LUKAS 10:42 - Alkitab Singog In Mongondow Masa In Tanaa

⁴² Bá poguman-Ku kon inimu kon tongábí tobatú in totok moponting. Ki Maria ain nomiḻí kon inta mopia, inta diábí bui gamáan kon inia.”

LUKAS 10:42 Iomraidhean Croise

MAZMUR 119:111

Parenta-Mu in bongkoḷku modapot in mononoi, inta nokoḷunganga kon ginaku.

MAZMUR 119:173

Igumon mako Iko in umuran moibog motuḷung kon inakó, sin sinantúkudon kon dumudui kon atorang-Mu.

MAZMUR 119:30

Piniḻíkudon kon motoindudui, parenta-Mu in umuran toroponku mako.

MAZMUR 142:5

Kon dodai in akuoi nobobui kon sikumai, diábí in inontongku in motuḷung kon inakó. Diábí in nogoḻingoi kon inakó, andeka inta nopandungmai kon inakó.

MAZMUR 17:15

Táe akuoi in imindoibí kon ini-Mu, sin akuoi in diá kotaḷá. Kon tungkuḷ in akuoi nobangon, kinoangoian-Mu nokoḷunganga kon ginaku.

MAZMUR 27:4

Tongábí tobatú in igumonku kon i Tuhan, tongábí naa in koibogku: mogutun kon Baḷoi Tuhan kinoouput in kobiaganku, sin motarima kon kopopia i Tuhan bo mopoigum sinbá kapiton-Nea.

MAZMUR 73:25

Ki inebí in kapunyaanku kon soroga koḻikudbí in Iko? Tongábí Iko diábí in ibanea mako in koibogku in kon butá.

MOHOHUTUBA 12:13

Naonda intua komintan irai-raikumai, naa in imbuit in tosingogon inta nouḻíku. Kotoguondok kon i Allah bo duduiai in bayongan parenta-Nea, sin tuabí in mangaḻe pinomaḻían-Nea kon intau.

MARKUS 8:36

Onubí in baragunanea kon intau, aka dunia naa nobaḻídon kapunyaannea, táe sia in kobuḻian in kobiagannea?

LUKAS 10:39

Ki Marta naa oyúon in ki utatnea bobay doman inta tangoinea in ki Maria. Ki Maria naa iḻimitú mako kon diug i Yesus bo mokidongogmai kon onu in singogon-Nea.

LUKAS 11:1

Kon singgai tobatú ki Yesus in nosambayang kon tobatú tampat. Naonda in Sia nopaḷutdon nosambayang, murí-Nea tobatú noguman, “Tuhan, tundúpa in kami mosambayang, ná ki Yohanes notundú kon dumoduduinea mita.”

LUKAS 12:20

Táe ki Allah in noguman kon inia, ‘Ei iko intau inta bodok! Doḷom doman naa iko in matoi, yo ki ine in pobogoianmu kon kapunyaan inta ain sinipunmu tanion?’

LUKAS 12:33

Potaḷuidon in bayongan kapunyaanmu bo ogoi kon intau mita bogá. Bo pogaid kon pototaguan kon kapunyaanmu inta diá mogogu-goguyaat, tuata in tobatú kapunyaan inta mononoi, diá koyaputan in mononakow bo inta diá kopoguyaatan in sisik.

LUKAS 16:2

Dá inoiníneadon in bendaharanea tatua bo pinoḻiboan nanaa, ‘Degá totuu in bayongan inta ain dinongogku soaḷ oaidmu? Aka totuu kon natua, yo tanaa mako posarakaidon modait kon inakó in lapuran in bayongan oaidanmu, sin pogogaionkudon in iko.’

LUKAS 16:25

Táe ki Abraham in notubag, ‘Uḻe, toropdon adíku: iko aindon nokorasa kon bayongan inta mopira wakutu iko nobiagpa kon dunia, táe ki Lazarus naa in tongábí nokorasa kon bayongan inta diá mopia. Manangka intua tanaa mako sia in mokouḻí kon inta mopia kon naa. Yo iko in mokouḻí kon roriga.

LUKAS 18:22

Nokodongogmai kon tua in ki Yesus, noguman in Sia nanaa, “Tobatúpa in musti aidanmu: Potaḷuidon in bayongan kapunyaanmu bodongka sila-silaidon mako in doit tatua kon intau mita bogá, dá mokouḻíbí in iko kon kapunyaan kon soroga. Mopaḷut mako kon tua angoi bo duduidon kon i-Nakó.”

