LUKAS 10:31 - Alkitab Singog In Mongondow Masa In Tanaa

³¹ Noitongkanábí kon oyúon in tobatú imang nosiḻig nongin daḷan tatua. Táe naonda inontongnea intau inta binongkug monia tua, nomarut in sia bo nongin daḷan toḷosi.

LUKAS 10:31 Iomraidhean Croise

SAMUEL 2 1:6

Tubagnea, “Noikoḷatbí totok kon akuoi in kon Buḷud in Gilboa, bo nokoontong kon ki Saul in inumandoḷ kon pandongnea, bokaka kereta mita bo tontara in musung inta sinumakoi kon kabaḷo in dinimiugdon sin mongopung kon inia.

MAZMUR 142:4

Kon dodai in akuoi gogió bo kobuḻian in kamang, kinotaauan-Mu mongo onu in musti aidanku. Kon daḷan inta musti bayáanku, musung inumado-adop notaan kon potait kon inakó.

MAZMUR 69:20

Kinotaauan-Mu kon akuoi in totokbí in irebeg, siningkuḻe bo iraa-raatmai, inontong-Mubí in bayongan in musungku.

AMSAL 21:13

Ki ine in doí mokidongog kon amui in intau inta kinodaitan diábí doman pandungonmai aka sia in mopoigum in totuḷung.

MOHOHUTUBA 9:11

Kon dunia naa oyúonpa doman in inontongku: kon totandingan in diábí umuran intau inta moḻikat in mokountung, kon poparangan in diábí umuran intau moropot in mountung. Intau mobijaksana in diábí umuran mokouḻí kon oaidan. Bo intau mopandoi in diábí umuran mokouḻí kon kaoyúonan. Bo intau inta motaau totok diábí umuran mobaḻí ponango-nangoian. Sin ki inekabí kotugatanbí in ukur diá mopia.

YESAYA 58:7

Silaidon in kaanonmu takin intau inta gogoyon, tarimadon kon baḷoimu in intau mita inta diá kobaḷoi. Ogoiaidon in ḷambung in intau mita inta diá nogiḷambung, bo dika monoḻikud kon i utatmu inta paraḷu tuḷungan.

YEREMIA 5:31

nabi mita in monguboḷ, imang mita mogundoi podudui in ibognea tontaní bo moiko umat-Ku in moibog doman kon natua. Táe onu in aidan monimu aka moiangoidon in singgai imbuitnea?”

HOSEA 5:1

Ki Tuhan in noguman, “Indongogaidon, ei imang mita! Taridiaidon, ei intau in Israel! Indongogai, ei intau mita buí in datu! Hukuman in pinoḷabúdon kon i monimu. Sin, mustibí mokopoadil in moiko in monisig, táe noyotuuidon, moiko in nobaḻídon ná poyogaḷap kon Mizpa, naonda bo potait kon Buḷud in Tabor,

HOSEA 6:9

Imang mita kon kotá tatua in naonda bo topaanan in mogogagow inta noḷabot kon intau inta noitaḻib. Kon daḷan inta mopobayá ná kotá inta motusi kon Sikhem yo moḻimodbí doman in mosia! Bayongan in aid moraat tatua in tuodonbí monia aidan.

MALEAKHI 1:10

Ki Tuhan Inta Totok in mokawasa in noguman, “Mopia-piabí kon ḻingkopan-Ku in ngara in Baḷoi-Ku, sin diábí in mangaḻenea in moiko monontuḷú kon tudu in mezbah-Ku. Doíbí in Akuoi kon i monimu, bo doíbí in Akuoi motarima kon sosumbamu.

LUKAS 10:30

Ki Yesus in notubag, “Oyúon intau nosiḻig nongkon Yerusalem. Sia mayá in Yerikho. Kon yuak in daḷan, sia dinomok in intau mita inta mogogagow. Binongkug monia in sia bo inagow doman in bayongan kapunyaannea inta kodia-dianea. Nodait mako inagow onu in kon inia, binongkug doman monia inimibo-ibog nodapot in aindon matoi bodongka sinaḷáan monia.

LUKAS 10:32

Natua doman intau in Lewi inta noitaḻib kon tua. Nokoontongmai kon intau tatua, nomarut doman in sia bo nongin daḷan toḷosi.

RUT 2:3

Dá minayádon in ki Rut kon gobá bo nopuyut kon gandum dumuduianmai kon intau mita inta noratab. Noitongkanábí in sia kon gobá i Boas.