LUKAS 1:32 - Alkitab Singog In Mongondow Masa In Tanaa

³² Sia in mobaḻí intau moḷoben bo tangoion ki Adí i Allah Inta Totok in moḷantud. Baḻíon i Allah in Sia Datu naonda bo ki Daud ki ḷaki-Nea.

LUKAS 1:32 Iomraidhean Croise

SAMUEL 2 7:16

Iko in umuranbí mokouḻí kon buí, bo baḻíon-Kubí in dodatuanmu tantú moisindog mako. Kinoouputbí in dunia naa intau tobatú nongkon buímu in momarenta mobaḻí datu.’ ”

MAZMUR 132:11

Ki Tuhan in nongibotdon kon i Daud; Sia in diábí monginggamá kon dandi-Nea. Guman-Nea, “Ki adímu tobatú in baḻíon-Kubí datu sin momarenta monoḻiu kon inimu.

MAZMUR 132:12

Aka ki adímu mita motoḷutui kon dodandian-Ku, bo motoindudui kon parenta-Ku mita, dá modapot in mononoi buí monia in monoḻiu kon ini-Mu mobaḻí datu.”

YESAYA 16:5

Onda intua intau tobatú nongkon buí i Daud in mobaḻí datu, bo sia in momarenta kon bangusanea podoyon kon tabi bo satia. Sia in moposindog in inta moadil bo moḷamemet in mogaid kon inta mobanar.)

YEREMIA 17:25

Aka moiko totu-totuu mopobayá in parenta-Ku mita tatua, dá datu mita bo pojabat mita inta nomarenta ná ki Daud in tumuotbí kon bonawang mita in kotá in Yerusalem. Mosia moyotakin in intau in Yohuda bo intau in Yerusalem, in tumakoibí kon roda inugut in kabaḷo, dá kotá in Yerusalem moramedon totok.

DANIEL 2:44

Kon sempo in pomarentaan in datu mita tatua, ki Allah kon soroga in moposindog in dodatuan tobatú inta umuran moisindog modapot in mononoi bo inta diábí kotaḷowan in bangusa taondaka. Dodatuan tatua in morimumud bo mopoyobauk in bayongan dodatuan ibanea tatua.

MATIUS 1:1

Nanaa in asaḷ-usuḷ i Yesus Kristus, buí i Daud inta buí i Abraham.

MATIUS 12:42

Kon wakutu in Pohakiman, bokí nongkon dotá in Toḷatan mobangon moyotakin in intau masa in naa bo tumakin doman mohukum. Sin bokí tatua in namangoi nongkon popod in dunia sin mokidongog kon totundú i Salomo. Táe kon naa inta sinimindog mako in noiḻiubí kon i Salomo!”

MATIUS 28:18

Dá ki Yesus in dinimiug kon i monia bo noguman, “Akuoi in inogoiandon in bayongan kawasa kon soroga bo kon dunia.

MATIUS 3:11

Akuoi mopobaptis in tubig kon i monimu, saḷaku bukti kon moiko aindon mogogai in mogaid kon inta diá mopia, táe Sia inta mamangoi moiduduimai kon inakó naa, kawasa-Nea moiḻiu totok kon inakó, sedang tongá mobuka kon togot in sapatu-Nea yo diá patus in akuoi. Sia in mopobaptis kon i monimu in Roho i Allah bo tuḷu.

MARKUS 14:61

Táe tongá kibio-biómai in ki Yesus. Totokbí in doí notubag in Sia. Bo buipa doman imang moḷoben tatua noḻibó kon i-Nia, “Degá iko nion Datu Mopoposaḷamat, ki Adí i Allah inta Totok in mokudus?”

MARKUS 5:7

Bo nomaḷú noropot, “Yesus, Adí i Allah inta Totok in Moḷantud! Onuon-Mu in akuoi ná? Podoyon kon tangoi i Allah, akuoi mopoigum kon ini-Mu, donaai rorigaan in akuoi!” (

LUKAS 1:15

Sia in mobaḻí intau moḷoben kon tayowon mata i Tuhan, bo sia tua in diábí monginum kon anggur andeka oinumon ibanea mako inta mokoḷoḷangu, bo sia in kinawasadon in Roho i Allah nongkon bonupamai in sian i inánea.

