KINOBAḺIAN 40:5 - Alkitab Singog In Mongondow Masa In Tanaa

⁵ Kon doḷom tobatú intau inta mopoposadia in oinumon i datu bo inta mopoposadia in kaanon i datu tumpaḷa sinumogoindop. Táe togoindop nayadua tua in diá notongkai dá mangaḻenea in diábí doman notongkai.

KINOBAḺIAN 40:5 Iomraidhean Croise

KINOBAḺIAN 20:3

Kon doḷom tobatú ki Allah nokipogontong kon i datu tatua kon bonu in togoindop, bo noguman, “Iko in matoi, popisí in ginamámudon in bobay tatua; sin sia ain bidon kobuḷoi.”

KINOBAḺIAN 40:1

Naonda in tua mita nobaḻí, bobantung i datu in Mesir doyowa, inta mopoposadia in pongonginuman bo inta mopoposadia in kaanon, nomia kon noitaḷá kon i datu.

KINOBAḺIAN 40:4

Noonggotbí doman in mosia kon ponjara tatua, bo itoi in moḷoḷukad kon komaḻig nobogoi in tugas kon i Yusup moindoi kon i monia.

KINOBAḺIAN 40:6

Naonda in ki Yusup namangoi kon i monia nopoikoḷomai kon singgai, koontongan molamurú mako in taya dua tua.

KINOBAḺIAN 40:8

Tubag monia, “Kogobíi kami in sinumogoindop, bo diá doman kotaauan nami in mangaḻenea.” Guman i Yusup, “Tongábí ki Allah in motaau mobogoi in mangaḻe in togoindop. Oumanka in togoindop monimu tatua.”

KINOBAḺIAN 41:11

Kon doḷom tobatú kaminda tumpaḷa sinumogoindop, bo togoindop naminda tua diábí notongkai in mangaḻenea.

ESTER 6:1

Kon doḷom doman tatua ki datu diá nokosiug. Tuamai in pinoki gamánea in buk inta pinomaisan kon onu in nobaḻí kon dodatuan bo pinoki baca kon intau.

DANIEL 4:19

Nokodongogmai kon tua, ki Daniel inta dinonoi doman ki Beltsazar, noitaḻikokog bo noitongau notoyong. Dá akuoi, ki Datu Nebukadnezar in noguman kon inia, “Beltsazar, dikabí moḻia-ḻiaw in ginamu popisí in togoindop takin mangaḻenea tua.” Ki Beltsazar in notubag, “Tuangku, mopia-piabí aka kuma bo bayongan inta mobaḻí inta sinoḻindap in togoindop tatua bo moiuma kon musung mita i Tuangku bo deeman kon i Tuangku.

DANIEL 4:5

Táe kon doḷom tobatú kon tungkuḷ in akuoi nosiugpa sinumogoindop in akuoi bo nokouḻí kon oontongon inta mokoḻia-ḻiaw totok kon ginaku.

DANIEL 4:9

“Ei, Beltsazar, itoi in intau mita inta kototaau, kinotaauanku kon iko in kinawasa in dimukud in dewa mita inta motusi, dá diábí in noibuni kon inimu. Indongogaidon in togoindopku tanaa, bo ininsilangandon in mangaḻenea.

PINOGIAPAN 12:6

bo ki Tuhan noguman, “Indongogai in tosingogon-Ku naa! Aka kon sigad monimu bo oyúon in tobatú nabi, yo Akuoi in mokipogontong kon inia kon bonu in oontongon mita, bo mongonguman takinnea kon bonu in togoindop.