KINOBAḺIAN 6:17 - Alkitab Singog In Mongondow Masa In Tanaa

¹⁷ Poangoi-Ku in ḷunud moḷoben sin poyopú kon bayongan in mahaḷuk inta nobiag kon dunia naa. Bayongan yagi-yagi kon dunia naa modaitbí matoi,

KINOBAḺIAN 6:17 Iomraidhean Croise

KINOBAḺIAN 2:7

Onda intua ki Tuhan Allah in nogamá kon butá bodongka pinomia-Nea in tobatú intau, bodongka pinopoirupan in tompot inta mobogoi in kobiagan, pinopoirup kon bonu in ngiungnea; dá nobiagdon intau tatua.

KINOBAḺIAN 6:13

Bo ki Allah in noguman kon i Nuh, “Sinimpod-Kudon in singog kon daiton-Kudon paḷuton kobiagan in bayongan mahaḷuk. Yopúon-Kudon in mosia takin butá naa, sin butá naa nopuḻingdon in oaid monia inta moromú.

KINOBAḺIAN 6:16

Atopai in uangga tatua, bo tonsigadnea togogopat nopuḷú bo opat nosenti pomuḷoi in atop bo dindingnea mita. Uangga tatua pomia toḷu noḷandak, bo aidai doman in tobatú ḷoḻingkop kon sínea.

KINOBAḺIAN 6:7

dapot in Sia noguman, “Yopúon-Kudon in intau inta ain pinomia-Ku tua, bo takin doman bayongan in ḷagapan bo mahaḷuk mita ibanea, sin Akuoi in nomanasaḷdon ain nopomia kon i monia.”

KINOBAḺIAN 7:15

Tobatú in koḷakian bo tobatú doman in kobaayan nongkon bayongan rupa in mahaḷuk sinumuot kon bonu in uangga moḷoben tatua noyotakin i Nuh,

KINOBAḺIAN 7:17

Ḷunud tatua in umuran nonagom kon dunia naa kon bonu in opat nopuḷú nosinggai bo opat nopuḷú nogobii, bo tubig nobaḻídon totok moḷantud nodapot in uangga moḷoben tatua iḷumantakdon mako.

KINOBAḺIAN 7:4

Pitupa nosinggai bo poonag-Ku in uyan inta diá motonta-tontá kon bonu in opat nopuḷú nosinggai bo opat nopuḷú nogobii, sinbá mahaḷuk nobiag inta ain pinomia-Ku tua in modait matoi.”

KINOBAḺIAN 9:9

“Tanaa Akuoi in mogaid kon dodandian-Ku takin i monimu bo takin buímu,

AYUB 22:16

Mosia in irabut kon dodai in deemanpa wakutunea matoi, bo iniḻig in ḷunud inta namuntag.

MAZMUR 107:34

Butá mopia binaḻí-Nea rawang simuton, popisí in aid moraat in intau mita inta nogutun kon tua.

MAZMUR 29:10

Ki Tuhan in nongawasa kon ḷunud moḷoben, Sia in nongawasa saḷaku Datu modapot in mononoi.

IḶUAIAN 14:17

Potogaton-Ku in gina Intau in Mesir bá umuran aḷowan monia in intau in Israel, bo poontong-Kudon in kawasa-Ku kon i datu in Mesir, kon tontaranea, kon keretanea mita bo mododianea.

YESAYA 51:12

Ki Tuhan in noguman, “Akuoibí inta noḻipoi kon i monimu. Nongonu sin moondokbí in iko kon intau inta mato-matoi, kon intau inta iḷumbú naonda bo bonok?

YESAYA 54:9

“Naonda bo kon tungkuḷ i Nuh Akuoi in nodandi kon ḷunud moḷoben in diá bidon monagom kon butá, natua doman in tanaa Akuoi in modandi kon Akuoi in diá bidon tumorú andeka mopogogondok kon i monimu bui.

YEHEZKIEL 34:11

Ki Tuhan Inta Totok in moḷantud in noguman, “Tayakon-Kudon tontaní in domba-Ku mita bo tompiaan in mosia,

YEHEZKIEL 34:20

Tuamai, Akuoi, ki Tuhan Inta Totok in moḷantud moguman kon inimu, ei domba mita inta noḷongó, kon Akuoi in mamangoibí bo mobaḻí hakim kon sigad in domba mita inta moropot bo domba mita inta noḻemé.

YEHEZKIEL 5:8

Dá Akuoi, ki Tuhan Inta Totok in moḷantud, noponiata kon Akuoi in musungmu. Iko in hukumon-Kubí kon tayowon in bangusa mita ibanea.

