LUKAS 11:42 - Alkitab Singog In Mongondow Masa In Tanaa

⁴² Koboditodon in moiko intau mita in Parisi, sin pododungú mita, pogamaan monimu kon mopuḷú noporsen sin posukur, táe oaid mita moadil bo tabi kon i Allah in iḻiongdon monimu. Aka mogaid kon tobatú, yo ibanea in dikabí koḻiongan.

LUKAS 11:42 Iomraidhean Croise

NEHEMIA 10:37

Kami in mogatod doman kon imang mita kon Baḷoi Tuhan in pomiaan kukis nongkon gandum inta muna-munamai kinoyut pomuḷoi in taong, bo sosumba doman mita ibanea ná anggur, ḷana in zaitun bo bayongan in ayop. Sosumba mopuḷú noporosen nongkon bungai in boyó kon gobá nami in diaan nami kon intau mita in Lewi inta nogamá kon sosumba mita mopuḷú noporosen kon kotá mita inta monononggobá.

AMSAL 21:3

Oaid inta moadil bo mobanar in mokosanang totok kon gina i Tuhan moiḻiu kon bayongan in sosumba.

MOHOHUTUBA 7:18

Pokoyayú kon doyowa inta koina. Aka kita motoguondok kon i Allah, yo notantú bidon kon kodapotan naton in onu inta sinayak.

MIKHA 6:8

Diá! Ki Tuhan in noponiatadon kon i naton onu inta mopia. Igum-Nea kon i naton in tongábí mopoaid in inta moadil, umuran moponiata in totabian, bo takin ompá in gina mobiag motobatú takin i Allah naton.

MALEAKHI 1:6

Ki Tuhan Inta Totok in mokawasa in noguman kon imang mita, “Adí tobatú in mohoromatbí kon i amánea, bo mobobantung tobatú in mohoromatbí kon i tuangnea. Akuoi i naa in ki Amámu; nongonu sin moiko in diábí mohoromat kon i-Nakó? Akuoi naa in ki tuangmu; yo nongonu sin moiko in diábí moondok kon i-Nakó? Moiko in mopoompámai kon i-Nakó, táe moiko in noḻibó, ‘Naonda in pinononingkuḻe nami kon ini-Mu?’

MALEAKHI 2:17

Binaḻí monimu in ki Allah mobú in mokodongog kon oumanmu. Táe moiko in moḻibó, “Yo naondabí in pinopobú nami in ki Tuhan?” Takin tosingogon, “Bayongan in intau inta nogaid kon inta moraat in inanggap mopia i Tuhan, bo kinoibog-Nea in mosia.” Andeka moḻibó, “Kon onda in ki Allah inta inanggap moadil tatua?”

MALEAKHI 3:8

Tanaa in Akuoi moḻibó kon inimu: Motaau degá akaḷan in intau in ki Allah? Notantúbí kon diá. Táe moiko in monguboḷbí doman kon i-Nakó. Moiko in moḻibó, ‘Naonda?’ Tubag-Ku: Kon daḷom in moguboḻi kon mopuḷú noporosen bo mobogoi in sosumba.

MATIUS 23:13

“Koboditodon in moiko, ei mototundú kon agama Yahudi! Ei moiko intau inta mongomunapik. Sin moiko in moḷamboi kon intau inta mamangoi kon i Allah. Moiko tontaní in doíbí mobaḻí umat i Allah, bo intau ibanea inta moibog in ḷamboianbí monimu. [

MATIUS 23:23

Koboditodon ei moiko mototundú kon agama bo intau mita in Parisi! Ei moiko in intau mita inta mongomunapik. Pododungú in pogamaan monimu kon mopuḷú noporosen, tongá inta moponting totok kon bonu in hukum i Musa ḻiongon monimu.

MATIUS 23:27

Koboditodon in moiko, ei mototundú mita kon agama in Yahudi bo intau mita in Parisi! Ei intau mita inta mongomunapik! Moiko in naonda bo poḷoḷobongan inta cinet nobudó; kon dotá in ḷuainea ontongan mopira bo modarit, táe kon bonunea nopuḻing in tuḷan bo noyagi-yagimai in kotoran.

LUKAS 18:12

Akuoi in mopuasa kodua in todiminggu, bo kon pomuḷoi in diminggu akuoi in umuran mobogoi in mopuḷú noporsen nongkon onu inta nouḻíku.’

YOHANES 5:42

Kinotaauan-Kubí in moiko. Kinotaauan-Kubí kon diábí in tabi monimu kon i Allah.

YOHANES 1 4:20

Aka oyúon in intau moguman, “Akuoi in motabi kon i Allah,” táe sia in diá motabi kon i utatnea, yo mouboḷ in intau tatua. Sin intau inta diá motabi kon i utatnea inta ontongonnea mako, tantú diábí doman kumaan kon akaḷ aka sia in motabi kon i Allah inta diá inontongnea.

SAMUEL 1 15:22

Táe ki Samuel in noguman, “Onda degá in koibog i Tuhan, kotoindudui andeka kuruban sosumba? Kotoinduduibí kon i Tuhan in mopia-pia nongkon moposumba in kuruban. Dumuduibí kon parenta-Nea in mopia-pia nongkon ḷongó in domba.