LUKAS 24:44 - Alkitab Singog In Mongondow Masa In Tanaa

⁴⁴ Onda intua Sia in noguman kon i monia, “Naadon in soaḷ mita inta ain pinoguman-Ku kon i monimu kon wakutu in kotaki-takinpa monimu in Akuoi: kon bayongan inta ain pinais soaḷ Akuoi kon bonu in buk i Musa bo buk in nabi mita, bo buk Mazmur, tua in mustibí mobaḻí.”

LUKAS 24:44 Iomraidhean Croise

KINOBAḺIAN 14:18

Ki Melkisedek, datu in Salem inta nokadai doman kon oaidan in imang i Allah in Totok Moḷantud, nodia kon roti bo anggur sin ogoi kon i Abram,

KINOBAḺIAN 22:18

Bayongan in bangusa kon dunia naa in mopoigum kon i-Nakó sinbá Akuoi momarakat kon i monia ná Akuoi ain nomarakat kon buímu – sin iko ain dinumudui kon parenta-Ku.”

KINOBAḺIAN 3:15

Iko bo bobay tatua in mobaḻí mososaturuan, buínea bo buímu umuran mososaturuan. Buínea in moritak kon uḷumu, bo tobakonmu in singkod monia.”

KINOBAḺIAN 49:10

Ki Yohuda in mokadai kon tungkud in dodatuan, Buínea in momarenta dapot in mononoi. Bangusa mita in modia mangoi kon pajak, bo tumungkud takin moondok kon tayowonnea.

MAZMUR 118:22

Batu inta iḷumbú in mogogaid mita kon baḷoi, ain nobaḻí batu tongguḷunea.

YESAYA 28:16

Tuamai, ki Tuhan Inta Totok in moḷantud noguman nanaa, “Akuoi in mogukat kon dodoyonan inta moropot bo motorindog kon Sion; batu orotan tobatú inta moḷoben in mangaḻenea inta pinaisan: ‘Ki ine in morigon in pirisayanea, diábí umundok popisí in taḷowon.’

YESAYA 52:13

Ki Tuhan in noguman, “Totuubí, mogogundoi-Ku in mokodapotbí kon aidannea; sia in horomatonbí bo poḷantudon.

YESAYA 7:14

Tanaa, ki Tuhan tontaní in mobogoi in tomponuot kon inimu: Mongodeaga tobatú inta sidia in mopononggadíbí in ḷoḷaki tobatú inta sinangoiannea Imanuel.

YESAYA 9:6

Sia in momarenta saḷaku datu buí i Daud, kawasaannea totok in moḷoben. Butánea in umuran modame bo mobiag mooyúon; pomarentaannea in pinodoyon kon hukum bo koadilan tanaa mako modapot in mononoi. Ki Tuhan Inta Totok in Mokawasa notantúbí kon mogaid kon tua.

YEREMIA 23:5

Ki Tuhan in noguman, “Moiangoibí in wakutunea, Akuoi in moduí kon datu tobatú inta moadil nongkon buí i Daud. Datu tatua in momarenta takin bijaksana, bo mogaid kon onu inta moadil bo inta totuu kon sinangkub in butá.

YEREMIA 33:14

Ki Tuhan in noguman, “Moiangoibí in wakutunea Akuoi in mogintompod kon dandi inta ain pinomia-Ku takin Israel bo Yohuda.

YEHEZKIEL 17:22

Naa in inta pinoguman i Tuhan Inta Totok in moḷantud, “Nongkon pangkoi in ḷokuyú inta moḷantud, koyuton-Kubí in tubúnea bo putoḷon-Ku in tanganea tobatú inta noguodpa; Pomuḷaan-Ku in tanga tatua kon buḷud inta mosindog ná goḷom.

YEHEZKIEL 34:23

Akuoi in moduíbí kon datu tobatú inta ná mogogundoi-Ku ki Daud, sin baḻíon-Ku gombala monia totobatú tua, bo sia in moḷukad kon i monia.

DANIEL 2:44

Kon sempo in pomarentaan in datu mita tatua, ki Allah kon soroga in moposindog in dodatuan tobatú inta umuran moisindog modapot in mononoi bo inta diábí kotaḷowan in bangusa taondaka. Dodatuan tatua in morimumud bo mopoyobauk in bayongan dodatuan ibanea tatua.

DANIEL 7:13

Kon bonu in ontongonku doḷom tua, inontongku in oyúon in naonda bo intau. Sia in namangoi takin iḻibu in goḷom bo dinia minayá kon i-Nia inta mononoi.

HOSEA 3:5

Táe moiangoibí in wakutunea bangusa in Israel mobui kon i Tuhan Allah monia, bo kon i datu monia nongkon buí i Daud. Bo moondok in mosia poḷat mohoromat kon i Tuhan, poḷat motarima kon barakat-Nea mita.

AMOS 9:11

Ki Tuhan in noguman, “Moiangoibí in wakutunea Akuoi monompia bui kon dodatuan i Daud. Tanaa dodatuan tatua in nobaḻídon naonda bo baḷoi inta noumpag. Táe dindingnea mita in tompiaan-Kubí bui bo posindogon-Ku bui dá mobaḻídon bui ná dungkuḷmai.

