LUKAS 8:29 - Alkitab Singog In Mongondow Masa In Tanaa

²⁹ Dimukud moraat tatua noguman natua, sin pinotabá i Yesus iḷumuai nongkon intau tatua. Sin mokakitdon in pogarab in dimukud moraat in intau tatua. Dá poḷoḷukad kon intau tatua in dongka bidon togotonmai in rante bo umantungan, táe bontowonnea doman in rante inta pinotogot kon inia, onda intua sia diaan in dimukud moraat mayá in padang gurun.

LUKAS 8:29 Iomraidhean Croise

MARKUS 5:8

Intau tatua in noguman natua sin ki Yesus noguman kon inia, “Ei dimukud moraat, ḷuaidon iko nongkon intau tanaa!”)

LUKAS 8:28

Naonda in sia nokoontong kon i Yesus, kinumarak in sia bo sinumungkud kon tayowonmai i Yesus bo nomaḷú, “Ei Yesus, ki Adí i Allah inta Totok in Moḷantud! Onuon i Tuhan in akuoi naa? Poigumonku totok kon i Tuhan, dika rorigaan in akuoi!”

LUKAS 8:30

Ki Yesus in noḻibó kon intau tatua, “Ki ine in tangoimu?” Tubagnea doman, “Tangoiku ‘ki Legion’,” – sin nobayong totok in dimukud moraat in sinumuot kon inia.

LUKAS 9:39

Aka dimukud moraat mamangoi monubu kon inia, sia in baḷú kumarak bo motorondó totok in awaknea bo bibignea ḷuaian in burá. Dimukud tatua umuran mopororiga kon inia, bo gogió diádon taḷaanneamai in ki adíku tatua!

LUKAS 9:42

Kon wakutu in adí tatua nopobayá kon i Yesus, dimukud moraat tatua nopobanting kon inia poḷat sinorondónea in awak in adí tatua. Táe totok in sinorúan i Yesus in dimukud moraat tatua bo pinoki ḷuaian-Nea nongkon adí tatua dá nopiadon in adí tatua bo poḷatdon pinosarakan kon i amánea.