LUKAS 15:29 - Alkitab Singog In Mongondow Masa In Tanaa

²⁹ Táe adí tatua in noguman kon i amánea, ‘Aindon kon taongannea in akuoi in nogaid nobantung kon i papa. Diá dodai onda in akuoi in nomaḷawang kon parenta i papa. Yo onu degá in inogoi i papa kon inakó? Umpaka tongá ki adí in bembé diápa kon dodai in onda ki papa nobogoi kon inakó sin poramean takin yobayatku mita!

LUKAS 15:29 Iomraidhean Croise

YESAYA 65:5

Mosia in noguman ‘Bayádon koyayú, dika moḻiai kon inami sin kami in motusi bo noitondí nongkon i monimu!’ Akuoi in diádon mokoigon in mokoontong kon dodia monia! Torú-Ku kon i monia in naonda bo tuḷú inta diá mopio-piong.

ZAKHARIA 7:3

Mosia in pinotabá doman noḻibó kon imang mita bo nabi mita, nanaa, “Paraḷupa degá in kami mogamui kon kinorimumudan in Baḷoi i Tuhan takin mopuasa kon pomuḷoi in buḷan noginḻima ná inta ain inaidanmai nami kon taongannea?”

MALEAKHI 3:14

Moiko in noguman, ‘Diábí in mangaḻenea in mogundoi kon i Allah. Onubí in baragunanea in mopobayá in oaidan naton kon i Tuhan Inta Totok in mokawasa, andeka mopoontong kon i-Nia kon kita in nomanasaḷdon kon aid naton inta noitaḷá?

MATIUS 20:12

kai monia: ‘Mosia inta sinumuot pangabisan inta nogaid tongá tojam pinotongkaimu doman kon inami inta nogaid irumoriga tosinggai naa, bo nonahang kon patú in singgai!’

LUKAS 15:28

Dá sinumorú totok in ki adínea guya-guyang tatua poḷat doí sinumuot kon baḷoi. Dá iḷumuai in ki amánea bo nodondouḷug kon inia.

LUKAS 15:30

Táe naonda in nobuidon mangoi ki adí i papa inta ain nokopodaitmai kon bayongan kapunyaan i papa takin bobay mita sundaḷ, yo sia in sinomu i papa bo pinorataan kon ki adí in sapi inta totok in moḷongó!’

LUKAS 15:7

Bá poguman-Kudon kon i monimu: natua doman in kon soroga. Moḷoben totok pia in gina sin popisí tobatú intau inta ain nogogai nogaid kon dosa. Pia in gina tatua moiḻiu kon pia in gina kon i monia inta siow nopuḷú bo siow inta ain nopira bo diádon moparaḷu mogogai in mogaid kon dosa.”

LUKAS 17:10

Natua doman in moiko. Aka inaidandon mita monimu in onu inta pinoki aid kon i monimu yo singogdon nanaa, ‘Kami naa in tongábí bobantung mita inta diá in baragunanea; kami in tongábí mogaid kon onu inta pinoki aid kon inami.’ ”

LUKAS 18:9

Ki Yesus in nongonguman kon poumpamaan tanaa, sin kon tua oyúon in intau inta monganggap kon tongábí mosia in intau mobanar, bo intau ibanea inanggap monia komintanbí binaradosa.

LUKAS 19:21

Sin moondok in akuoi kon i tuang, sin ki tuang in intau motogat in gina. Bo umuran mogamá kon onu inta deeman kapunyaan i tuang. Mokoyut doman kon inta deeman pinomuḷa i tuang tontaní.’

SURAT I PAULUS KON JAMAAT RUM 10:3

Diá kinotaauan monia mongo naonda in pogogaid i Allah monompia bui kon hubungan-Nea takin intau. Bo popisí in mosia moibog dumudui kon aid monia tontaní, dá mosia in doíbí dumudui kon aid inta sinundú i Allah.

SURAT I PAULUS KON JAMAAT RUM 3:20

Sin diábí in tobatúmai in motaau mopopiaan i Allah sin popisí in mosia ain nogaid kon soaḷ mita inta kon bonu in hukum agama Yahudi. Táe hukum tatua in tongábí moponiata kon intau tua in binaradosabí komintan.

SURAT I PAULUS KON JAMAAT RUM 3:27

Manangka intua diábí in dodoyonan naton dumodia. Nongonu sin natuabí? Popisí degá kita in dinumuduidon kon onu inta pinais kon hukum agama in Yahudi? Deemanbí! Táe popisíbí in kita mopirisaya.

SURAT I PAULUS KON JAMAAT RUM 7:9

Koḻipod akuoi in nobiag diábí nomaké in hukum agama. Táe naonda in hukum agama oyúondon, yo dosa in mulaidon mobiag

WAHYU 2:17

Ki ine in mokodongog, yo tarukira in onu inta pinoguman in Roho i Allah kon jamaat mita! Mosia inta mountung, ogoi-Ku mokaan kon manna inta noibuni, bo kon batúannea in motarima kon tobatú batu mobudó nongkon i-Nakó. Kon batu tatua in pinaisdon tangoi mobagu inta diábí kinotaauan i inekadon, koḻikudbí intau inta notarima kon tua.”

WAHYU 3:17

Moiko in mosingog: ‘Kami in nobiag nooyúon bo bayongan in yagi-yagi komintandon oyúon; diádon in nogaat kon i nami.’ Táe diábí kinotaauan monimu kon moiko nion in nobiagbí nomalarat totok, bo totok doman in mokoajar kon gina in kaadaan monimu nion! Moiko nion in nomasiking, diá koḷambu-ḷambung, bo bilog.