ZAKHARIA 12:10

Onda intua buí i Daud takin intau mita inta nogutun kon Yerusalem ogoian-Kudon in gina inta kototabi bo moibog mosambayang. Mosia in imindoibí kon inia inta ain sinumbuk monia bo ombaḷan monia naonda bo intau mongombaḷ kon kinopatoian i adínea tuḷong. Mosia in mongombaḷbí imibo-ibog, naonda bo intau inta ain kinobuḻian i adínea guya-guyang.

ZAKHARIA 13:7

Ki Tuhan Inta Totok in mokawasa in noguman, “Sindogdon, ei kedang, bo tubudon in gombala inta nogaid kon kopontingan-Ku! Ḻimodon in sia, dá domba mita in moiraritdon. Tubuon-Kubí in umat-Ku,

ZAKHARIA 14:4

Kon singgai tatua Sia in simindogdon kon Tombuḷud in Zaitun, kon dotá in pomukaan nongkon Yerusalem. Dá Tombuḷud in Zaitun in kobotakan in ḷopá inta mobendar, pinangkoi kon pomukaan modapot in toyopan. Tongobotak in tombuḷud tatua in mopobayá ná utuan, bo tongobotak doman in mopobayá in toḷatan.

ZAKHARIA 6:12

Potaau kon inia kon Akuoi ki Tuhan Inta Totok in mokawasa in noguman, ‘Intau inta dinonoi ki Inta Tokat, in mokoḷongasidon kon tampat inta pogutunannea bo sia in moposindog bui in Baḷoi i Tuhan.

ZAKHARIA 9:9

Ei intau in Sion, pokoḷungangadon! Ei intau in Yerusalem, ponggoḷokapdon! Indoiaika! Datumu in mamangoi takin nountung! Sia in datu moadil inta nodia kon kasaḷamatan. Táe moompá totok in dodia sia in noiyaput sinumakoi kon keledai, keledai batánea.

PINOGIAPAN 21:8

Bo pinoki aidan i Tuhan in ki Musa in uḷag tobatú nongkon logam bo inukatnea kon oigi tobatú. Bayongan in intau inta tobakon in uḷag, mopia aka mokoontong kon uḷag inta pinomia nongkon logam tatua.

PINOGIAPAN 35:25

Poyodungkuḷan in umat musti moḷukad kon intau inta diá sinumontuon noḻimod tatua kon gogondok in ginaḷum in intau inta kinoḻimodan tatua. Intau tatua musti diaan bui pobayá in kotá pogogadopan, tampat pinoḷaguiannea tatua. Musti in sia mogutun kon tua modapot in intau inta tungkuḷ intua nobaḻí Imang Moḷoben matoidon; bain tua bo motaaudon in sia mobui kon ḻipúnea tontaní. Tongá aka sia monaḷámai kon kotá pogogadopan inta pinoḷaguiannea tatua, bo noyodungkuḷbí bo poḷat iḻimod in ginaḷum in intau inta kinoḻimodan tatua, dá aid notuḻí tatua in deemanbí pinoḻimodan.

MATIUS 1:22

Tua in mobaḻí sinbá motompodon onu inta pinoguman i Tuhan kon nabi-Nea, nanaa:

MATIUS 16:21

Pinangkoidon kon tungkuḷ intua, ki Yesus nopotaau kon murí-Nea mita, kon Sia in musti mayá in Yerusalem bo motarima kon mobayong in roriga inta popoaid in guhanga mita in ḻipú, imang mita itoi bo mototundú mita kon agama. Bain tua bodongka ḻimodon monia, táe kon singgai intoḷunea mobiag bui in Sia.

MATIUS 26:54

Aka natua, yo naonda degá in mogintompod kon inta pinais kon bonu in Buk Motusi, inta ain noguman, kon tua in mustibí mobaḻí?”

MATIUS 26:56

Táe totuu kon tua in mustibí mobaḻí sinbá motompodon onu inta aindon pinais kon bonu in buk nabi mita.” Kon tua dumodudui-Nea noḷagui komintan nonaḷámai kon i-Nia.

MARKUS 9:31

sin koyogot in Sia motundú kon murí-Nea mita. Sia in noguman, “Adí Intau posarakan kon bonu in kawasa in intau, bo ḻimodon in Sia, táe kon singgai intoḷunea Sia in bui mobiag!”

LUKAS 21:22

Sin singgai mita tatua in ‘Singgai bidon Pohukuman’, sinbá mobaḻídon onu inta ain pinais kon bonu in Buk Motusi.

LUKAS 22:37

Sin pirisayadon in tontagá kon Buk Motusi inta noguman nanaa, ‘Sia in inanggap naonda bo intau moraat,’ mustibí mobaḻí kon i-Nakó. Sin onu inta pinais kon Buk Motusi soaḷ Akuoi, koyogot bidon mobaḻí in tanaa mako.”

