LUKAS 8:13 - Alkitab Singog In Mongondow Masa In Tanaa

¹³ Aka bibit inta noḷabú kon butá inta nobayong in batu, tua in ibarat intau inta nokidongog kon Pirman i Allah, bo notarima takin pia in gina, táe onu in dinongog monia tua diá noitonop kon bonu in gina monia. Mosia in tongá nopirisaya notoyong, naonda in kino angoian sobaan, mosia in diá nonahang bo nobaḷui in pirisaya monia kon i Allah.

LUKAS 8:13 Iomraidhean Croise

AYUB 19:28

‘Naonda in pononuntut kon inia?’ Moiko in notayak kon dodoyonan sin momia kon pelekara.

AMSAL 12:12

Intau moraat moibog motayak kon kauntungan nongkon intau moromú; intau mopia in notongkaibí in pangkoi in ayop inta momungai.

AMSAL 12:3

Diábí in tobatúmai in intau inta umuran mooyúon kon bonu in aidnea inta moraat; táe intau inta motuḻid in gina umuranbí motorindog, diábí motundan.

YESAYA 58:2

Mosia in mosumba kon i-Nakó pomuḷoi in singgai, bo moibog monotaau kon ibog-Ku, naonda bo moibog in mosia mogaid kon inta mopia, bo motoindudui kon hukum-Ku. Mosia in moguman kon mosanang in gina monia in mosumba kon i-Nakó bo moibog in hukum-Ku inta moadil.”

YEHEZKIEL 33:32

Iko in inanggap intau inta mopodondong in dondong totabian inta mopia kodongogan bo mopia mopogogitog in kecapi. Totuu kon mokidongogbí in mosia kon tosingogonmu mita táe diábí duduiannea.

HOSEA 6:4

Táe ki Tuhan in noguman, “Ei Israel bo Yohuda! Onu in musti aidan-Ku kon i monimu? Tabimu kon i-Nakó in motoyongbí moinggamá naonda bo topuot andeka oḷú doḷo-doḷom.

MARKUS 6:20

Sin kinotaauan i Herodes kon ki Yohanes tua in totabá mopia i Allah dá mobangkaḷ in sia. Manangka intua pinoki ḷukadnea totok in ki Yohanes kon bonu in ponjara. Bo aka mosingog in ki Yohanes yo moibogbí in ki Herodes mokidongog kon singognea, umpakabí moḻia-ḻiaw totok in ginanea in mokodongog.

LUKAS 8:12

Bibit inta noḷabú kon bingkí in daḷan, tua in ibarat intau inta ain nokidongog kon Pirman i Allah, onda intua inangoi in Ibilis bo inagow in Pirman tatua nongkon bonu in gina monia, sin dika bo mosia in mobaḻí mopirisaya bo posaḷamaton.

LUKAS 8:14

Bibit inta noḷabú kon yua-yuak in díat, tua in ibarat intau inta ain nokidongog kon Pirman, tongá gina monia umuran sinisí in kapunyaan inta inanggap monia mokosanang kon kobiagan monia kon dunia naa, sahingga diá notuoi in bungainea.

YOHANES 15:2

Pomuḷoi in tanga kon i-Nakó inta diá momomungai, pongkóon-Nea, bo pomuḷoi in tanga inta momungai, gaatannea in daunnea bo daritan-Nea sinbá modugangdon modatog in bungainea.

YOHANES 15:6

Ki ine in diá umuran motobatú takin-Ku, ḷumbúon naonda bo tanga, bo moingkagdon. Tanga mita inta moingkagdon natua daiton sipunon bo pogarab kon bonu in tuḷu bo tubáan.

YOHANES 5:35

Ki Yohanes tua in naonda bo togá noyongkit inta moponindar in bayag. Bo kon tanaa mako mosanangpabí in gina monimu in motarima kon sindar tatua.

KORINTUS 1 13:2

Bo umpakabí in akuoi in mopandoi mopoyaput in Habar Mopia nongkon i Allah bo motaau doman totok in soaḷ mita inta nongoibuni, ande nonotaau kon bayongan yagi-yagi bo mopirisaya doman totok kon i Allah, sahingga in motaau mopopamping in buḷud, táe aka diá in tabiku kon tumpaḷa intau, yo diábí in mangaḻe in kobiaganku!

KORINTUS 1 15:2

Aka moiko bo tantú kumadai kon onu inta ain pinotaauku kon i monimu, yo Habar Mopia tatua in mokosaḷamatbí kon i monimu; koḻikudbí aka moiko mopirisaya táe diá momangaḻe kon onu inta pinirisaya monimu tua.

