KOLOSE 3:4 - Alkitab Singog In Mongondow Masa In Tanaa

⁴ Aka ki Kristus inta nobaḻí pangkoi in kobiagan naton, koontongandon bui yo moiko doman in koontongan moyotakin-Nea kon bonu in kamuliaan-Nea!

KOLOSE 3:4 Iomraidhean Croise

MAZMUR 17:15

Táe akuoi in imindoibí kon ini-Mu, sin akuoi in diá kotaḷá. Kon tungkuḷ in akuoi nobangon, kinoangoian-Mu nokoḷunganga kon ginaku.

MAZMUR 73:24

Kinapit-Mu in akuoi in tonggina, bo sinarima-Mu in akuoi takin horomat kon singgai moiduduimai.

MATIUS 13:43

Kon wakutu intuata intau mita inta nogaid kon onu in kinoibog i Allah monindar ná mata in singgai kon bonu in Dunia Mobagu i Allah, ki Amá monia. Aka oyúon in bongoḷan yo indongogai!”

LUKAS 17:30

Natua doman in mobaḻí kon wakutu in Adí Intau mamangoi.

YOHANES 11:25

Ki Yesus in noguman bui kon i Marta, “Akuoibí inta mobogoi in kobiagan bo inta momiag kon intau minatoi. Intau inta mopirisaya kon i-Nakó in mobiagbí, umpakabí in sia minatoidon.

YOHANES 14:3

Naonda in Akuoi mayádon moposadia in tampat kon i monimu, Akuoi in buibí mamangoi monontomu kon i monimu, sinbá kon onda in Akuoi, kon tua doman i moiko.

YOHANES 14:6

Ki Yesus in notubag, “Akuoibí naa in daḷan kon monotaau kon i Allah bo mokouḻí kon kobiagan. Diábí in tobatúmai intau in mokoyaput kon i Amá, aka diá mongin i-Nakó.

YOHANES 17:24

Amá, ibogon-Ku, sinbá mosia inta ain inogoi i Amá kon i-Nakó in moyotakin-Ku doman kon tampat inta bayáan-Ku, sinbá koontongandon monia in kamuliaan-Ku, inta ain inogoi i Amá kon i-Nakó. Sin Akuoi in kinotabi i Amá kon wakutu in dunia naa diápa pinomia.

YOHANES 20:31

Táe onu inta pinais kon buk tanaa, makusudnea kon bá mopirisaya in moiko kon ki Yesusbí tua in Datu Mopoposaḷamat, bo ki Adí i Allah, bo popisí in pirisayamu tatua dá mokouḻí i moiko kon kobiagan.

OUMAN IN RASUL MITA 3:15

Moiko in noḻimodon kon i-Nia inta pangkoi in kobiagan in bayongan intau, táe bui bo biniag i Allah in Sia nongkon sigad in intau minatoi. Bo kami naa in nokoontong tontaní kon tua komintan.

SURAT I PAULUS KON JAMAAT RUM 8:18

Podudui in raianku, bayongan in roriga inta korasaan naton tanaa mako, diábí tugat in poyobandingonmai in kamuliaan inta poponiata kon i naton.

SURAT I PAULUS KON JAMAAT RUM 8:19

Bayongan in mahaḷuk mogoḷat bo moibogdon totok mokoontong kon wakutu i Allah moponiata kon i adí-Nea mita.

KORINTUS 1 1:7

Tuamai barakat kon i monimu in diábí modai-dait kon dodai in moiko mogoḷat mako kon koangoian i Tuhan naton ki Yesus Kristus.

KORINTUS 1 15:43

Awak inta iḷobong tua in awakbí inta diá mopia bo moyangkó; táe naonda in biagondon bui, sia in ogoiandon in awak inta mogaga bo moropot.

KORINTUS 2 4:17

Sin yoyiga inta diá mobogat totok naa, inta tantú korasaan nami tanaa in mobogoibí in kopiaan mononoi, moiḻiu kon rupa-rupa roriga inta kinorasaan nami tontaní.

GALATIA 2:20

Tongá akuoi in nobiag, táe deeman bidon akuoi, sin ki Kristus bidon in naa kon awakku. Bo kobobiagku tanaa mako in kobobiag bidon inta pinodoyon kon pirisayaku kon i Adí i Allah inta notabi kon inakó, bo inta ain noposarakan in awak-Nea tontaní sin kopontinganku.

PILIPI 3:21

Awak naton inta ilo-ilow bo inta diá mononoi naa, baḷuian i Kristus mobaḻí naonda bo awak-Nea tontaní inta momulia. Motaau-Neabí aidan intua, sin oyúonbí in kawasa nongkon i-Nia mopotungkud in bayongan yagi-yagi.

