KINOBAḺIAN 38:9 - Alkitab Singog In Mongondow Masa In Tanaa

⁹ Táe kinotaauan i Onan kon aka oyúondon in adínea yo deemanbí sia in kitogi gadí kon tua mita. Dá, pomuḷoi in sia mosiugdon moyotakin i baḷú i guya-guyangnea tatua, tongá tantúnea ḷumbúon kon ḷuai in tubignea sinbá ki guya-guyangnea diá mokouḻí kon buí.

KINOBAḺIAN 38:9 Iomraidhean Croise

KINOBAḺIAN 38:10

Gogutúnea tatua nokopomuká kon torú i Tuhan, bo ki Tuhan nomatoi doman kon inia.

AYUB 5:2

Tongábí intau inta bodok in matoi dinia in nakit in ginanea.

AMSAL 27:4

Torú tua in moromú bo mokorimumud, táe tumayow kon intoi ki ine in mokoigon?

ULANGAN 25:5

“Aka intau ginaḷum bo mogutun moyotakin, bo tobatú kon sigad monia minatoi tongá diá kogadí kon ḷoḷaki, dá ki baḷunea in diábí motaau motonibuḷoi in intau ibanea kon ḷuai in ginaḷum in buḷoinea inta ain minatoi. Ginaḷum i buḷoinea in mustibí mononibuḷoi kon bobay-bobay tatua.

ULANGAN 25:6

Adí ḷoḷaki guya-guyang monia in mustibí anggapon adí i utat inta ain minatoi tatua, sinbá oyúon in buínea kon sigad in bangusa Israel.

TITUS 3:3

Sin koḻipod in kita tontaní in nobodokbí doman, diá noitutui bo diá motoindudui. Kita sinonggata in norupa-rupamai in ibog in awak naa ande in dunia naa; kita in noyobiag takin niat mita inta moraat, tantú mointoi bo mososaturuan.

YAKOBUS 3:14

Táe aka moiko in mointoi bo tongá morai kon kopontingan tontaní, donaaibí pongaḷakuang monimu in kabijaksanaan tatua, sin dodia monimu natua in mopoyotuuybí in habar inta nobanar nongkon i Allah.

YAKOBUS 3:16

Kon onda in oyúon intoi bo sipat inta tongá morai kon kopontingan tontaní, yo kon tua oyúon domandon in ropatoi bo bayongan in oaid inta moraat.

YAKOBUS 4:5

Dikabí anggapon monimu kon diá in dodoyonan Buk Motusi moguman, “Kon bonu in awak naton naa sinampatdon i Allah in Roho inta motogat in ibognea.”

RUT 1:11

“Dika, uḻeku!” tubag i Naomi, “mopia-piabí kon mobui in moiko. Onubí in mangaḻenea in moiko dumudui kon inakó? Akuoi naa in kinotaauandon monimu kon diá bidon mokouḻí kon adí inta motaau popobuḷoi bui kon i monimu?

RUT 4:10

Koḻikud intua gamáanku domandon in ki Rut, bobay in Moab, ki baḷú i Mahlon tua mobaḻí ki buḷoiku. Sinbá butá tatua in umuran mobaḻí kapunyaan in motoḷuadí in intau inta ain minatoi tua. Bo buínea in umuran doman kon yua-yuak in ginaḷumnea bo kon kotánea. Toropdon Utat mita, singgai in naa moiko komintan in nobaḻí sakusinea.”