LUKAS 6:45 - Alkitab Singog In Mongondow Masa In Tanaa

⁴⁵ Intau inta mopia in mogaidbí doman kon inta mopia sin ginanea in pinuḻingan in inta mopia. Táe intau inta moraat in mogaidbí doman kon inta moraat sin ginanea in pinuḻingan domandon in inta mongoraat. Sin onu inta siningog in bibig yo tua in iḷumuaibí nongkon ginanea.”

LUKAS 6:45 Iomraidhean Croise

MAZMUR 140:5

O Tuhan, ḷukadaidon in akuoi nongkon kawasa in intau moraat, ḷukadaidon in akuoi nongkon intau inta moḻingá inta moniat mopoḷabú kon inakó.

MAZMUR 59:12

Dikabí moḻimod kon i monia, o Tuhan, sinbá bangusaku diá mokoḻiong. Poraritdon bo upetdon in mosia podoyon kon kawasa-Mu, o Tuhan mogogoḻingoi nami.

MAZMUR 59:7

Kon dodai in ḷoḷabungneadon mobui in mosia, mogoob naonda bo ungkú sindaḷan moḻibu kon kotá.

AMSAL 12:18

Tongá kino singo-singognea in mokotompaḻí kon gina naonda bo turakon in pitow; tosingogon mita mobijaksana in naonda bo undam inta mokopia.

AMSAL 15:23

Tosingogon mita inta siningog inta noitaná kon wakutunea, mokopoangoi kon sanang in gina.

AMSAL 4:23

Ḷukadai in ginamu kopira, sin ginamu in monantúbí kon daḷan in kobiaganmu.

YOHANES 7:38

Soaḷ intau inta mopirisaya kon i-Nakó in pinaisdon kon Buk Motusi nanaa, ‘Nongkon bonu in ginanea ḷumuai in bokaká inta mobogoi in kobiagan.’ ” (

OUMAN IN RASUL MITA 5:3

Dá ki Petrus in noḻibó kon inia, “Ananias nongonu sin pomayámubí mako in Ibilis mongawasa kon ginamu, modapot in iko monguboḷ kon Roho i Allah, takin umuni-uni mako motagú kon boḻi in butá ibanea sin pakéonmu tontaní?

EPESUS 3:8

Kon sigad in bayongan umat i Allah, yo akuoibí naa in totok in mokooyá. Táe ki Allah ain noponotabi in oaidan tanaa kon inakó; oaidan mopoyaput in Habar Mopia soaḷ kaoyúonan i Kristus inta diá modai-dait;

EPESUS 4:29

Aka mosingog in moiko yo dika mosingog kon inta moraat, singogdon in onu inta mokobaraguna moginropot kon pirisaya bo singog mita tonggina inta motaau potuḷung kon intau ibanea. Sin singog mita inta baraguna in mokopoangoi kon kopiaan kon i monia inta mokodongog.

EPESUS 5:19

Pakédon in singog mita inta nongkon Mazmur, dondong inta pinodayow kon i Allah bo dondong rohani, kon wakutu in moiko moyosingog. Kosanang in gina bo mopodondong in dodayow kon i Tuhan.

KOLOSE 3:16

Umuran kon gina-gina mako in totundú mita i Kristus inta mobarakat tua, sahingga moiko in mobijaksana bo mopandoi in motundú bo mononggina kon utat mita. Dika mokoḻiong in mopodondong in Mazmur bo dondong mita rohani; podondongdon kon i Allah takin porasaan mosukur kon bonu in ginamu.

KOLOSE 4:6

Ramujidon sinbá onu in singogonmu tantú mokosanang bo koibog in intau. Bo musti kotaauan monimu naonda in pototubag kon onu in ḻibo-ḻibóon mita in intau.

IBRANI 8:10

Táe tanaa, naadon in dodandian inta pomiaan-Ku takin umat-Ku Israel, Kon singgai mita moiduduimai, Pirman i Tuhan: Popotonop-Ku in hukum-Ku kon bonu in pikiran monia, bo popopais-Ku domandon kon gina monia. Akuoi in mobaḻí ki Allah monia, bo mosia in mobaḻí umat-Ku.

YUDAS 1:15

sin mohakim kon bayongan intau. Ki Tuhan in mohukum kon intau mita moraat popisí in oaid mita monia inta moromú. Bo hukumon-Neabí in intau mita baradosa bo inta modurhaka inta umuran mopoyaput in singog pohojat kon i Tuhan.”