LUKAS 2:4 - Alkitab Singog In Mongondow Masa In Tanaa

⁴ Ná doman tua in ki Yusup. Sia in nobuat nongkon ḻipú in Nazaret kon Galilea bo minayá in Betlehem butá in Yudea, ḻipú inta kinolahiran i Daud, sin sia in buí i Daud.

LUKAS 2:4 Iomraidhean Croise

KINOBAḺIAN 35:19

Naonda in ki Rahel minatoi, sia iḷobong kon bingkí in daḷan inta mopobayá in Eprata, inta masai naa sinangoian Betlehem.

KINOBAḺIAN 48:7

Tua mita pinomiaku sin ki Rahel ki inámu. Kon binayáanku nobui nongkon Mesopotamia, ki inámu minatoi kon butá in Kanaan, diá noyayú nongkon Eprata, bo totok in norobonoḷ in ginaku. Iḷobongku in sia kon tua, kon bingkí in daḷan mayá ná Eprata.” (Tanaa mako Eprata tua in Betlehem.)

MIKHA 5:2

Dá, ki Tuhan in mopomayádon in umat-Nea kawasaan in musung mita monia modapot in bobay inta ain sinantú mobaḻí ki iná in mongongawasa tatua mopononggadídon kon i-Nia. Mopaḷut mako kon tua intau mita tongobangusanea inta kon pinoḷumbúan in potobatúondon bui in bangusa monia.

MATIUS 1:20

Tongá kon wakutu in sia koyogot nopomiki-mikirmai kon makusudnea tatua, malaekat i Tuhan namangoi kon inia kon bonu in togoindop bo noguman: “Yusup, buí i Daud, donaaibí moondok iko motonibuḷoi takin i Maria, sin adí inta kon bonupa in siannea tua in nobaḻí sin kawasabí in Roho i Allah.

MATIUS 2:23

Kon tua, sia nogutun kon ḻipú inta tangoinea in Nazaret. Tua komintan nobaḻí sinbá motompodon Pirman inta aindon pinoyaput i nabi mita, kon sia in tangoion, “Intau in Nazaret.”

LUKAS 2:3

Intau mita minayá nokipais in tangoi monia kon ḻipú monia tontaní.

LUKAS 2:5

Sia takin i Maria ki kantangnea inta sidiadon tua, nokipais doman in tangoi monia.

LUKAS 4:16

Ki Yesus minayá doman in Nazaret, tobatú ḻipú inta kinoitoian-Nea. Kon singgai in Sabat, podudui in kabiasaan-Nea, Sia minayá in baḷoi pososambayangan. Sia in sinimindog bo nobaca kon Buk Motusi,

YOHANES 1:46

Táe ki Natanael in noguman, “Eta oyúon degá in mopia in mamangoi nongkon Nazaret?” Dá kai Pilipus doman, “Koḻigai, indoianmudon tontaní!”

YOHANES 7:42

Kon Buk Motusi ain pinais, kon Datu Mopoposaḷamat in nongkon buíbí i Daud, bo mamangoibí nongkon ḻipu in Betlehem, ḻipu inta pinogutunan i Daud koḻipod.”

RUT 1:19

Dá nongingguputdon in mosia kon bobayáan noidapot in Betlehem. Naonda in yaput monia kon tua, bayongan in intau kon ḻipú tatua nodowawá. Bayongan in bobay kon tua noḻibó, “Totuu degá kon ki Naomi in sia tua?”

RUT 2:4

Diá noonggot kon tua ki Boas namangoi nongkon Betlehem bo nopoyaput in tosingogon tanaa kon intau mita inta mororatab tatua, “Poigumon mako ki Tuhan kotaki-takin monimu,” Intau mita mororatab tatua in notubag, “Poigumon mako ki Tuhan momarakat kon i Amá.”

RUT 4:11

Intau mita inta dinuí itoi kon tua bo intau ibanea inta kon tua noguman, “Oo, kamidon in sakusinea. Poigumon mako ki Tuhan in mopobaḻí kon i buḷoimu tua naonda bo ki Rakhel bo ki Lea inta nopononggadí in adí mobayong kon i Yakub. Poigumon mako iko in mobiagdon mooyúon totok kon sigad in intau mita nongkon inanakan in Eprata bo poigumon doman mako iko in mobaḻídon intau inta tango-tangoiondon totok kon Betlehem.

RUT 4:17

Bobay mita inta kon topodiugmai monia nonontangoi kon adí tatua ki Obed. Kon bayongan in intau mosia noguman, “Ki Naomi aindon kogadí kon adí ḷoḷaki tobatú!” Ki Obed naa inta kon singgai noiduduimai nobaḻí ki amá i Isai, bo ki Isai naa inta ki amá i Daud.

SAMUEL 1 16:1

Diá noonggot kon tua ki Tuhan noguman kon i Samuel, “Dapotpa in toonu iko umuran mokuyang in gina tongá popisí in ki Saul? Sia tua in diá bidon ináku-Ku datu in Israel! Tanaa in pogamádon kon ḷana in zaitun bo bayádon kon Betlehem, kon intau inta ki Isai in tangoinea, sin ki adínea tobatú ain piniḻí-Ku nobaḻí datu.”

SAMUEL 1 16:4

Ki Samuel nomia kon ná inta pinoguman i Tuhan. Naonda in sia nodapot kon Betlehem, itoi mita in kotá kon tua nonontomu kon inia takin noitaḻikokog bo noḻibó, “Degá kinoangoian i Amá naa in mokopoangoi kon saḷamat?”

SAMUEL 1 17:12

Ki Daud tua in ki adí i Isai intau in Eprata, nongkon Betlehem kon Yohuda. Ki Isai naa in kogadí kon ḷoḷaki taya waḷu, kon tungkuḷ in ki Saul nomarenta, ki Isai in nogoguyangdon totok.

SAMUEL 1 17:58

Bo ki Saul in noḻibó kon inia, “Uḻe intau inta mobagupa! Ki adí i ine in iko nion?” Ki Daud in notubag, “Bobantung naa in ki adí i Isai nongkon Betlehem.”

SAMUEL 1 20:6

Aka ḻibóon i amámu nongonu sin akuoi in diábí noiangoi, yo pogumandon kon i Tuangku, kon akuoi in nopoigumdon kon inimu kon akuoi in ḷagidon mobui kon Betlehem, sin kon tua in pomiaandon kon upacara kuruban taongan kon bayongan in motoḷuadíku.