LUKAS 7:44 - Alkitab Singog In Mongondow Masa In Tanaa

⁴⁴ Onda intua ki Yesus nobobui kon bobay tatua bo noguman kon i Simon nanaa, “Inontongmu in bobay tanaa degá? Akuoi in moguman kon inimu: Akuoi namangoi in baḷoimu, táe diá inogoianmu in tubig pondaritan-Ku kon sioḷ, táe bobay tanaa ain nondarit kon sioḷ-Ku takin ḷuánea, onda intua iningkagannea bui in buoknea tontaní.

LUKAS 7:44 Iomraidhean Croise

KINOBAḺIAN 18:4

Pomayádon mako bain akuoi in mogamá kon tubig sin pondaritan kon sioḷ i Tuang mita. Koḻigai bá mogogaipa kon siungon in kayu tanaa sinbá moinggamápa in ḷopí.

KINOBAḺIAN 19:2

bo noguman, “Tuang mita, akuoi in mopoigum kon bá mongandupa kon baḷoiku. Tai Tuang in motaau in mondaritdon kon sioḷ bo mogogaipa in doḷom naa kon baḷoiku, bain ikoḷom doḷo-doḷom bo mongingguput kon bobayáan.” Táe mosia in notubag, “Sukur moantó, kami in mogogaidon kon lapangan in kotá”.

KINOBAḺIAN 43:24

bodongka inatodneadon in mosia sinumuot kon baḷoi. Sia in nobogoi in tubig sin pondaritan monia kon sioḷ, bo nobogoi doman in kokaanon in keledai monia.

SAMUEL 2 11:8

Onda intua ki Daud noguman kon i Uria, “Pobuipa kon baḷoimu bo pogogaipa topiḻikmai.” Naonda in ki Uria nonaḷámai kon komaḻig, ki Daud nokidia in tombuinag inta inatod kon baḷoi i Uria.

LUKAS 7:38

Koomba-ombaḷ in sia namangoi sinimindog kon diug in sioḷ i Yesus, dá sioḷ i Yesus nobuntad in ḷuánea. Táe kon dodaipa doman tatua sioḷ i Yesus iningkagannea in buoknea tontaní, bodongka inayokannea in sioḷ i Yesus bo binutakkannea in ḷana nobondu inta kodia-dianea tatua.

LUKAS 7:43

Dá kain tubag doman i Simon, “Tantú intau inta mobayong in boḻinea!” Kai Yesus, “Totuu in tubagmu nion.”

YOHANES 13:5

Onda intua Sia in nogaḻin kon tubig kon bonu in baskom, bo mulaidon nondarit kon sioḷ in murí-Nea mita poḷat iradatan-Nea in handuk inta pinogibintoḷ-Nea tatua.

TIMOTIUS 1 5:10

bo kinotaauan doman in intau kon umuranbí in sia nogaid kon inta mopia, ná umpamanea, ain nonompia kon i adínea mita, motabi kon tumpaḷa intau, moibog mobogoi in kaanon kon intau mita mopirisaya. Moibog doman motuḷung kon intau mita inta nobiag nobogá, pokoknea mosia in totu-totuudon nogaid kon onu inta mopia.

YAKOBUS 2:6

Táe moiko ain noningkuḻe kon intau mita inta nobiag nobogá, bokaka intaubí mita inta nooyúon in mondorot bo mogugut kon i monimu pobayá in pongadilan!

HAKIM MITA 19:21

Onda intua dinianea in mosia minayá in baḷoinea bodongka nopokaan in keledai mita monia. Bo naonda in mokokiangoi mita tatua nomatádon kon sioḷ, nongaan in mosia.

SAMUEL 1 25:41

Sinimindog in ki Abigail bo sinumungkud poḷat noguman, “Akuoi naa in bobantung i Daud, diábí mobogat in ginaku in momatá kon sioḷ mita in bobantungnea mita.”