LUKAS 24:46

Bo Sia in noguman kon i monia, “Kon bonu in Buk Motusi pinais nanaa: Datu Mopoposaḷamat in musti mokorasa kon roriga, bo musti mobiag bui nongkon kinopatoian-Nea kon singgai intoḷunea.

LUKAS 9:22

Bo ki Yesus in noguman doman nanaa, “Ki Adí Intau mustibí motarima kon roriga mobayong, bo Sia in bayowan in itoi mita in ḻipu, imang mita itoi bo mototundú mita kon agama bo ḻimodon, táe kon singgai intoḷunea biagon bui.”

LUKAS 9:44

“Tarukira bo dika koḻiongan in singog-Ku tanaa: Ki Adí Intau posarakan kon kawasa in intau.”

YOHANES 3:14

Bo ná doman ki Musa inta nopoponik in uḷag tambaga kon pangkoi in kayu kon padang gurun, dá natua doman in ki Adí Intau musti poḷantudon,

YOHANES 5:39

Moiko in mobalajar kon Buk Motusi sin kon bonu in raian monimu, aka natua yo mokouḻí kon kobiagan mopia bo mononoi. Bo umpakabí Buk Motusi tatua tontaní ain nobogoi in kosakusian soaḷ Akuoi.

YOHANES 5:46

Aka kuma bo moiko in mopirisaya kon i Musa, yo moiko in mopirisayabí kon i-Nakó, sin sia ain doman nomais soaḷ Akuoi.

OUMAN IN RASUL MITA 13:33

aindon sinotuu-Nea kon i naton takin daḷan nomiag bui kon i Yesus nongkon kinopatoian-Nea, ná inta ain pinais kon buk in Mazmur induanea, nanaa, ‘Ikobí nion in ki Adí-Ku, singgaipa doman naa Akuoi in mobaḻí ki Amá-Mu.’

OUMAN IN RASUL MITA 13:40

Manangka intua tarukira totok kopira, dika modapot in mobaḻí kon i monimu onu in pinoguman in nabi mita nanaa,

OUMAN IN RASUL MITA 2:27

Sin diábí pomayá-Mu mako in rohoku in kotaḷáan kon dunia intau minatoi. Bo diábí doman pomayá-Mu mako in ata-Mu inta umuran kodu-kodudui in moindoi kon koyoyangan in awak.

OUMAN IN RASUL MITA 3:18

Táe natuabí in aid i Allah mogintompod kon onu inta ain pinotaau-Nea muna pinongin nabi-Nea mita inta kai-Nia, ‘Mopoposaḷamat inta pinotabá-Nea in musti mokorasa kon roriga.’

OUMAN IN RASUL MITA 7:37

Siabí doman tua inta noguman kon bangusa in Israel, ‘Ki Allahbí in mobogoi kon inimu in tobatú nabi inta piniḻí-Nea kon sigad monimu, ná Sia ain nomiḻí kon inakó.’

IBRANI 10:1

Hukum in agama Yahudi tongábí nobogoi in gambaran inta diá nosilang kon soaḷ mita mopia inta kon singgai moiduduimai, deemanbí gambaran inta totokanea nongkon soaḷ mita tatua. Sin hukum mita tatua in diábí mokosompurna kon intau inta mamangoi mosumba kon i Allah takin kodia-dia in barang inta posumba. Umpakabí pomuḷoi in taong umuran moposumba in kuruban mita natua.

IBRANI 3:5

Saḷaku simpaḷ kon Baḷoi Allah, ki Musa in mosatiabí in nogaid kon oaidannea bo sia ain nopotaau doman in soaḷ mita inta bain popotaau i Allah kon singgai moiduduimai.

IBRANI 7:1

Ki Melkisedek naa in datu nongkon Salem bo imang i Allah inta totok in moḷantud. Wakutu in ki Abraham nobuidon nongkon pinoparangan bo nonaḷowdon kon datu mita, dá ki Melkisedek naa in namangoidon nonontomu bo nomarakat kon inia.

IBRANI 9:8

Roho i Allah nopoontongdon kino tarang pinongin atorang tatua, kon solama ḷoḷaigan dotá in muna moisindogpa mako, yo daḷan tumuot kon bonu in yuang inta totok in motusi tatua in diápa nobukat.

PETRUS 1 1:11

Mosia in nonaridi mongo naonda bo toonu in kobaḻían intua, inta imakusud in Roho i Kristus tua in onubí inta oyúon kon awak monia. Kon wakutu intua Roho-Nea ain noguman muna kon i monia soaḷ roriga mita inta musti korasaan i Kristus bo soaḷ kamuliaan-Nea inta moiduduimai onda intua mopaḷut.

WAHYU 19:10

Dá sinumungkud in akuoi kon tayowonnea sin mosumba kon inia, táe sia in noguman kon inakó, “Donaai! Donaai mosumba kon inakó, sumbadon in ki Allah! Sin akuoi naa in tongábí doman bobantung ná iko nion bo notongkai doman i utatmu mita inta umuran kinumadai norigon kon onu inta pinoguman i Yesus!” Sin onu inta pinoguman i Yesus, tuatabí inta nopogonú kon gina in intau mita inta nopotaau in koyow i Allah.