LUKAS 1:35

Dá tubag in malaekat tatua kon inia nanaa, “Roho i Allah takin kawasa-Nea inta totok in moḷantud mamangoi bo mongawasa kon inimu. Tuamain Adí inta polahirmu tua in tangoion Mokudus, ki Adí i Allah.

LUKAS 1:76

Bo iko, adí-Ku in tangoion nabi i Allah Inta Totok in moḷantud. Iko in pinotabá umuna kon i Tuhan sin moposadia in daḷan bayáan-Nea.

LUKAS 3:16

Tuamai in ki Yohanes noguman kon i monia komintan, nanaa, “Akuoi in Mopobaptis kon i monimu in tubig, táe moiangoibí in intau inta moḷobe-ḷoben nongkon inakó. Umpaka tongá mobuká kon togot in sapatunea yo diá kobaḻí in akuoi. Sia tua in mopobaptis kon i monimu in Roho i Allah bo tuḷu.

LUKAS 6:35

Sabanarnea in deemanbí natua! Nanaabí in musti aidan monimu: Kotabibí in saturumu bo aidai in onu inta mopia kon i monia, bo popoḷuanaibí in mosia, táe donaai potayakan kon kauntungan in mosia. Aka natua in aidan monimu, yo moiko in motarimabí kon bungai in oaidmu inta moḷoben totok bo moiko in mobaḻí doman ki adí mita i Allah Inta Totok in moḷantud. Sin Sia in mopiabí doman kon intau mita inta diá motaau mosukur kon i Allah bo kon intau mita moraat.

YOHANES 12:34

Intau mobayong kon tua noguman kon i-Nia, “Podudui kon Buk Hukum in agama nami, Datu Mopoposaḷamat tua in mobiagbí mononoi. Yo nongonu sin Iko in mogumanbí kon ki Adí Intau in poḷantudonbí kon dunia naa? Ki inebí in ki Adí Intau tatua?”

YOHANES 6:69

Kami naa in nopirisaya bo noyakin bidon kon ki Tuhanbí in totabá inta motusi nongkon i Allah.”

OUMAN IN RASUL MITA 16:17

Bobay tatua in dumuduianmai kon i Paulus bo kon inami komintan bo sindaḷan momaḷú, “Intau mita tanaa simpaḷbí mita i Allah Inta totok in Moḷantud! Mosia in mamangoi mopotaau in daḷan kasaḷamatan kon i monimu komintan!”

OUMAN IN RASUL MITA 2:30

Sia naa in tobatú nabi inta nonotaau kon ki Allah aindon nodandi pinodoyon kon ibot kon inia kon oyúon in buínea in baḻíon i Allah Datu.

OUMAN IN RASUL MITA 2:36

Manangka intua bayongan in intau Israel in musti monotaau totok kon ki Yesus inta ain pinopopakú monimu kon kayu pinoyotaḻempang binaḻí bidon i Allah Tuhan bo Datu Mopoposaḷamat!”

OUMAN IN RASUL MITA 7:48

Tongá ki Allah Inta Totok in moḷantud tatua, diábí nogutun kon baḷoi inta inaidan in ḻima intau tatua; sin kon bonu in buk in nabi in pinais nanaa,

SURAT I PAULUS KON JAMAAT RUM 1:4

Táe podudui kon i Allah yo noniata magí Sia in ki Adíbí i Allah. Tua komintan noniata kon kawasa inta totok in moḷoben inta nokobiag kon i-Nia nongkon kinopatoian-Nea.

WAHYU 3:7

“Paisdon kon malaekat in jamaat kon Piladelpia nanaa: Naadon in koyow nongkon i-Nia inta Mokudus, Inta Mobanar bo ki Inta nokadai kon kokunsi i Daud; Aka Sia in mobuká yo diábí tobatúmai in mokoḻingkop; bo aka ḻingkopan-Nea, yo diábí doman tobatúmai in mokobuká.