YEHEZKIEL 6:3

Pokiindongogaidon in mosia bo pokitaridiai kon onu in poguman-Ku, ki Tuhan Inta Totok in moḷantud kon buḷud mita tatua, bo kon tombuḷud doman mita, kon irang mita bo kon ḷopá mita. Totuu, Akuoi in mopoangoibí in kedang sin morimumud kon pososumbaan kon berhala.

HOSEA 5:14

Naonda bo singa inta monubu, natuata in pononubú-Ku kon intau in Israel bo Yohuda. Akuoibí tontaní in moyingki-yingkit kon i monia, bodongka taḷaan-Ku. Aka irudon-Ku in mosia mayá, yo diábí tobatúmai in intau in mopoḷuat kon i monia.

IMAMAT 26:28

Dá tumorúdon totok in Akuoi poḷat mosambok kon i monimu, bo mohukum kon i monimu inta kobogat in hukuman tatua in kopitu nongkon ná inta ain pinopoaid-Ku kon i monimu.

AMOS 9:6

Ki Tuhan in moposindog in baḷoi-Nea moyayú kon toḷungayá, kon tudu in butá pinosindog-Nea in ḷangit nobaḻí kubah, bo tubig nongkon dagat pinopobutak-Nea kon toba, inta nogaid kon tua mita tangoi-Nea in ki Tuhan!

MATIUS 24:39

Bo diábí kinotaauan monia in onu inta nobaḻí, wakutu in ḷunud diápa noiangoi bo nomutú kon i monia komintan. Natua doman in mobaḻí kon masa in koangoian i Adí Intau.

LUKAS 17:27

Intau mita in nongaanbí bo nonginum, nobuḷoi bo pinobuḷoi nodapot kon singgai ki Nuh sinumuotdon kon bonu in kapaḷ bo ḷunud moḷoben namangoi bo nomutú kon intau mita tatua.

SURAT I PAULUS KON JAMAAT RUM 5:21

Kita naa in mustibí matoi popisí in nogaid domandon kon dosa. Táe ki Allah in notabibí kon i naton bo nobogoi in daḷan kon i naton kon moyodame bui takin-Nea. Bo popisí in hubungan naton takin i Allah notompiadon bui, dá Sia in nobogoi domandon in kobiagan moitutui bo inta mononoi kon i naton inta pinongin i Yesus Kristus, ki Tuhan naton.

SURAT I PAULUS KON JAMAAT RUM 6:23

Sin aka bungai in dosa tua in popatoibí, táe kobiagan mopia bo mononoi in moyotakin i Kristus Yesus, Tuhan naton, tua in inogoibí i Allah pinomorosen.

ULANGAN 32:39

Indoiaika, tongábí Akuoi in ki Allah, diábí in Allah ibanea koḻikudbí in Akuoi. Akuoi in moḻimod bo momiag, monompaḻí bo mongundam. Aka Akuoi in mogaid, diábí tobatúmai in intau in mokoḷawang.

IBRANI 11:7

Popisí in nopirisaya, dá pinogumanandon i Allah in ki Nuh kon soaḷ mita inta mobaḻí kon singgai moiduduimai, inta diábí koontongannea. Ki Nuh in nopirisaya kon i Allah, dá inindongogannea in onu inta pinoguman i Allah kon inia. Pinomianea in kapaḷ inta kon singgai noiduduimai nobogoi in kasaḷamatan kon inia bo motoḷuadínea. Dunia naa i hukum i Allah, táe popisí in ki Nuh nopirisaya, dá pinoniatadon i Allah kon intaubí mopia in sia.

PETRUS 1 3:20

tuata in roho mita in intau inta diá motoindudui kon i Allah kon sempo i Nuh. Kon wakutu intua nosabar totok in ki Allah nogoḷat kon i Nuh dodai in nogaid kon kapaḷnea. Tongábí taya waḷu inta kon bonu in kapaḷ tatua in pinosaḷamat nongkon ḷunud inta moḷoben totok tatua.

PETRUS 2 2:5

Natuabí doman in pinomia kon dunia tungkuḷ intua, diábí pinomayá mako i Allah kotaḻiban in hukuman. Pinoangoi i Allah in ḷunud moḷoben totok kon dunia in intau mita moraat tungkuḷ intua. Tongábí ki Nuh takin intau pitu ibanea in pinosaḷamat i Allah, sin sia in nopotaau in habar soaḷ kobobiag inta mokosanang kon gina i Allah.