GALATIA 3:1

Utat mita intau in Galatia! Moiko nion in totuudon mobodok! Ki ine degá in nopongaru kon i monimu? Eta kinoḻiongandon monimu inta pinogumanku kon tayowonmai monimu. Akuoi in noguman kon ki Kristus aindon pinopopakú kon kayu pinoyotaḻempang!

GALATIA 3:4

Degá iraimai monimu yo diábí in mangaḻe in bayongan inta ain kinorasaan monimu tua? Diábí kumaan kon akaḷ aka diá in baragunanea!

EPESUS 3:17

Igumondon mako ki Kristus inta pinirisaya monimu in mogutundon kon bonu in gina monimu bo moiko in mobiag moidoyon kon bonu in tabi.

KOLOSE 1:23

Manangka intua, moiko in musti umuran mosatia in mopirisaya bo umuran doman kumadai mokoporopot kon onu inta ain pinirisaya monimu. Dika modapot in ukatan monimu harapan inta ain inogoi kon i monimu wakutu in moiko notarimadon kon Habar Mopia nongkon i Allah. Habar Mopia tatua ain pinotaau kon bayongan intau kon dunia naa. Bo popisíbí in tuata, akuoi ki Paulus in nobaḻí mogogaid kon oaidan i Allah.

KOLOSE 2:7

bo monguakat kon bonu i Kristus Yesus. Moiko in musti moposindogdon in kobiaganmu bo ki Kristus in dodoyonanmu. Mustidon modugang in pirisaya monimu kon i Kristus, podudui in onu inta ain sinundú kon i monimu. Bo ginamu in umurandon moibo-ibog mopoyaput in sukur moantó.

TESALONIKA 1 3:5

Manangka intua pinotabákudon namangoi in ki Timotius sin moibogdon totok in akuoi mokidongog kon habar soaḷ kopopirisaya monimu kon i Kristus. Moḻia-ḻiaw in ginaku sin dikabo kinokawasaandon Ibilis in moiko, sahingga in onu inta siniḷopían nami diádon in baragunanea.

TIMOTIUS 1 1:19

Sin oyúondon in intau inta doídon dumudui kon ibog in ginanea inta mopia bo modarit, sahingga in nogoguyaatdon in pirisaya monia.

IBRANI 10:39

Kita naa in deemanbí umat inta mobaḷu-baḷui in pirisaya bo inta diá koharapan. Táe umatbí inta mopirisaya kon i Allah bo inta posaḷamaton.

YAKOBUS 2:26

Dá, ná awak inta diá in roho, awak tatua in minatoibí, natua doman in pirisaya inta diá takinan in oaid, tua in pirisayabí inta minatoi.

PETRUS 2 2:20

Intau inta nonotaaudon kon i Tuhan bo kon i Mopoposaḷamat naton ki Yesus Kristus, yo sia tua in noipilatdon nongkon kawasa mita in dunia naa inta mokokotor kon intau. Táe onda intua sia in buidon nogaid kon inta moraat, dá oaid in intau tatua in moiḻiu bidon totok kon koraatnea inta muna.

PETRUS 2 2:22

Singog moiduduimai naa noyokaan totok in oaid monia tua, “Ungkú mokaanbí bui kon totukanea, bo boké inta ain ininggúan kinodarit buibí doman in sia mayá ḷumobong kon bonu in yoná.”

YOHANES 1 2:19

Saturu mita i Kristus tua in intaubí mita inta nonaḷámaidon kon i naton naa, lantaran mosia tua in deemanbí totuu intau naton. Aka mosia intau mita naton, tantú mosia in umuranbí noyotakin naton. Natuabí sinbá motarangdon kon i naton kon mosia tua in diábí totu-totuu moibog mopirisaya kon i Tuhan moyotakin naton.

YUDAS 1:12

Kon wakutu in moiko nogaid kon rame nongaan noyotakin, oaid in intau mita tatuata inta mokobú kon sigad monimu. Mosia tumura in mongaan takin diábí kooyá, bo tongá morai kon kopontingan monia tontaní. Mosia tua in ná doman onda bo goḷom inta dinia in tompot táe diá mokouyan. Mosia in ná doman onda bo pangkoi in ayop inta diá momomungai umpaka sempo in ayop; pangkoi mita inta ain irabut takin uakatnea bo minatoidon.