KINOBAḺIAN 26:18 - Alkitab Singog In Mongondow Masa In Tanaa

¹⁸ Sia in bui nongaḻi kon parigí mita inta ain kinaḻi kon tungkuḷ i Abraham bo inta ain binumbunan in intau mita in Pilistin naonda in ki Abraham minatoidon. Parigí mita tatua in tantúbí sinontangoian in tangoi inta pinonangoi i amánea.

KINOBAḺIAN 26:18 Iomraidhean Croise

KINOBAḺIAN 21:25

Táe nopaḷut mako kon tua oyúon in nokomanasaḷ kon i Abraham soaḷ ki Abimelek popisí in parigí tobatú inta ain inagow in bobantung mita i datu tatua.

KINOBAḺIAN 21:30

Ki Abraham in notubag, “Tarimadon in ki adí in domba pitu tanaa mobaḻí tanda kon ki Tuang in nongakudon kon akuoibí in nongaḻi kon parigí tanaa.”

KINOBAḺIAN 21:31

Tuamai tampat tatua in sinangoian intau Bersyeba, sin kon tuata taya dua nongongibotan.

KINOBAḺIAN 26:17

Dá ki Ishak in minayádon bo nogaid kon ḷoḷaigan kon Ḷopá in Gerar. Sia in nogutunpa kon tua.

KINOBAḺIAN 26:19

Bobantung mita i Ishak in nongaḻi kon parigí kon Ḷopá in Gerar tatua bo nokouḻí kon tubig inta totok mobarong.

TAWARIKH 2 26:10

Sia in noposindog doman in ḷangkeang mita inta dininding kon butá inta kon padang gurun, bo nongaḻi kon nobayong in parigí sin nobayong totok in bobiagonnea, pinomayá kon buḷud andeka kon ḷopá kon dotá in toyopan. Popisí in sia moibog moindoi kon ponononggobá, dá nopotabá in sia nokiaid kon nobayong in intau sinbá monoimbotú kon gobá mita in anggur kon buḷud, bo mononggobá kon butá mita inta mopia.

MAZMUR 16:4

Biódon mako in intau inta mosumba kon dewa mita moduga-dungangdon in ajar in ginanea. Akuoi in doíbí mobogoi in kuruban kon dewa mita, nodapotbí in doí monangoi kon tangoi monia.

HOSEA 2:17

Diá bidon ogoi-Ku in sia in monangoi bui kon tangoi in Baal, dá koḻiongandon in intau in tangoi tatua.

ZAKHARIA 13:2

Kon singgai tatua popatan-Kudon in tangoi in berhala mita nongkon butá tanaa, dá diádon tobatúmai in mokotoropa kon tua. Bayongan intau inta mongaku kon nabi in sia poguntunon-Ku takin i monia inta kinokawasaan in dimukud inta motombogá.

PINOGIAPAN 32:38

Nebo, Baal Meon, bo Sebam. Kotá mita inta pinosindog bui monia tua binaḷuiandon monia in tangoinea.