TESALONIKA 1 4:17

Mopaḷut mako kon tua kita inta nobiagpa naa, bingkatondon moyotakin monia mamonik in ḷangit moyodungkuḷ i Tuhan. Bain kon tuata bo mogutundon in kita takin i Tuhan.

TIMOTIUS 1 6:14

Duduiaibí in bayongan parenta tanaa, dikabí tobatúmai in taḻiban modapot kon singgai koangoian bui i Tuhan naton ki Yesus Kristus.

TIMOTIUS 2 1:1

Uḻe Timotius adíku inta totok in kinotabiku! Akuoi, ki Paulus, nomais kon surat tanaa, mopoigum mako doa sinbá ki Allah inta ki Amá naton bo ki Yesus Kristus, Tuhan naton in umuran mobogoi kon inimu in barakat, totabi bo kobiagan motompia. Pinoduduibí kon ibog i Allah akuoi naa in nobaḻí rasul i Kristus Yesus bo poḷat pinotabá mopotaau in daḷan kobiagan inta pinodandi i Allah. Kobiagan tatua in sinarimadon naton sin kita ain notobatú i Kristus Yesus.

TIMOTIUS 2 4:8

Bo tanaa mako in pinopooḷatdon mako kon inakó in saḷaku intau inta nountung. Kon singgai ponantúan ki Tuhan, hakim inta moadil totok tua in moposarakan in tombuinag tatua kon inakó. Deemanbí doman tongá akuoi in motarima kon tombuinag natua, táe bayonganbí doman intau inta umuran mogoḷat mako kon koangoian bui i Tuhan.

TITUS 2:13

Tanaa mako, kita in mogoḷatpa mako kon singgai inta iharap mako naton tua. Kon singgai tatua, dunia naa in mokoontongdon kon kamuliaan i Yesus Kristus, Sia tuata in ki Allah Inta Totok in Momulia bo Datu Mopoposaḷamat naton.

IBRANI 9:28

Natua doman in ki Kristus, tongábí komintan pinosumba saḷaku kuruban pinotobut kon dosa in intau mobayong. Sia in mamangoipabí bui, táe deeman bidon mamangoi mogimpaḷut kon persoalan dosa, táe dongka bidon moposaḷamat kon intau mita inta mogoḷat mako kon koangoian-Nea bui.

PETRUS 1 1:13

Tuamai moiko in musti umuran mobasadia. Pokoingat bo totu-totuu poharap kon barakat inta bain ogoi kon i monimu kon wakutu in ki Yesus Kristus mamangoi bui.

PETRUS 1 5:4

Sahingga in kon wakutu Gombala inta momulia mamangoi bui, moiko in motarima kon tombuinag moḷoben inta diá mogogu-goguyaat.

YOHANES 1 2:28

Pogumanku bui kon i monimu adíku mita: Kobiag umuran motobatú takin i Kristus, sinbá aka Sia in mamangoidon bui, yo kita in diádon moondo-ondok in tumayow kon i-Nia, bo diá domandon mooya-oyá.

YOHANES 1 3:2

Utat mita inta kinotabiku! Tanaa mako kita ain nobaḻí ki adí i Allah, táe kaadaan naton kon singgai moiduduimai in diápa notarang.Tongá kinotaauan naton kon aka ki Kristus in mamangoi, kita naa in mobaḻí ná Sia, sin kita in mokoontong kon i-Nia kon bonu in kaadaan-Nea inta sabanarnea.

YOHANES 1 5:12

Intau inta mopirisaya kon i Adí i Allah, in mokouḻí kon kobiagan tatua; bo intau inta diá mopirisaya kon i Adí, in diábí mokouḻí kon kobiagan tatua.

YUDAS 1:24

Ki Allah, inta mokosanggup moḷukad sinbá moiko diá moḷabú, bo inta mokosanggup modia kon i monimu mayá in tampat pomomarentaannea inta momulia takin gina mosanang bo modarit.

WAHYU 2:7

Ki ine in mokodongog, yo tarukiradon onu in pinoguman in Roho i Allah kon jamaat mita! Mosia inta mountung, ogoi-Ku mokaan kon bungai inta nongkon pangkoi in kobiagan inta nobiag kon taman i Allah.”

WAHYU 22:1

Bo malaekat tatua in nopoontong doman kon inakó in ongkag inta mobogoi in kobiagan. Ongkag tatua in nosilang totok naonda bo kristal inta moiḻig nongkon tampat pomomarentaan i Allah bo i Adí in Domba tatua,

WAHYU 22:14

Mosanangdon totok in intau inta nomatá kon jubahnea kinodarit totok. Mosia in motaau mokaan kon bungai in pangkoi in kayu kobiagan bo tumuot kon bonu in kotá mongin ngaranea.