

TIMOTIUS 1 5:21

Kon tayowon i Allah, bo i Yesus Kristus bo in malaekat mita inta piniḻí-Nea, pogumankudon kon inimu sinbá dumuduidon in iko totu-totuu kon onu inta sinundúku mita tanaa, ḷumbúbí in raianmu inta diá mopia kon i inekabí bo aidaidon in naa komintan bo dikabí mopoyoposi kon intau.

TIMOTIUS 2 1:12

Tuamai akuoi in nokorasa kon bayongan roriga tatua, táe akuoi in umuranbí moyakin sin kinotaauankubí totok ki ine in pinirisayaku tua. Moyakinbí in akuoi kon onu inta ain inogoi-Nea pinoki aid kon inakó tantúbí koḷukadan-Nea modapot in Singgai Pangabisan.

TIMOTIUS 2 2:12

Aka kita bo motaba, yo kita in moyotakin-Neabí doman momarenta. Aka diá akuon naton in Sia, yo diábí doman akúon-Nea in kita.

IBRANI 11:26

Irai Musa kon diábí nongonu in singkuḻeon sin mopirisaya kon i Datu Mopoposaḷamat inta pinodandi i Allah dika in mokouḻí kon bayongan kapunyaan kon butá in Mesir, sin iharap mako i Musa tua in kapunyaanbí kon singgai moiduduimai.

IBRANI 13:13

Tuamai, koḻigai mayá in kita kon i-Nia kon ḷuai in ḷoḷaigan bo moyotakin-Nea singkuḻeon.

YUDAS 1:14

Ki Henokh, buí impitunea nongkon i Adam, tungkuḷ intua nokoimontan doman in nopotaau in koyow i Allah soaḷ intau mita tatua. Ki Henokh in noguman nanaa, “Indoiai, ki Tuhan in mamangoi takin ribuan malaekat-Nea mita inta mokudus

WAHYU 1:7

Indoiai, Sia in mamangoi inoḻiungan in goḷom! Bayongan intau mokoontongbí kon i-Nia, noitakin doman in mosia inta nonakuḷ kon i-Nia. Bayongan in intau kon dunia naa komintanbí mogamui lantaran Sia. Nopasti bidon intua! Amin!

WAHYU 20:11

Nopaḷut mako kon tua, akuoi in nokoontong kon tobatú tampat pomomarentaan inta nobudó bo inta noḷoben bo Sia in iḻimitú kon tua. Ḷangit bo butá noinggamá nongkon tayowon-Nea, sahingga in diádon bui koontongan.

WAHYU 21:8

Táe intau mita inta ondokon, mosia inta diá mosatia, intau moromú, moḷoḻimod, intau mokotor, intau mongonggaing, mososumba kon berhala bo komintan intau mouboḷ, toko pogambat kon bonu in dagat tuḷú bo balerang inta kodoko-dokot, tuata in popatoi inta induanea.”

WAHYU 3:5

Mosia inta mountung ḷambungan in ḷambung mobudó natua. Tangoi monia in diábí popaton nongkon Buk Intau Nobiag. Bo akúon-Kubí in mosia kon tayowon i Amá-Ku bo malaekat-Nea mita kon Akuoibí in kitogi kon i monia tua.