LUKAS 16:11 - Alkitab Singog In Mongondow Masa In Tanaa

¹¹ Dá aka bagupa soaḷ kapunyaan dunia naa bo diádon motaau pirisayaan in moiko, apapa doman kapunyaan inta kon soroga?

LUKAS 16:11 Iomraidhean Croise

MATIUS 6:24

“Diábí in tobatúmai intau in motaau monontuang kon doyowa. Sin aka natua, yo tongábí tobatú in kotabinea, yo tobatú in diábí kotabinea, andeka tongábí tobatú in duduiannea, yo tobatú in diábí. Moiko in diábí motaau mobantung kon i Allah bo kon kapunyaanmu.

LUKAS 12:33

Potaḷuidon in bayongan kapunyaanmu bo ogoi kon intau mita bogá. Bo pogaid kon pototaguan kon kapunyaanmu inta diá mogogu-goguyaat, tuata in tobatú kapunyaan inta mononoi, diá koyaputan in mononakow bo inta diá kopoguyaatan in sisik.

LUKAS 16:12

Ná doman tua, aka moiko bo diádon motaau pokiḻukadan in kapunyaan intau, yo ki inebí in moibog mobogoi onu inta mobaḻí kapunyaanmu?

LUKAS 16:9

Bo ki Yesus in bui noguman, “Indongogai in naa! Pakédon in kapunyaan kon dunia potayakan kon yobayat, sinbá aka kapunyaan tatua bo diádon in mangaḻenea, yo moiko in tantúbí tarimaan kon tampat inta mononoi.

LUKAS 18:22

Nokodongogmai kon tua in ki Yesus, noguman in Sia nanaa, “Tobatúpa in musti aidanmu: Potaḷuidon in bayongan kapunyaanmu bodongka sila-silaidon mako in doit tatua kon intau mita bogá, dá mokouḻíbí in iko kon kapunyaan kon soroga. Mopaḷut mako kon tua angoi bo duduidon kon i-Nakó.”

EPESUS 3:8

Kon sigad in bayongan umat i Allah, yo akuoibí naa in totok in mokooyá. Táe ki Allah ain noponotabi in oaidan tanaa kon inakó; oaidan mopoyaput in Habar Mopia soaḷ kaoyúonan i Kristus inta diá modai-dait;

YAKOBUS 2:5

Toropdon, Utatku mita inta kinotabiku! Intau inta nobiag nobogá kon dunia naa, piniḻí i Allah mobaḻí intau inta mooyúon kon bonu in pirisaya. Intau mita tatua in mobaḻíbí anggota in umat i Allah ná inta pinodandi i Allah kon intau mita inta kinotabi-Nea.

WAHYU 3:18

Tuamai naa in tonggina-Ku kon i monimu, potaḷui kon buḷawan kon i-Nakó, buḷawan taakan sinbá mobaḻídon mooyúon in moiko. Bo potaḷui doman kon ḷambung mobudó kon i-Nakó, sinbá mogiḷambungdon in moiko bo awak monimu inta nopilang bo mokooyá in kooḻingoiandon. Bo potaḷui domandon kon undam poḻepo kon mata sinbá mokoontongdon in moiko.