LUKAS 8:18

Manangka intua yo tarukiraai kopira onu inta ain dinongog monimu. Sin aka ki ine in oyúondon, yo kon inia tua in dugangan doman bui; táe ki ine in diápa, yo onu in oyúonpa kon inia gamáan domandon nongkon inia.”

YOHANES 11:1

Oyúon tobatú intau ki Lazarus in tangoinea. Sia in nogutun kon Betania noyotakin i utatnea mita bobay ki Maria bo ki Marta.

YOHANES 11:19

Kon tua nobayong intau in Yahudi in namangoi bo nohiburmai kon i Marta bo kon i Maria sin kinopatoian i utat monia.

YOHANES 12:3

Noiduduimai kon tua, ki Maria in namangoi takin kodia-dia in ḷana mobondu narwastu inta totok in momahaḷ in boḻinea degá tobotakmai in liter. Pinopobutaknea in ḷana tatua kon sioḷ i Yesus, onda intua iradatannea bui in buoknea. Dá tombonu in baḷoi tatua nobondudon in bo ḷana tatua.

YOHANES 17:3

Nanaa in kobiagan mononoi tua; ibogon tua bayongan intau in monotaau kon i Amá inta tongábí Sia tua in ki Allah inta mobanar, bo monotaau doman kon i Yesus Kristus inta pinotabá i Amá.

YOHANES 4:14

táe intau inta monginum kon tubig ogoi-Ku in diá bidon moyoga-yogang, sin tubig inta ogoi-Ku kon inia in mobaḻí bidon bokaká kon bonu in awaknea, bo umuran ḷumuai bo mobogoi in kobiagan mononoi.”

YOHANES 5:24

Totuu totok in singog-Ku tanaa: Intau inta monarukira kon singog-Ku mita, bo mopirisaya kon i-Nia inta nopotabá kon i-Nakó, yo oyúon in kobiagan mopia bo mononoi. Sia in diábí hukumon; sia in noipilatdon nongkon kinopatoian bo mokouḻí kon kobiagan.

YOHANES 6:27

Donaaibí mogaid sinbá mokouḻí kon kaanon inta modai-daitpa bo inta mobongkog. Táe pogaidbí sinbá mokouḻí kon kaanon inta diá mobongkog bo inta mobogoi in kobiagan mononoi. Kaanon tatua in ogoibí i Adí Intau kon i monimu, sin Sia ain ilantik i Allah inta ki Amá.”

KORINTUS 1 13:3

Bo umpaka daitonku ogoi kon intau nobogá in kapunyaanku, modapot posarakanku doman in awakku sin tubáan, táe aka diá in tabiku kon tumpaḷa intau, yo tua komintan beresibí diá in baragunanea.

GALATIA 5:6

Sin aka kita bo ain notobatú takin i Kristus Yesus, yo soaḷ sunaton ande diá sunaton, diábí mobaḻí soaḷ kon i naton. Sin totok moponting in pirisayabí kon i Kristus bo tua in moniata kon tabi naton kon tumpaḷa intau.

ULANGAN 30:19

Tanaa in motaau bidon moiko momiḻí mongo mobiag ande matoi, barakat i Tuhan ande kutuk-Nea. Ḷangit bo butá oiníonku mobaḻí sakusi kon simpod in tosingogonmu. Piḻídon in mobiag.

YOSUA 24:15

Aka kuma bo moiko doí mogundoi kon i Tuhan, ponantúdon kon tosingogon in singgai naa doman ki ine in koibog monimu sumbáan: kon i ilah mita ibanea inta sinumba in mogoguyangmu kon Mesopotamia koḻipod ande kon ilah mita in intau in Amori inta butánea in pinogutunan monimu masai naa. Táe kami – akuoi bo tombonu in baḷoiku – in umuranbí mogundoi tongá kon i Tuhan.”

YOSUA 24:22

Bo ki Yosua noguman, “Moikodon tontaní in nobaḻí sakusinea kon moiko ain nonimpod kon tosingogon kon tongábí mogundoi kon i Tuhan.” “Totuu,” tubag monia, “kamidon tontaní in sakusinea.”